Dondurma alanda ehtiyatlı olun!
Yayın vazkeçilməz qidalarından biri də
dondurmadır. Bu gün marketlərdə istənilən qiymətdə və çeşiddə yüzlərlə dondurma məhsulu satılır. Lakin təəssüflər
olsun ki, daha çox uşaqların alıb yediyi bu qida məhsullularının heç də hamısı
keyfiyyətli deyil. Hətta onlardan insan orqanizmi üçün ciddi təhlükəli hesab
olunanlar da var. Belə ki, İqtisadiyyat Nazirliyi tərəfindən istehlak bazarının
qorunması məqsədilə aparılan tədbirlər çərçivəsində müxtəlif ticarət obyektlərində
satışda olan ərzaq məhsullarının ilkin laborator müayinəsi zamanı bir sıra
dondurmaların tərkibində insanların həyat və sağlamlığı üçün təhlükə yaradan
mikroorqanizmlərin normativ sənədlərlə yol verilən miqdardan artıq olduğu müəyyən
edilib. NazirlikdənTeleqaraf.com
-a verilən məlumata görə, mövcud pozuntuların daha çox istehsal mənşəli olduğu
nəzərə alınaraq, qanunvericiliyin tələblərinə uyğun olaraq, İqtisadiyyat və Səhiyyə
nazirliklərinin nümayəndələri tərəfindən dondurma istehsal edən bir sıra
sahibkarlıq subyektlərində birgə nəzarət tədbirləri həyata keçirilib və həmin
müəssisələrdə istehsal edilən və satış üçün nəzərdə tutulan məhsulların müayinəsi
üçün müəyyən olunmuş qaydada nümunələr götürülüb. İqtisadiyyat və Səhiyyə nazirlikləri bir daha
sahibkarlıq subyektlərinə ərzaq məhsullarının istehsalı prosesində normativ
texniki tələblərə, sanitariya norma və qaydalarına ciddi əməl edilməsini, məhsulların
keyfiyyət və təhlükəsizlik tələblərinə uyğun olmasını təmin etməyi tövsiyə
edir. Qanunvericiliyin tələblərinə əməl etməyən sahibkarlıq subyektləri barəsində
ciddi məsuliyyət tədbirləri görüləcək.
Bəs görəsən
keyfiyyətsiz dondurma istehsal edən müəssisələrin fəaliyyəti
dayandırılacaqmı? Ümumiyyətlə, keyfiyyətsiz dondurma insan orqanizminə hansı
fəsadlara yol aça bilər?
"Azad İstehlakçılar Birliyi”nin sədri Eyyub Hüseynov bildirdi ki, iki il öncə adı siyahıda
çəkilən dondurma müəssisələrindən birinin rəhbərinin həbs olunmasına baxmayaraq,
həmin dondurmalar satışda var idi: "Bu gün xeyli istehlakçı bu barədə öz
narahatlığını bildirir. Bununla bağlı xeyli telefon zəngi olur. İstehlakçılar
belə məhsulların niyə satışda olduğunu soruşurlar. Əslində təhlükəli mal
anlayışı partiyalı mal anlayışına aiddir. Yəni bu o demək deyil ki, onların
istehsal etdiyi bütün məhsullar təhlükəli vəziyyətdədir. Hazırda ölkədə
iyirmidən çox dondurma istehsalçısı var. Bu istehsalçıların arasında
keyfiyyətli dondurma istehsal edən müəssisələr də var. Məsələn, 2011-ci ildə
ABŞ-ın İnkişaf Agentliyi "İCE LAND” dondurmalarına qida təhlükəsizliyi nişanını
verdi. Bu müəssisədə ictimai nəzarət mexanizmi mövcuddur. Lakin bununla belə,
azad bazar iqtisadiyyatından sui-istifadə edən insanlar ölkədə təhlükəli
dondurma istehsalı ilə məşğul olurlar. Bəzən aparılan ekspertizanın
nəticələrindən də narazılıq olur. Ona görə də dövlət orqanları məhsulu
ekspertizaya götürmək üçün müəyyən standartların tələbinə əməl etməlidirlər.
Ekspertizaya gedən məhsul istehsalçı müəssisənin anbarında götürülməlidir.
Satışdan alınan, yaxud istehsalçı müəssisənin özünün verdiyi məhsulun
ekspertiza nəticəsinin heç bir hüquqi əsası yoxdur. Bütün bu problemlərin
əsasında isə "Qida təhlükəsizliyi haqqında” qanunun olmaması dayanır. Ölkə
prezidenti bu ilin fevral ayında Qida Təhlükəsizliyi Agentliyinin yaradılmasına
dair ayrıca fərman imzalayıb və hazırda bu sahədə ciddi iş gedir. Düşünürəm ki,
agentlik bu kimi problemlərə son qoyacaq”.
Həkim-terapevt Məlahət Abbasova deyir ki,
keyfiyyətli dondurmanın insan orqanizminə heç bir mənfi təsiri yoxdur. Əsas
odur ki, məhsulun tərkibindəki məhsullar təzə olsun: "Amma dondurmalar da öz
keyfiyyət tərkibinə görə digərlərindən fərqlənir. Məsələn, birinin qiyməti 20
qəpik, digəri isə 5 manatdır. Bu da məhsulun istehsal şəraitindən və tərkibindən
asılıdır. Keyfiyyətsiz yağlardan və süddən hazırlanan dondurmalar insan
orqanizmi üçün ciddi təhlükə mənbəyi hesab olunur. Dondurmanı daha çox
uşaqların sevdiyini və yediyini nəzərə alsaq, deyə bilərik ki, bu məhsul azyaşlılar
üçün ikiqat təhlükəlidir. Çünki uşaq orqanizmi böyüklərlə müqayisədə çox
həssasdır. Yay vaxtı yeyilən keyfiyyətsiz dondurmalar daha da təhlükəlidir.
Keyfiyyətsiz dondurma ilk növbədə insanın mədə-bağırsaq sistemini korlayır.
Daha sonra zərərli qidalar mədə-bağırsaqdan qana sorulur. Bu maddələr isə
qaraciyərin piylənməsinə və sıradan çıxarmasına səbəb olur. Uşaqlarda əqli
gerilik, zəiflik, immunitetin aşağı düşməsinə qədər gətirib çıxara bilir. Qeyd
etdiyim kimi, bədənin yayda immun sistemi daha zəif olur. Çünki yayda orqanizm
çoxlu maye itirir. Bədən maye itirdiyi zaman isə mikrobların inkişafı üçün əlverişli
şərait yaranır. Keyfiyyətsiz qida məhsulları orqanizmdə parazit mikroblarının
sayını artırır. Bu isə müxtəlif xəstəliklərin yaranmasına gətirib çıxara
bilir”.
Şəbnəm Mehdizadə