Avtobus sürücülərinin “açıq qapı” vərdişi
Cümə
günü axşam saatlarında 53 nömrəli
marşrut avtobusu Elmlər Akademiyası metrosunun qarşısındakı dayanacaqdan tərpəndikdən
sonra bir neçə dayanacaq qapısı açıq şəkildə getdi. Fövqəladə Hallar
Nazirliyinin yanına çatanda avtobusun qarşısına başqa bir avtomobil keçdiyi
üçün qəza təhlükəsi yarandı. Açıq qapının ağzında dayan şəxsin yerə düşməsi isə
an məsələsi idi. Lakin buna baxmayaraq, sürücü qapı açıq vəziyyətdə yoluna
davam etdi. Avtobus növbəti dayanacağa çatmamış Bakı Şəhər Dövlət Yol Polisi
İdarəsinin (DYP) əməkdaşı ilə qarşılaşdıq. Polis avtobusu saxlatmadan "qapını
bağla” dedi, amma təbii ki, onu dinləyən olmadı. "Qurd qapı”sı restoranının
yanında daha bir polis avtomobili ilə qarşılaşdıq. Onlar isə ümumiyyətlə,
qapını bağlamaqla bağlı göstəriş belə vermədilər. Düzdür, açıq qapıdan tutub
gedən sərnişin yox, konduktor idi. Konduktor dediyim şəxsin də 18 yaşı olar, ya
olmazdı. Bütün hallarda, söhbət insan həyatından gedir. Və həyatını bu kimi
problemlər ucbatından itirənlər də az deyil. Çox tez-tez "Avtobusun qapısı açıq
qaldı, sərnişin yıxılıb öldü, xəsarət aldı” kimi xəbərləri mətbuatda oxuyuruq.
Ötən ayın sonlarında da belə bir faciə baş verdi. Cavanşir Məmmədovun idarə
etdiyi "Daevoo" markalı 81 saylı xətt avtobusunun sərnişini, paytaxt
sakini Cümşüd Haqverdiyev hərəkətdə olan avtobusun açıq qapısından yıxılmışdı.
Xəstəxanaya yerləşdirilən C.Haqverdiyev dünyasını dəyişmişdi.
Bu tipli
xəbərlər artıq çoxdan bir siqnal olmalı idi. Həm sürücülər, həm sərnişinlər, həm
də nəzarət edənlər üçün. Amma bu faciələrə rəğmən, yenə əksini görürük. Bəs
problemin həll istiqamətində hansı işlər görülür? Bakı Nəqliyyat Agentliyi
(BNA) sürücülərin bu barədə məlumatlı, məsuliyyətli olması üçün hansı işləri
görür? Hansısa formada nəzarət aparırmı? Bir neçə gün öncə isə Bakı Şəhər Dövlət
Yol Polisi İdarəsi İctimaiyyətlə əlaqələr şöbəsinin rəisi Vaqif Əsədov mətbuata
açıqlamasında bildirmişdi ki, sərnişindaşıma qaydalarını pozub avtobusu qapısı
açıq şəkildə idarə edən sürücülərə qarşı sərt tədbirlər görüləcək. Maraqlıdır,
sərt tədbir deyəndə, konkret nə nəzərdə tutulur? Bəs bu kimi hallarda polis necə
reaksiya verməlidir?
BNA-nınictimaiyyətlə əlaqələr şöbəsinin
sektor müdiri Mais Ağayev "Kaspi”yə
açıqlamasında bildirdi ki, bu işdə ən əsas və böyük iş məhz yollarda hərəkətin
təhlükəsizliyinə nəzarət edən DYP-nin üzərinə düşür: "BNA olaraq biz mütəmadi
olaraq, bu cür hallarla bağlı məlumat əldə edən kimi marşrut xətti üzrə
daşıyıcıya xəbərdarlıq edirik. Daşıyıcı da öz növbəsində bu kimi hala yol verən
sürücüyə qarşı müəyyən tədbirlər görür. BNA-nın tapşırığına əsasən, mütəmadi
olaraq, istehsalat bazasında sürücülərlə maarifləndirici və təlimatlandırıcı tədbirlər
keçiririk. Lakin gördüyü kimi, bu işdə digər dövlət qurumları, eyni zamanda,
ictimaiyyət də fəal olmalıdır. Lakin avtobusun qapını açıq idarə etməsi yol hərəkəti
qaydalarının pozulmasıdır və buna nəzarəti də DYP etməlidir”.
DİGESTA hüquq firmasının direktoru, hüquqşünas
Ərşad Hüseynov bildirdi
ki, DYP əməkdaşı bu cür vəziyyətlərdə həmin nəqliyyat vasitəsini dayandırmalı,
imkan, şərait varsa, yerində protokol yazaraq, avtobusu qapısı açıq sürdüyünə
görə, sürücüyə 40 manat cərimə tətbiq etməlidir: "Yaxud, sürücüyə sonuncu
dayanacağa getməsini, gəlib cəriməsini orada yazacağını bildirməlidir. Qapısı
açıq vəziyyətdə istənilən avtomobili, o cümlədən, sərnişin avtobusunu idarə etmək
qadağandır və bu qayda pozuntusu üçün 40 manat cərimə nəzərdə tutulur”.
Ə.Hüseynov
deyir ki, polisin nəzarəti olmaqla yanaşı, sürücü, daşıyıcı şirkət və ya
sahibkar da məsuliyyətini anlamalıdır: "Qanunda qapısı açıq avtobus sürməyə
icazə verilmirsə, deməli, sürmək olmaz. Avtomobili idarə edən sürücüdür, o da hər
halda, psixikası, sağlamlığı qaydasında olan adamdır. İlk növbədə, sürücü buna
görə məsuliyyət daşımalıdır. Avtomobili qapısı açıq idarə edən zaman qəza baş
verərsə, sürücü cinayət məsuliyyətinə cəlb oluna bilər. Eyni zamanda, sürücü həm
də sahibkarın əməkdaşıdır. Sahibkar sürücünün bu kimi qanunsuzluqlara yol verməməyinə
nəzarət etməlidir”.
Bakı Şəhər Dövlət Yol Polisi İdarəsi İctimaiyyətlə əlaqələr
şöbəsinin rəisi Vaqif Əsədov bizimlə söhbətində
bildirdi ki, Yol Hərəkəti Haqqında Qanunda nəqliyyat vasitələrinin, xüsusilə sərnişindaşımada
iştirak edən avtobusların qapısı açıq şəkildə hərəkət edilməsinin inzibati xəta
tərkibi yaratması konkret olaraq göstərilir. Onun sözlərinə görə, DYP tərəfindən
bu barədə dəfələrlə təbliğat aparılıb, reydlər keçirilib, sürücülərin şüuruna təsir
edəcək dərəcədə xəbərdarlıq edilib, protokollar yazılıb.
V.Əsədov
deyir ki, polisin saxlayıb-saxlamamağından asılı olmayaraq, kameralar vasitəsilə
qanun pozuntusu qeydə alınır və lazım olan tədbirlər görülür: "Sürücülər
avtobusu qapısı açıq şəkildə adətən, yay aylarında idarə edirlər. Birincisi, əməkdaşlarımız
avtobusu saxlayıb, sürücüyə inzibati qaydada protokol tərtib etmək istəyərkən,
avtobusda olan bütün sərnişinlər müdaxilə edir. İkincisi, bunun həlli belədir
ki, düşəsən o avtobusun ardınca və sonuncu məntəqədə protokol yazırsan. Bu da çətinlik törədir.
Bunun da aradan qaldırılması üçün müasir texnologiyanın imkanlarından
yararlanırıq. Qapısı açıq vəziyyətdə hərəkə tedən avtobus, sürücüsü kamerada
göstərilir. Həmin sürücünün hərəkət trayektoriyası tərəfimizdən nəzarətə
götürülür və barəsində qapısı açıq vəziyyətdə sərnişindaşıma ilə məşğul olduğu
üçün tədbir görülməsi ilə bağlı mərkəzi məlumat sistemində informasiya yazılır.
Sonra avtobusun məxsus olduğu şirkətə, yaxud sahibkara informasiya verilir və
sürücü cəzalandırılır. İndiki qanunvericilikdə görülən tədbirlər bundan ibarətdir”.
Şöbə rəisi
deyir ki, qapısı açıq vəsiyyətdə sərnişindaşıma ilə məşğul olan sürücülər barəsində
yetərincə sərtləşdirici tədbirlər görülüb. O hesab edir ki, problemin kökündən
həlli üçün cərimələrin artırılması, cəzaların sərtləşdirilməsi çıxış yolu
deyil: "İlk olaraq, təbliğat işlərinin daha da gücləndirilməsinə ehtiyac var.
Yayda komfortlu avtobusların sayının çoxalması bu məsələnin həlli istiqamətində
bir addımdır. Bir neçə şirkətdən başqa, hansı avtobuslarda soyuducu sistemi
var? Mən qapısı açıq avtomobil idarə edənlərə haqq qazandırmıram. Birincisi,
normadan artıq sərnişin daşınmamalıdır, ikincisi Yol Hərəkəti Haqqında Qanunun
tələbləri üzrə hərəkət davam etdirilməlidir”.
Aygün Asimqızı