Separatçı qurumda təlimlər Gürcüstanda etirazla qarşılandı
Gürcüstan
Xarici İşlər Nazirliyi separatçı bölgə Abxaziyada keçirilən hərbi təlimlərlə
bağlı etiraz notası hazırlayır. XİN-in etirazından əvvəl Gürcüstan Müdafiə
Nazirliyi işğal altında olan ərazilərdə hərbi manevrlərlə bağlı etirazını
səsləndirib. Hərbi idarədən verilən məlumata görə, işğal altında olan ərazidə
hər hansı bir aktivlik, xüsusən hərbi fəallıq qanunsuz hesab edilir. Öz
növbəsində Gürcüstanın Mədəniyyət Nazirliyi də narahatdır - bir müddət əvvəl hərbi manevrlərin
keçirildiyi ərazilərdə mədəniyyət abidələri ciddi zədə alıblar, bəziləri isə
tamamilə yararsız hala salınıb. Adətən Abxaziya və Cənubi Osetiyada təlimlər
başlarkən gürcü tərəfi bundan vaxtından qabaq xəbər tuturdu. Söhbət Tbilisinin
kəşfiyyat fəaliyyətindən və yaxud təlimlərin keçirilməsi ilə bağlı "rəsmi”
bildirişdən getmir. Adətən onlar barədə əvvəlcədən anonslaşdırılırdı, hətta elə
olurdu ki, bir il əvvəldən belə manevrlərin keçirilməsi barədə məlumat daxil
olurdu. Və gürcü tərəfinin etiraz bəyanatları tədbirin özünü qabaqlayırdı. Bu
dəfə isə hər şey qəfildən baş verib.
Cənub Hərbi Dairəsinin məlumatına görə,
Abxaziyadakı Rusiya hərbi bazasının hərbçiləri sentyabrın 13-də həyəcan təbili
ilə ayağa qaldırılıblar. "Hərbi birləşmələr 49-cu ümumqoşun ordusunun
tərkibində taktiki təlimlər çərçivəsində iştirak edirlər. Onlar həyəcan təbili
ilə ayağa qaldırılıblar. Təlimlər Cənub Hərbi Dairəsinin komandanı general-polkovnik
Aleksandr Dvornikovun rəhbərliyi altında keçirilir”, - deyə məlumatda
bildirilir. Hərbi manevrlərin birinci mərhələsində hərbçilər həyəcan siqnalı
verilən zaman hərəkətlərini, döyüş komplektinin yüklənməsi, material
vasitələrin ehtiyatlarının necə nizamlanması ilə bağlı olub. Bütün bunlardan
sonra isə 20 km-lik yürüş həyata keçirilir. "Naqvalou və Çabal poliqonlarına
daxil olduqdan sonra isə hərbçilər hərbi texnikanın gizlətmə qaydaları, səhra
rabitə sistemlərinin həyata keçirilməsi və həyat əhəmiyyətli obyektlərin necə qorunması
prosesini həyata keçirməyə başlayıblar. Sonra isə poliqonlarda şəxsi heyət
silahlardan atəş açmaq təlimləri həyata keçirilib. Bura əl qumbaraları, zirehli
döyüş texnikasından istifadə daxildir”, - deyə məlumatda bildirilib. Cənub
Hərbi Dairəsinin mətbuat xidmətinin yaydığı məlumata görə, təlimlərdə 2 mindən
artıq hərbçi iştirak edir. Bundan əlavə, 300 mindən artıq hərbi və xüsusi
texnika cəlb edilib. Ən əsası "Qrad” reaktiv qurğularından istifadə də nəzərdə
tutulub.
Gürcü
tərəfinin sərt reaksiyasını ilk olaraq səsləndirən Gürcüstan Müdafiə Nazirliyi
baş verənlərin yolverilməz olduğunu bəyan edib. Müdafiə naziri Levan İzoriya
separatçı Abxaziya ərazisində baş verənləri beynəlxalq hüquq normalarının
pozulması kimi qələmə verib. "İşğal altında olan torpaqlarda, yəni bizim
torpaqlarda hər hansı bir aktivlik, xüsusən də hərbi nöqteyi-nəzərindən -
qeyri-konstitusion və qanunsuz bir addımdır”, - deyə müdafiə naziri bildirib.
"Biz bunu təhlükə və hədə kimi qarşılayırıq. Növbəti dəfə beynəlxalq hüquq
normalarının pozulması anlamı verir”, - deyə Gürcüstan hərbi idarəsinin rəhbəri
vurğulayıb.
Baş
verənlərə mədəniyyət və vətəndaş cəmiyyəti nümayəndələri də biganə qalmayıblar.
Separatçılar işğal altındakı ərazilərdə tarixi və mədəni obyektləri sıradan
çıxarıblar. Gürcü tərəfinin yaydığı məlumata görə, separatçılar təlimlərdən
sonra onları nizamlamağa çalışsalar da, əksinə, onlar daha da ziyan çəkiblər.
Tbilisidə diqqəti xüsusən bir fakta yönəldirlər ki, bərpa işlərində iştirak
edənlər adi əsgərlərdir. Onların isə xüsusi vərdişlərinin, təhsillərinin
olmadığı, tarixi abidələrin bərpası ilə bağlı təcrübələri belə yoxdur. Onlar
bərpa dedikdə on birinci əsrə aid gürcü məbədini ağ rənglə bəzəməkdə görürlər.
Bu barədə sosial şəbəkələrdə istifadəçilər yazıblar. Beynəlxalq instansiyalara
müraciətlər cavabsız və nəticəsiz başa çatıb. Bu səbəbdən də gürcü tərəfi
ümidvardır ki, Abxaziyadakı hərbi təlimlər tarixi və mədəni obyektlərdən
kənarda keçiriləcək.
Hərbi elmlər üzrə alim Vaxtanq Maisaya başladılan
təlimləri Gürcüstan üçün təhlükə adlandırır, eyni zamanda əlavə edir ki, bu,
ölkənin baş verənlərə reaksiyasının necə olacağını yoxlama kimi başa
düşülməlidir. O hesab edir ki, bunu Rusiyanın Gürcüstanda NATO-nun himayəsi
altında keçirilən təlimlərə cavab kimi qiymətləndirmək gərəkdir. Xatırladaq ki,
Gürcüstanda bir qədər əvvəl NATO himayəsi altında iki hərbi təlim keçirilib -
Vaziani və bir həftə sonra Orfolo poliqonunda. Rusiyanı narahat edən təkcə bu
təlimlərin Şimali Atlantika Alyansının manevrləri deyil, həm də Gürcüstanın
Vaziani bazasında ərazisində NATO-nun tərəfdaş ölkələri - Moldova, Ukrayna və
Ermənistanın iştirakıdır. Orfoloda isə Azərbaycan hərbçiləri iştirak ediblər.
Gürcü ekspert bildirir ki, regionda "sürətli silahlanma”nın analoqu olan
"sürətli təlim yarışması”na bənzər proses baş verir. Ekspertlərin sözlərinə
görə, Abxaziyadakı təlimlər özünün miqyası ilə çox ciddi xarakter daşıyır və
Orfolodakı təlimlərlə bir-birini tamamlayır. Separatçıların mövqeyinə gəldikdə
isə verilən açıqlama onların xarakterinə uyğun olub. "Abxaziya müstəqil
dövlətdir və Gürcüstan bununla barışmalıdır”, - deyə separatçıların nümayəndəsi
bəyan edib.
Azər