Sabunçuda hüquqi maarifləndirmə
Azərbaycan
Respublikasının Prezidenti yanında Bilik Fondunun "Hüquqi maarifləndirmə"
proqramı çərçivəsində Sabunçu Rayon İcra Hakimiyyəti və Nardaran Bilik Evinin
birgə təşkilatçılığı ilə İcra Hakimiyyətinin inzibati binasında "Tikinti
qanunvericiliyi: tələblər və reallıqlar” mövzusunda maarifləndirici tədbir
keçirilib.
Şəhərsalma və tikinti
qanunvericiliyi sahəsində yeniliklərlə bağlı əhalinin maarifləndirilməsi
istiqamətində silsilə xarakterli növbəti tədbiri giriş sözü ilə açan Rayon İcra
Hakimiyyəti başçısının birinci müavini Güloğlan Məmmədov Bilik Fondu ilə birgə
keçirilən tədbirlərin əhəmiyyətindən danışıb, bu ənənənin gələcəkdə də davam edəcəyini
bildirib.
Bilik Fondunun aparat rəhbəri,
professor İsaxan Vəliyev Fondun fəaliyyəti haqqında tədbir iştirakçılarına məlumat
verərək, Azərbaycan Respublikasının Pezidenti cənab İlham Əliyevin şəxsi diqqət
və qayğısı nəticəsində paytaxt Bakının dünyanın ən gözəl meqapolislərindən
birinə çevrildiyini vurğulayıb.
İ.Vəliyev ölkə
başçısının tikinti və şəhərsalma sahəsində indiyədək qəbul edilmiş
qanunvericilik aktlarının liberallaşması istiqamətində imzaladığı rəsmi sənədlərin
cəmiyyətimizdə razılıqla qarşılandığını, azad sahibkarlığın inkişafı üçün geniş
imkanlar yaratdığını qeyd edib.
Tədbirdə Azərbaycan
Respublikası Milli Məclisinin İnzibati və hərbi qanunvericilik şöbəsinin müdir
müavini, Bilik Fondunun Hüquqi maarifləndirmə üzrə Koordinasiya Şurasının üzvü
Səyyad Kərimovun "Tikinti qanunvericiliyi: tələblər və reallıqlar” mövzusunda məruzəsi
dinlənilib.
Məruzəçi şəhərsalma və
tikinti məsələlərini tənzimləyən hüquqi aktlardakı yeniliklərdən
danışıb, bu normativ hüquqi sənədlərin tətbiqi mexanizmləri barədə
iştirakçılara ətraflı məlumat verib.
İnteraktiv şəraitdə keçən
tədbirdə iştirakçıların çoxsaylı sualları ətraflı cavablandırılıb.