Şəki şəhərində seminar keçirilib
Şəki şəhərində "Əmtəə nişanları və coğrafi göstəriciləranlayışı,
bu sahədə qanunvericilik, beynəlxalq
sistemlərlə əlaqə və mühafizə” mövzusunda seminar keçirilib. Seminarda çıxış edən
Standartlaşdırma, Metrologiya və Patent üzrə Dövlət Komitəsi (SMPDK) sədrinin
müavini Niyazi Rəhimov bildirib ki, qeyri-neft ixrac
potensialının gücləndirilməsi, sahibkarlığın, ümumilikdə insan kapitalına söykənən
iqtisadiyyatın inkişafı dövlətin əsas prioritetlərindəndir. O, bu istiqamətdə
Prezident İlham Əliyevin rəhbərliyi ilə struktur xarakterli islahatların
aparıldığını, iqtisadiyyatın əsas istiqamətləri üzrə strateji yol xəritələrinin
təsdiq olunduğunu və ixrac potensialının gücləndirilməsi məqsədilə "Made in
Azerbaijan” brendinin təşviqi üçün əhəmiyyətli işlərin görüldüyünü bildirib.
Hazırda ölkəmizdə innovativ fəaliyyətə, elm tutumlu sənayenin inkişafına xüsusi
diqqət verildiyini bildirən Niyazi Rəhimov ənənəvi biliklər və cöğrafi göstəricilərin
şamil olunduğu məhsulların inkişaf etmiş və perspektivli istehlak bazarlarında uğur
qazandığını deyib.
Ölkə ərazisində
müxtəlif iqlim zonalarının olması, bitkiçilik, heyvandarlıq, şərabçılıq məhsullarının,
içməli su və müalicəvi əhəmiyyətli təbii şəraitin mənşə yerləri ilə əlaqədar xüsusiyyətlərə
malik olması və müxtəlif bölgələrdə yaşayan icmaların ənənəvi biliklərə uyğun
hazırlanan özünəməxsus məhsullara – istər kulinariya, istər xalçaçılıq və s.
sahələrdə xidmətlərin inkişafı sənaye həcmli istehsalın inkişafını şərtləndirir
və ixrac perspektivlərini artırır. Komitə rəsmisi patent sistemində müasir
hüquqi mühafizə sisteminin təmin olunması, beynəlxalq əməkdaşlığın möhkəmləndirilməsi
və təcrübə mübadiləsinin, ictimai məlumatlılığın artırılmasının əhəmiyyətini
vurğulayıb.
Şəki Şəhəri
İcra Hakimiyyəti başçısının I müavini Həsən Həsənov "Made in Azerbaycan”
brendinin təşviqində mühüm əhəmiyyət kəsb edən məhsulların regionlarla bağlı
olduğunu xüsusi vurğulayıb. Ölkə başçısı tərəfindən regionların sosial-iqtisadi
inkişafına yönələn sistem xarakterli tədbirlər nəticəsində hazırda bütün şəhər
və rayonlarda yeni müəssisələr yaradılıb. Yerli sahibkarlığın inkişaf etdirilməsində
Standartlaşdırma, Metrologiya və Patent üzrə Dövlət Komitəsinin fəaliyyət sahələri
yaxından iştirak edir. Həsən Həsənovun sözlərinə görə, bugünki tədbir də buna
misaldır.
"Patent və Əmtəə Nişanları Mərkəzi” publik hüquqi şəxsin
baş direktoru v.i.e. Günel Sevdimalıyeva çıxış edərək mərkəzin fəaliyyəti
haqqında məlumat verib. O, çıxışında coğrafi göstəricilərlə bağlı olan məhsulların
müasir dövrdə aktuallıq kəsb etdiyini qeyd edərək, istehlaçkılar tərəfindən
xüsusi məhsulların axtarılması, coğrafi mənşə ilə identifikasiya olunmuş,
işarələnmiş qida məhsulları sahəsində təlabatlarının artdığını bildirib. Eyni
zamanda coğrafi adın sadəcə bir ad, bir simvol deyil, istehlakçılar tərəfindən
etibar göstəricisi kimi qəbul edildiyini vurğulayıb. Coğrafi göstəricilərin
qorunmadığı halda kommersiya təşkilatları tərəfindən haqsız təhriflərə məruz
qala biləcəyini və ondan istifadə hüququ olmayan şəxslər tərəfindən istehlakçıların
aldadılacağını, məhsulun şöhrətdən düşməsinə, bununla da onun qanuni sahibinə
ciddi zərər dəyə biləcəyini nəzərə çatdırıb. O, coğrafi göstəricilərin təşviqi
və əmtəə nişanlarının qeydiyyatı baxımından son bir il ərzində Mərkəz tərəfindən
görülmüş işlərdən danışıb. Bildirib ki, müxtəlif sahələrə aid ekspertlərdən
ibarət işçi qrup yaradılıb, son bir il ərzində 17 coğrafi göstəriciyə dair ərizənin
daxil olduğunu, milli prosedur üzrə təxminən 30 minə yaxın əmtəə nişanı
qeydiyyata alındığını, beynəlxalq saziş və protokola əsasən isə 50 minə yaxın əmtəə
nişanının qeydiyyatının ölkəmizdə qüvvədə saxlanılıb.
Seminar əmtəə nişanı, sənaye nümunəsi və coğrafi göstəricilərin
qorunmasının
əhəmiyyəti, əmtəə nişanlarına dair iddia sənədlərinin tərtibi,
verilməsi və baxılması qaydaları, coğrafi göstəricilər anlayışı və onların milli
qanunvericiliyə uyğun mühafizəsi,
Azərbaycanda sənaye mülkiyyəti sahəsində hüquqların mühafizəsi: məhkəmə və digər
orqanların təcrübəsi, sənaye nümunəsi anlayışı, milli qanunvericiliyə
uyğun olaraq sənaye nümunələrinin patentlə mühafizəsi, beynəlxalq qeydiyyat
(Haaqa Sazişi), sənaye nümunəsinin mühüm əlamətlərinin siyahısı və patentləşdirmə
prosedurları və s. mövzular ərtafında müzakirələrlə
davam etdirilib.
Seminarda Şəki şəhərində fəaliyyət göstərən
sahibkarlarla yanaşı Qax, Zaqatala, Balakən və Oğuz rayonlarından olan iş
adamları iştirak edib.