Gürcüstan növbəti sınaq qarşısında
Oktyabrın 21-də yerli özünüidarə orqanlarına keçiriləcək seçkiləri
müşahidə etmək üçün ATƏT-in təxminən 200-ə yaxın əməkdaşı Gürcüstana ezam
olunub edib. Nümayəndə heyətinin rəhbəri Briqit Ayva bildirib ki, monitorinq
qrupu seçkidən bir gün sonra gürcü və dünya ictimaiyyətini öz qiymətləri ilə
tanış edəcək. Bununla yanaşı, artıq müxalifət partiyaları hakim "Gürcü arzusu”
koalisiyasını seçki kampaniyasını pozmaqda günahlandırıblar. "Azad və ədalətli
seçkilər naminə” komissiyanın seçkilərdən öncə sonuncu iclasında dövlət
qulluqçuları və siyasi partiya təmsilçilərinin törətdiyi pozuntuların
monitorinqinin nəticələrindən söhbət açılıb. 14 müxalif siyasi partiyanın
liderlər şurası hökuməti oktyabrın 21-i keçiriləcək seçkiləri saxtalaşdırmağa
hazırlaşmaqdaittiham edib. Dövlət büdcəsindən partiyalara ödənməli olan
pulların verilməməsi, inzibati resurslardan sui-istifadə, siyasi opponentlərin
sıxışdırılması və təqibi müxalifətin "Gürcü arzusu”na irəli sürdüyü iddiaların
az bir hissəsidir. Liderlər Şurası öz iradlarını beynəlxalq və yerli
müşahidəçilərə də təqdim edib. Parlamentdənkənar müxalifətin nümayəndələri
digər müxalifət partiyalarının da ünvanına tənqidlər səsləndiriblər. Keçmiş
hakim partiya olan "Vahid Milli Hərəkat” və ondan ayrılmış "Avropa Gürcüstanı”
partiyaları tənqidin əsas hədəfi olub. "Demokratik hərəkat – vahid Gürcüstan
naminə” partiyasının nümayəndəsi Nino Burcanadze həmin partiyaları iqtidarla sözləşməkdə
ittiham edib: "Biz görürük ki, iqtidar çox ciddi saxtalaşdırmaya hazırlaşır.
Biz "Gürcü arzusu” və cənab Bokeriyanın "Avropa Gürcüstanı” Partiyasının
tutduğu xüsusi mövqeyi görürük. Bu, şübhələrimizi artırır: Bidzina İvanişvili
öz hakimiyyət müddətini maksimum uzatmaq üçün satellit partiyalar və "Gürcü arzusu”ndan
yararlanmaq istəyir. Əminəm ki, onların arasında parlament seçkilərində
sövdələşmə olub. Sövdələşmə nəticəsində "Vahid Milli Hərəkat” partiyası
parçalanıb. Bu gün də sövdələşmə həyata keçirilir”, – deyib o qeyd edib. "Gürcü
arzusu” və "Avropa Gürcüstanı”nın nümayəndələri Burcanadzenin ittihamlarından
yayınıblar.
"Gürcü arzusu”nun Tbilisi
merliyinə namizədiKaxa Kaladzepartiyasının hakimiyyətini "Vahid
Milli Hərəkat”ın 9 illik hakimiyyəti ilə müqayisə edib: "2012-ci ilədək nə baş
verdiyi hamınızın yadındadır – çubuqla, süpürgə ilə döymə, işdən çıxarma,
şantaj. Bir də 2012-ci ildən sonra keçirilmiş bütün seçkilərlə bağlı beynəlxalq
təşkilatların verdiyi qiymətə baxın. Bu gün hər bir namizədin, siyasi
partiyanın azad və bərabərhüquqlu atmosferdə öz baxışlarını təqdim etmək haqqı
və imkanı var. Hər kəsin bərabərhüquqlu mühitdə seçki kampaniyası keçirməsinə
şərait yaradılıb”.
Qeyd edək ki, parlament seçkilərindən öncə, hətta uşaq bağçalarında
belə "Gürcü arzusu”nun namizədlərinin xeyrinə səslər səfərbər edilmişdi. Kvemo
Kartli vilayətinin Dmanisi rayonunda isə "işgüzar” dövlət məmurları yerli
kəndliləri "Quran”a əl basaraq həqiqətən də "Gürcü arzusuna” səs verəcəklərinə
and içməyə məcbur etmişdilər. Ancaq Kaladze qalmaqala səbəb olmuş bu hallara
münasibət bildirməyib.
"Azad və ədalətli seçki naminə” komissiyasının rəhbəri, ədliyyə
naziriTea Tsulukiani seçki qanunvericiliyinin bu və digər pozuntuları ilə
bağlı son bir ayda bir neçə dəfə danışmalı olub. O, dəfələrlə dövlət
qulluqçularının iş vaxtı siyasi təbliğat aparmasının yolverilməz olduğunu
xatırladıb. Sözügedən komissiya seçki qanunvericiliyinin dövlət qulluqçuları
tərəfindən pozulmasını əngəlləmək, belə pozuntulara reaksiya vermək məqsədilə
yaradılıb. Komissiya üç aylıq fəaliyyəti dövründə 7 tövsiyəylə çıxış edib. Onun
fəaliyyəti nəticəsində müxalifət təmsilçilərinə fiziki zorakılıq faktları üzrə
bir neçə cinayət işi açılıb.
Oktyabrın 19-da isə gecə saatlarında Marneuli rayonunda naməlum
şəxslər odlu silahdan atəş açaraq hakim partiyadan 4 nəfəri yaralayıb.
"Marneuli rayonunun Qızılhacılı kəndində, "Gürcü arzusu” partiyasının seçki
qərargahı yaxınlığındakı ərazidə naməlum şəxs avtomatdan açdığı atəşlə 4 nəfərə
xəsarət yetirib”, - deyə Gürcüstan Daxili İşlər Nazirliyinin rəsmi
açıqlamasında deyilir. Dünən səhər isə yayılan məlumatda bildirilir ki,
sağlamlığa qəsdən ağır xəsarət yetirmə maddəsi ilə cinayət işi başlayıb,
istintaq aparılır. DİN-in açıqlamasına əsasən, xəstəxanaya çatdırılmış
yaralıların həyatına təhlükə yoxdur. Gürcüstanın Kvemo-Kartli bölgəsinin
qubernator müavini Zaur Darğalı xəbəri BBC-yə təsdiq edib. Onun sözlərinə görə,
insident zamanı "Gürcü arzusu” Partiyasının Marneuli rayon bələdiyyə üzvlüyünə
Qızılhacılı kəndindən üzrə majoritar namizəd Ceyhun Çovdarov və daha üç şəxs
yaralanıb. Yaralılar Anar Məmişov, Vüqar Bayramov Azad Çobanov xəstəxanaya
yerləşdiriliblər və vəziyyətləri stabildir. Gürcüstanın daxili işlər naziri Georgi
Mqebrişvili və səhiyyə naziri hadisə yerinə gedib və vəziyyətlə maraqlanıblar. Hadisəni
törədənlər haqqında məlumat verilmir.
Bir faktı da qeyd edək ki, bu gün keçiriləcək seçkilər və onun nəticələri həm müxalifət, həm də
iqtidar üçün mühüm əhəmiyyət kəsb edir. İqtidar bu seçki ilə ona olan
münasibətin hansı səviyyədə olduğunu müəyyən edəcək - yəni bu, bir test
sınağıdır. Müxalifət, xüsusən də eks-prezident Mixail Saakaşvili tərəfdarları da
əhali arasındakı reytinqlərini müəyyən edəcəklər.
Azər NURİYEV