Rusiyanın rəsmi dövlət mətbuatı Ermənistanı aşağıladı
Ermənistan prezidenti Serj Sarkisyanın Rusiyaya səfəri və müzakirə
olunan məsələlər bu ölkənin mediasının diqqət mərkəzinə düşüb. Əslində hamıya
yaxşı məlumdur ki, forpost ölkənin prezidentinin səfərində məqsəd heç də
Rusiyada Ermənistan mədəniyyəti günləri adı altında keçirilən tədbirlər olmayıb.
Söhbət ondadır ki, ermənilər Rusiyanın onlara nə iqtisadi, nə də siyasi mənada
yardımçı olmadığını görərək, hər vəchlə Qərbə doğru can atır, Avropa
İttifaqının Assosiativ üzvlüklə bağlı sazişini imzalamağa hazırlaşır. Sarkisyan
də bu məqsədlə onu Cənubi Qafqazda forpostu elan edən ölkədən razılıq almaq
üçün Rusiya paytaxtına yollanıb. Lakin erməni hiyləgərliyi ilə bunu ehtiyatla
etmək istəyir. Rusiya tərəfi də bunu gözəl anlayır. İcazəni də çox alçaldıcı
formada həyata keçirir. Məsələn, görün Rusiyanın rəsmi dövlət nəşri "Rossiyskaya qazeta” manşetinə necə bir başlıq
qoyub - "Rusiya Ermənistanı Avropa İttifaqına buraxır”. Bu də Ermənistanın müstəqil bir dövlət olmadığına, yalnız
Moskvanın diktəsi ilə hərəkət etdiyinə işarədir. Daha sonra məqalədə müəllif
belə bir sualla çıxış edir. "Serj Sarkisyanın səfəri əsas suala cavab verməyib
– Kreml Ermənistanı Şərq Tərəfdaşlığı Proqramına daxil olmağa buraxacaqmı?”
Müəllif yazır ki, Sarkisyan iki stulda oturmağa hazırdır - həm Avrasiya
İqtisadi İttifaqı, həm də Avropa İttifaqında: "Bu ölkə hər iki qurumdan
maliyyə, iqtisadi, hətta hərbi yardım almağa ümid edir. Postsovet məkanında
hələ heç bir dövlətin belə bir seçimi olmayıb”. Qəzet yazır ki, dövlət
başçıları təkbətək görüşlərində iki ölkə arasında mövcud olan problemləri
müzakirə ediblər, lakin onun təfərrüatlarını mətbuata açıqlamayıblar. Nəşr yazır
ki, Ermənistan prezidenti bu müddət ərzində hər iki tərəflə yaxşı münasibətlər
qurmağa çalışıb.
Məlumat üçün bildirək ki, Avropa İttifaqının "Şərq tərəfdaşlığı”
proqramı Azərbaycan, Ermənistan, Belarus, Gürcüstan, Ukrayna və Moldovanı əhatə
edir. Layihə keçmiş sovet respublikalarının Aİ-yə adaptasiyasını nəzərdə tutur.
Erməni tərəfi özündə cəsarət tapıb 2013-cü ilə bu sazişə qoşulmaq istəsə də,
Moskva buna imkan vermədi. O zaman Sarkisyan Moskvaya səfərindən dərhal sonra
bəyan etdi ki, Ermənistan Aİ-yə qoşulmur, Avrasiya İqtisadi İttifaqında (Aİİ) qalır.
Bu dəfə də belə bir addım atsa, onda Avropa ondan birdəfəlik üz döndərə bilər.
Bu isə ölkənin imicinə ciddi zərbə vurmuş olar. Bununla yanaşı, noyabrın 24-də
imzalanacaq saziş ərəfəsində erməni tərəfi Azərbaycanı onun bu proqrama
qoşulmasına maneçilik yaratmaqda ittiham etməyə başlayıb. Özü də üzvlük
məsələsi ermənilərin narazılıq və etirazları fonunda keçdi. Rusiya nəşri
xatırladır ki, ölkə əhalisinin üçdə biri ölkənin bu quruma üzvlüyünə qarşıdır.
Müxalifət isə dəfələrlə bu istiqamətdə "Məcburi SSRİ-ni istəmirik”,
"NoRussianEmpire” şüarları altında aksiyalar keçirib. Erməni tərəfi də prosesi
uzatmağa çalışaraq, üzvlükdən mənfəət əldə etməyə çalışıb. Moskva da vəd
etmişdi ki, quruma üzvlükdən sonra Ermənistan gömrük rüsumlarının 1,13 faizini
əldə edəcək. Lakin bu, baş vermədi. Rusiya nəşri yazır ki, Ermənistan iki
stulda çox asanlıqla otura bilir. Aİ-yə qəbul olduqdan dərhal sonra qurumdan 78 milyon avro yardım aldı. Sözsüz ki, burada
Qərbin ermənilərə bir xristian təəssübkeşliyi, dəstəyi hiss olunur. Belə bir
addımı hansısa başqa bir postsovet ölkəsi etsəydi, təbii ki, heç bir halda bu
yardım göstərilməzdi. Bax, ikili standartlar və qərəzli yanaşmanın bariz
nümunəsi budur. Qonşu Azərbaycanın beynəlxalq hüquqla təsdiq olunmuş
torpaqlarını işğal edəsən, BMT TŞ kimi ali bir qurumun da bu ərazilərdən dərhal
çıxmaq barədə dörd qətnaməsi olsun, ancaq sənə "gözün üstündə qaşın var” deməsinlər.
Əksinə, sənin çoxvektorlu siyasət yürütmənə imkan versinlər, yardımlar
ayırsınlar. Ən əsas məsələlərdən biri də Metsamor AES-dir. Aİ və digər
beynəlxalq qurumlar stansiyanın bağlanmasını tələb etsə də, qarşı tərəf bu
tələbə də əməl etmir. Stansiyanın dinc məqsədlərlə istifadəsinə inanan
avropalılar hətta AES üçün maliyyə yardımı da ayırıb.
Azər NURİYEV