AZƏRBAYCANDA KORONAVIRUSLA BAĞLI XƏBƏRLƏR

"Petkim" beynəlxalq mükafata layiq görülüb

İqtisadiyyat
28 Aprel 2021, 18:30 886
"Petkim” neft-kimya kompleksi "International Finance” jurnalının Beynəlxalq Maliyyə Mükafatları çərçivəsində verdiyi "Ən yaxşı biznes sərmayəsi idarəçiliyi” mükafatına, SOCAR Türkiyə Təbii Qaz Bölməsinin maliyyə direktoru Betül Sarıkaya isə "Ən yaxşı qadın maliyyə direktoru” mükafatına layiq görülüb.

SOCAR-dan Kaspi.az-a verilən məlumata görə, Türkiyənin ən böyük birbaşa xarici investoru SOCAR Türkiyə dünya şöhrətli, nüfuzlu  "International Finance” jurnalının hər il elan etdiyi Beynəlxalq Maliyyə Mükafatları (International Finance Awards) çərçivəsində bu il iki fərqli kateqoriya üzrə mükafata layiq görülüb. Mərkəzi İngiltərədə yerləşən jurnalın "Ən yaxşı biznes sərmayəsi idarəçiliyi” (Best Working Capital Management) mükafatatı  Türkiyədə Petkimə, "Ən yaxşı qadın maliyyə direktoru” (Best Women CFO) mükafatı isə SOCAR Türkiyə Təbii Qaz Bölməsinin maliyyə direktoru Betül Sarıkayaya verilib.

Beynəlxalq arenada böyük nüfuza sahib olan "International Finance” jurnalının eyni zamanda iki mükafatına layiq görülməyinin qürurverici olduğunu deyən SOCAR Türkiyə Emal və Neft-Kimya Bölməsinin maliyyə işləri üzrə vitse-prezidenti və "Petkim”in baş maliyyə direktoru Elçin İbadov bildirib: "Bu mükafatların bütün dünyanın üzləşdiyi mürəkkəb pandemiya dövründə verilməsi çox dəyərlidir. Türkiyənin ilk və yeganə inteqrasiya olunmuş neft-kimya kompleksi "Petkim” bu müddətdə SOCAR Türkiyənin digər şirkəti "STAR” NEZ ilə inteqrasiya halında işləyərək, neft-kimya xammalına ehtiyacını fasiləsiz və yüksək keyfiyyətlə təmin etmə üstünlüyünə sahib oldu. Bunun sayəsində "Petkim” logistika xərclərində ciddi qənaətə nail oldu. Həyata keçirdiyimiz məhsuldarlıq və rəqəmsallaşma layihələri ilə yanaşı, məzənnə və faiz riskləri ilə maliyyə alətlərinin düzgün idarə olunması, əməliyyat xərclərinin optimallaşdırılması və dövriyyə kapitalının səmərəli idarə edilməsinin təsiri ilə "Petkim” olduqca uğurlu maliyyə nəticələrinə imza atdı. 2020-ci ildə əməliyyat gəlirliliyini əvvəlki ilə nisbətən 21% artıraraq 1,9 mlrd. TL-yə çatdıran "Petkim”in ehtiyatlar, debitor borcları, nağd pul və borc idarəçiliyi sahəsində göstərdiyi nəticələrin "Best Working Capital Management” kateqoriyasında mükafata layiq görülməsinə görə böyük fərəh duyuruq”.

"International Finance” jurnalının Beynəlxalq Maliyyə Mükafatları çərçivəsində "Best Women CFO” kateqoriyasında təqdim etdiyi mükafata isə SOCAR Türkiyə Təbii Qaz Bölməsinin baş maliyyə direktoru Betül Sarıkaya layiq görülüb. 2019-cu ilin iyununda "Bursagaz”, "Kayserigaz”, "EWE Enerji”, "Enervis” və "Millenicom”un satınalma prosesi başa çatdıqdan sonra Təbii Qaz Bölməsi tərkibində fəaliyyət göstərən şirkətlərdə davam edən inteqrasiya prosesi 2021-ci ilin fevralında tamamlandı. Bu prosesdə Sarıkaya maliyyə sahəsində uğurlu fəaliyyəti ilə seçilən  şəxslərdən biri kimi ön plana çıxıb.