Rəsul Rza və Bəxtiyar Vahabzadə
Bəxtiyar Vahabzadə 60-cı illərin poetik prosesində fəal iştirak edən
və ustad Rəsul Rzanın ən çox güvəndiyi sənətkarlardan biri idi. İlk şeirlərini
40-cı illərin ortalarından çap etdirməyə başlayan gənc şairin onlarla əsərləri
və kitabları 50-ci illərdə işıq üzü görsə də, biz bildiyimiz və sevdiyimiz Bəxtiyar
Vahabzadə 60-cı illərdən etibarən boy göstərməyə başlayıb. Bir sıra ədəbi
zamandaşları və yaşıdları kimi Bəxtiyar Vahabzadə də özünü məhz həmin dövrdən
etibarən yenidən qurur və tamamilə yeni estetik dünyagörüşünün nümayəndəsi kimi
meydana çıxır. Özünü ömrü boyu Səməd Vurğunun şagirdi sayan Bəxtiyar Vahabzadə
həm də Rəsul Rza məktəbinin istedadlı davamçısı idi. Xüsusi vurğulamaq yerinə
düşər ki, milli poeziyamızda fəlsəfi şeir təmayülünün Səməd Vurğundan və Rəsul
Rzadan başlanan inkişaf istiqamətlərini birləşdirməklə milli poetik təfəkkürümüzü
zənginləşdirənlərdən biri məhz Bəxtiyar Vahabzadə idi.
Nə isti nəfəsi var.
Ancaq bir parıltısı,
Bir də küylü səsi var.
Fişəng kimi gurlayır,
Aləmə düşür səsi,
Ancaq bir sərçəni də
Öldürə bilməz onun
Bər-bəzəkli gülləsi.
Vəzni sözlə doldurub
Qafiyə ilə oynamaq,
Daz başa nahaq yerə,
Daraq çəkməkdir ancaq!
Sənət gülüstanına
Elə sözlər əkək ki,
Orda alaq olmasın.
Qafiyən çolaq olsa,
Zərəri yoxdur, təki
Fikrin çolaq olmasın.
Mənim məslək yoldaşım,
Açdığı təzə yolda hələlik tək yoldaşım!
Deyirlər: - Vəznin sənin tez-tez dəyişkən olur.
Deyirlər: - bu vəzndə fikrin yolu gen olur.
Vəzn gərilməlidir dövrün əsəbi kimi.
Qoy o tez-tez dəyişsin əsrin tələbi kimi...
Deyirsən: - zaman ötür, bir yerdə saymaq olmaz.
Deyirlər: - Nizamiyə, Füzuliyə bax, barı.
Deyirsən: - Sizdən artıq mən sevirəm onları.
İstəyirəm əsrimi, zəmanəmi mən duyam:
Mən də onlar tək axı öz əsrimin oğluyam.
Deyirlər: - misraları bölmə belə tən yarı,
Axı onda çox olur sətrin dolanbacları.
Deyirsən: - Şeirim mənim öz əsrimə baş əyir,
Vəznim də öz əsrimin yollarına bənzəyir.
Çünki sən öz əsrinə
Daha artıq bağlısan.
Sənət gülüstanına
Qədəm basandan bəri
O köhnə ölçüləri
Cəsarətlə sən atdın.
"Məna”, "məna”-demədin,
Sən mənalar yaratdın.
Yaşar Qasımbəyli
institutunun baş elmi işçisi
50-ci illərin ikinci yarısından və 60-cı illərdən etibarən gənc
istedadların, ədəbiyyata özündən sonra gələnlərin qayğısına qalan Rəsul Rza
onlarla qələm sahibləri, o cümlədən, Bəxtiyar Vahabzadə haqqında da ürək sözlərini
yazıb gələcək nəsillərə yadigar qoyub getmişdir. Ustad sənətkarın Bəxtiyar Vahabzadəyə həsr olunmuş ədəbi
düşüncələri, məqalə və ədəbi-tənqidi çıxışları Bəxtiyar Vahabzadəşünaslığın ilk
və sarsılmaz təməl daşları kimi bugün də mühüm əhəmiyyət kəsb etməkdədir.
Bəxtiyar Vahabzadəyə münasibəti Rəsul Rzanın XX yüzil Azərbaycan ədəbiyyatı
haqqındakı fikir və düşüncələrini öyrənmək baxımından mühüm əhəmiyyətə
malikdir. Xüsusi qeyd etməyə dəyər ki, R.Rzanın öz ədəbi yaşıdları və ən
yaxın müasirləri arasında yüksək qiymətləndirdiyi şairlərdən biri S.Vurğun,
M.Müşfiq və B.Vahabzadə idi. Ədəbi prosesə və ümumən, ədəbiyyat tariximizə
yüksək meyarlar və tələbkarlıqla yanaşan R.Rzanın B.Vahabzadə yaradıcılığına bu
cür münasibəti təsadüfi deyildi. Söz sənətinin əsl bədii dəyərlərə və sərt,
amansız ictimai həqiqətlərə sədaqətini hər şeydən yüksək tutan R.Rza bunların
estetik inikasını B.Vahabzadə yaradıcılığında müşahidə etdiyinə görə cavan və
mübariz həmkarının ədəbi axtarışlarını qiymətləndirməyi sanki özünə borc
bilirdi. R.Rza məhz buna görə də sabiq ümumittifaq mətbuatında və milli nəşrlərdə
çap etdirdiyi məqalələrində 60-cı illərin ən canlı və döyüşkən şairlərindən
biri kimi yeri gəldikcə B.Vahabzadəyə müraciət edir, onun poetik uğurlarını və
cəsarətli bədii yeniliklərini müdafiə edirdi. B.Vahabzadənin R.Rza yaradıcılığına və onun ədəbi şəxsiyyətinə
münasibəti də diqqətəlayiqdir. Öz ustadının mürəkkəb mübarizələrdə və gərgin sənət
döyüşlərində cilalanmış, bərkimiş və milli həqiqətlərə sadiq poeziyasını
B.Vahabzadə yüksək qiymətləndirir, özünün və yaşıdlarının, hətta daha sonra ədəbiyyata
gələnlərin uğurla irəliləməsində R.Rza zəhmətinin və iztirablarının misilsiz
xidməti olduğunu dərindən anlayırdı. Məhz buna görə də altmışıncıların mənəvi
qardaşı və yoldaşı Bəxtiyar Vahabzadənin "Ey şair, sən haqlısan” (1960)
şeirində R.Rza sənətinin mahiyyəti və
taleyi ilə bağlı səslənən əhəmiyyətli fikirlər ümummilli dəyərə malikdir. Müəllifin
düşüncələri, xüsusən, o illər üçün, təzəcə başlanmaqda olan poetik epoxanın
estetik maraqları nöqteyi-nəzərindən çox qiymətlidir. Şeirin yazıldığı tarix çox önəmlidir. Azərbaycan ədəbiyyatı, ümumən,
o dövrdəki çoxmillətli sovet ədəbiyyatı tarixində 50-ci illərin sonu və altmışıncıların
əvvəlləri köhnə ədəbi epoxanın başa çatması və yeni poetik eranın başlanması
dövrü kimi səciyyələnir. Gənc Bəxtiyar Vahabzadənin ustad Rəsul Rzaya həsr
etdiyi şeirində məhz zamanın həmin keyfiyyəti və ab-havası diqqət mərkəzinə
çıxarılıb. Şeirin R.Rzaya xitabən yazılması da təsadüfi deyil. Müəllif sevdiyi
və pərəstiş etdiyi poeziya ustadlarından məhz R.Rzanı seçib, ona müraciət
edirdi. Bunun səbəbi isə ondan ibarət idi ki, dəyişməkdə və yenilənməkdə olan
milli poeziyanın əsaslana biləcəyi, söykənə biləcəyi əsas ədəbi zirvələrdən
biri məhz R.Rza idi. Zamanın günbəgün yeniləşən ideya-estetik ehtiyaclarına
R.Rza şeirinə güvənmədən cavab vermək çox çətin idi. O dövrün ədəbi gəncliyi və
bədii yaradıcılığında yeni bir mərhələnin başlanğıcına qədəm qoymuş, atəşin
istedad sahibi B.Vahabzadə öz mənəvi-estetik məqsədlərinə və hədəflərinə
çatmaq üçün necə şeir yaratmağı arzulayırdı? R.Rzaya həsr olunmuş şeirdə məhz
bu cür konkret və kəskin suallar qoyulur, onlara israrla cavab axtarılırdı.
Şeirin əvvəlində ənənəvi və köhnə şeir modelini şərti şəkildə misal gətirərək
müəllif aşağıdakıları söyləyirdi:
Bu sözlərin nə canı, Nə isti nəfəsi var.
Ancaq bir parıltısı,
Bir də küylü səsi var.
Fişəng kimi gurlayır,
Aləmə düşür səsi,
Ancaq bir sərçəni də
Öldürə bilməz onun
Bər-bəzəkli gülləsi.
Müəllif
bu poetik düşüncələr və paralellər fonunda yeni şeirin zəruriliyi barəsində dərin
fikirlərə dalır. Cansız və soyuq misraların hökmranlığı mühitində, səs-küylü və
parıltılı şeirlərin düşüncə və təsəvvürləri mühasirəyə aldığı zamanın yeni şeirə
olan qarşısıalınmaz ehtiyacını vurğulayır. Belə şeirlərlə oxucuları aldatmaq,
sürtülmüş və dəbdən düşmüş qafiyələrlə könüllərə hakim olmaq mümkün deyil:
Vəzni sözlə doldurub
Qafiyə ilə oynamaq,
Daz başa nahaq yerə,
Daraq çəkməkdir ancaq!
Gənc Bəxtiyar Vahabzadə yeni şeir gülüstanında gözəl və ətirli güllər
əkilməsini arzulayır. Bu ədəbi arzuların həyata keçməsi uğrunda mübarizədə isə
o, daha çox öz yaşıdlarına və ustad Rəsul Rzaya güvənirdi.
Sənət gülüstanına
Elə sözlər əkək ki,
Orda alaq olmasın.
Qafiyən çolaq olsa,
Zərəri yoxdur, təki
Fikrin çolaq olmasın.
Şeirdə
təkcə bədii məzmunun yeni və həyati olması şərti irəli sürülməyib. Yeni ədəbi nəslin
yeni bədii yollardan getmək arzusunu da müəllif irəli sürür. Yəni köhnə bədii
vasitələrlə yeni ədəbiyyat yaratmaq mümkün deyil. Zamanın ritminə, sürətinə
uyğun yeni estetik ölçülər və biçimlər də zəruridir. Bu keyfiyyətləri də
yetişməkdə olan ədəbi nəsil məhz R.Rza irsində tapır, onun yaradıcılığında yeni
bədii forma və üsulların mövcud olduğuna səmim-qəlbdən inanırdılar. Yeni lirik
"mən” məhz bu ovqatla ustad sənətkara müraciət edir:
Min illik şeirimizdə təzə cığırlar açan Mənim məslək yoldaşım,
Açdığı təzə yolda hələlik tək yoldaşım!
Deyirlər: - Vəznin sənin tez-tez dəyişkən olur.
Deyirlər: - bu vəzndə fikrin yolu gen olur.
Vəzn gərilməlidir dövrün əsəbi kimi.
Qoy o tez-tez dəyişsin əsrin tələbi kimi...
Deyirsən: - zaman ötür, bir yerdə saymaq olmaz.
Deyirlər: - Nizamiyə, Füzuliyə bax, barı.
Deyirsən: - Sizdən artıq mən sevirəm onları.
İstəyirəm əsrimi, zəmanəmi mən duyam:
Mən də onlar tək axı öz əsrimin oğluyam.
Deyirlər: - misraları bölmə belə tən yarı,
Axı onda çox olur sətrin dolanbacları.
Deyirsən: - Şeirim mənim öz əsrimə baş əyir,
Vəznim də öz əsrimin yollarına bənzəyir.
Göründüyü kimi, şeirdə R.Rzanın poeziyamız tarixində bir islahatçı
kimi fəaliyyəti və xidmətləri vurğulanır. Zamanın yeni bədii ifadə vasitələrində
inikası R.Rza şeirinin əsas nailiyyətlərindən biri kimi təqdim olunur. Həmişə
yeni olmağa can atan və öz mahiyyətini, varlığını təzə, orijinal ifadə yolları
ilə əks etdirməkdə maraqlı olan gənclik üçün R.Rza poeziyası bu mənada hava və
su kimi zəruri idi. "Şair, sən haqlısan” şeirindəki bu mühüm qayə, qeyd etməliyik
ki, R.Rzaya həsr olunmuşbaşqa şeirlərdə də qabarıq surətdə nəzərə çarpır. Ustad
poeziyasına yenilikçi və yeni dövrün poetik bələdçisi statusundakı yanaşması ilə
B.Vahabzadə R.Rzaya həsr olunmuş başqa şeirlərin də ideya-estetik istiqamətinə
və pafosuna müəyyən dərəcədə təsir göstərmişdi. Bir çox başqa altmışıncılar da
R.Rzaya həsr etdikləri şeirlərdə B.Vahabzadə mövqeyini və münasibətini uğurla
davam etdirdilər. "Şair, sən haqlısan” şeirinin son misraları, həqiqətən, yeni
poetik epoxanın istək və arzularını aydın şəkildə və sərrast ifadə edirdi:
Ey Rəsul, sən haqlısan, Çünki sən öz əsrinə
Daha artıq bağlısan.
Sənət gülüstanına
Qədəm basandan bəri
O köhnə ölçüləri
Cəsarətlə sən atdın.
"Məna”, "məna”-demədin,
Sən mənalar yaratdın.
XX yüzilin bədii yeniliklərinin, xüsusən, bədii inikas şəkillərinin
zənginləşməsində R.Rzanın zəhmətləri əvəzsizdir. Ədəbiyyata təzə gələnlər, təbii
olaraq, yaradıcılıqda novatorluq nümayiş etdirənlərə daha çox müraciət edirlər.
Gəncliyin yeni görünmək həvəsi onları orijinal ədəbi ünvanlara yönəldir və
meylləndirir. Ə.Kərimin R.Rza haqqındakı məşhur şeirində ustad sənətkarı "Əsrin
ahəngi, vəzni” deyə səciyyələndirməsi, B.Vahabzadənin "O köhnə ölçüləri Cəsarətlə
sən atdın” deməsi ustad R.Rzanın islahatçı sənətkar olmasına işarədir. Elə bu səbəbdən
də altmışıncılar R.Rzanı sevir, onu özlərinin ədəbi kumiri sayırdılar.
Böyük şairin milli ədəbi mühitimizdəki hər bir yeniliyə həssas
münasibəti ədəbiyyat aləmində kifayət qədər məlumdur. Bu səbəbdən R.Rzanın
B.Vahabzadəyə münasibəti də istisna deyil. Özünün bütün cavan qələm dostlarına
dayaq olduğu kimi, R.Rza 50-ci illərin ikinci yarısında kəskin ədəbi və siyasi
hücumlara məruz qalan gənc B.Vahabzadədən də köməyini və qayğsını əsirgəməyib.
Məhz həmin illərdə qələmə aldığı və gənc şairin Moskvada nəşr olunan kitabında
çap etdirdiyi "Bəxtiyar Vahabzadə” məqaləsində ustad şair yazırdı: "Bəxtiyar
Vahabzadə sözün əsl mənasında şairdir. Onun poetik fırçasının çəkdiyi lövhələr
rəngarəng və maraqlıdır. Dili şirəli və koloritlidir. B.Vahabzadənin poeziyası
– düşüncələr poeziyasıdır. Bu düşüncələr bəzən həyatın üst qatlarına toxunsa
da, şeirlərinin bir qismində ayrı-ayrı motivlər təkrar olunsa da, ümumiyyətlə,
B.Vahabzadənin poeziyası müasir Azərbaycan ədəbiyyatının maraqlı hadisələrindəndir. Şair ən yaxşı şeir oxucuları ilə məhrəmanə söhbət edir.
Adama elə gəlir ki, o daha bir şeir yazmaq istəməmiş, öz dəruni fikirlərini ən
yaxın dostları – oxucuları ilə bölüşməyi arzulamışdır. Şairin ovqatı
qeyri-ixtiyari olaraq sizə sirayət edir, sizi sevinc, kədər bürüyür. Siz əvvəllər,
bəlkə də qəlbinizdə bu cür emosiyalar doğurmayan şeylərin, hadisələrin mənası
haqqında düşünməyə başlayırsınız. İndi isə həmin şeylər, hadisələr dəqiq
tapılmış şairanə sözlərin gücü ilə
qat-qat mühüm əhəmiyyət kəsb edir. Onlar sizi fəaliyyətə, məhəbbətə, nifrətə
çağırır...”.
"Bəxtiyarlıq” adlanan və 70-ci illərdə yazılmış başqa bir məqaləsində
isə R.Rza özünün ən istedadlı davamçılarından biri olan B.Vahabzadə poeziyasına
yenidən müraciət edir. Çağdaş şeirimizin görkəmli nümayəndələrindən biri kimi
yüksəlmiş cavan qələm dostunun poetik uğurlarına ürəkdən sevindiyini bildirir.
B.Vahabzadə şeiriyyətinin ən ümdə estetik keyfiyyətləri və xüsusiyyətləri barəsində
sevimli oxucularla fikirlərini bölüşür: "...Şair Bəxtiyarın Bəxtiyarlığı onun
qibtə ediləcək dərəcədə böyük olan istedadıdır. Bu yaradıcılıq istedadı ona dərin
xalq məhəbbətini qazandırmışdır. Onu Vətənin sevimli şairi etmişdir. Belə bir
tale səadətdir. Belə bir insan, həqiqətən, bəxtiyardır. Onun ilhamlı ürək
döyüntüsi ilə keçən yuxusuz gecələri onun xalqını, Vətənini əsrin çətin yüksəliş
yollarında, yürüşdə ilk sıralarda görmək arzusu ilə keçirdiyi nigaranlıq,
duyduğu sevinc, keçirdiyi incikli günlər hər kəsə nəsib olmayan bəxtiyarlıqdır.
Qəlbindən qopan duyumlarda, incə deyimlərdə canlanan həqiqi poetik fikirlər
minlərlə insanın, müasirlərinin mənəvi aləmini zənginləşdirir – bu həqiqi bəxtiyarlıq
deyilmi? Bu bəxtiyarlıq bir insan, bir vətəndaş, bir nəğməkarın bəxtiyarlığıdır.
Mən Bəxtiyarı belə tanımışam, belə duymuşam, belə sevmişəm”. Yaxın
keçmişimizin iki qüdrətli sənətkarının ustad-şagird münasibəti və bir-birlərinə
qarşılıqlı sevgisi bugünkü və gələcək nəsillər üçün də son dərəcə ibrətamiz,
qiymətli bir nümunədir.
Yaşar Qasımbəyli
filologiya elmləri doktoru, professor
AMEA Nizami Gəncəvi adına Ədəbiyyatinstitutunun baş elmi işçisi