Nəfəsin əvvəli
Hərəkətin əvvəli işığın əvvəlidir. İşığın əvvəli nəfəsin əvvəlidir. Nəfəsin əvvəli isə
yoxdur. Bu yoxluq əslin özüdür ki, onun da əvvəli və ya sonu olmur. Yoxluğun
varlığı ehtiyacın hekayəsidir, varlığın yoxluğu isə həqiqətin. Hekayə isə
hekayədir. Yəni uydurmadır, təxəyyüldür. Düşüncə varlığı dərk etmək üçün deyil,
ondan yayınmaq üçündür. Zira, gerçək varlıq yoxluqdan ibarət olduğu üçün
düşüncənin onu təkrar emal edərək varlığa çevirməsi sadəcə bir subyektdir,
üstəlik fərdidir. Subyektin həqiqət olduğu isə, ideyaya çevrilən absurd
iddiadan başqa bir şey deyil. Dinlər də, dövlətlər də, ailələr də belə yarandı.
Ancaq bütün yaranmışlar fərdi prinsiplə yaradılmışdır. Camei düşüncə sonradan,
fərdlər tərəfindən icad edilmişdir. Əslində camei düşüncə, yəni bir mənada
ictimai şuur deyilən nəsnə mövcud deyil. Yəni o da bir uydurmadır. Kütləvilik
düşüncəsi fərdin yaradılışdan gələn gücünü və imkanını xeyli dərəcədə azaldır.
Doğrusu budur ki, düşüncənin motivi gerçəyin əslinə, yəni yox kimi görünən
varlığa uzanmaqdır. Bu uzantının sərhəddi, eləcə də zamanla və məkanla
şərtlənən məhdudiyyəti yoxdur.
İdeya baxımından Dünya həyatı postfəlakət dövrüdür. Yəni bu həyat qurtuluşa
doğru gedir. Əgər gedirsə, deməli, hələ ona yetişməyib. Bütün dinlər Dünya
həyatını ona görə fani və keçici hesab edir ki, bu həyatın yaranma səbəbi məlum
əfsanə və hekayələrdən gələn yanlış ucbatından törəmişdir. İlk yanlış son
doğruya gedən yolu açmışdır. Ya həmin yanlışdan əvvəlki, ya da bu yolun
sonundakı cənnətlər məqbul həqiqət sayılır. Fəlakətlə başlayıb, fəlakətlə bitən
bu ara stansiyanın adı isə Dünya həyatı adlanır. İstisnasız olaraq, bütün
inanclar həyatın, necə deyərlər, "dadını-duzunu" qaçırdaraq, başqa
bir həyat vəd edir. Yanlışla başlayıb, doğruyla bitən bu Dünya kainatda hansı
yerə sahibdir, onun ömrü nisbidir, yoxsa mütləq? Kimsə bilmir...
Bilinən isə, mümkün olandır. Mümkün olmayan heç nə bilgi hesab edilmir. O heç
təsəvvür də deyil. Çünki təsəvvürün özü də bir bilgidir. Mümkün olmayanın
bilinməzliyi mümkün bilgiyə tabedir. Əslində mümkün olmayan şey bilinməzlik
belə sayılmır. Çünki, bilinməzlik də bir təsəvvür, təsəvvür də bir bilgidir.
Bilinməzlik başlanğıcdır, yəni xəbərdir. Bir mənada isə mənbədir. Deməli
buradakı tərs mütənasiblik ondan ibarətdir ki, mümkün olan şey bilgiyə sığır,
ancaq mümkün olmayan şey bilgisizliyə belə sığmır. Mümkün mövcud olandır. Qədim
filosoflar isə, mümkünü qeyri-mümkündən əvvəl, vacibdən isə sonraya
yerləşdirmişlər. Bu, hətfi məntiqlə belədir. Ancaq qeyri-xətti hərəkət bunun
əksini deyir. Burada vacibin əslində bir iddia olduğu ortaya çıxır. Məsələn,
əgər Tanrı vacibdirsə, o zaman niyə qeyri-mümkün bilgisizliklə düz
mütənasibdir? Məgər idrak nisbi deyil? Yox əgər Tanrının dərki müəyyən qədər
əlçatandırsa, yəni mümkün kateqoriyasına girirsə, o zaman niyə mümkün deyil,
vacib hesab edilir? Axı vacib o şeydir ki, onu bizim idrakımız bütünüylə
mənimsəmiş olsun. Belə çıxır ki, qədim filosofların hamısı ateist olub? Yeni
dövr materialist fəlsəfənin başladığı dövrə qədərki fəlsəfi traktatlara nəzər
salsaq görərik ki, o müəlliflərin ən az bəhs etdikləri subyekt Tanrının özüdür.
Fəlsəfə Tanrıdan qaçır! Yeni dövr filosofları isə, dedilər yox, əksinə, Tanrı
fəlsəfədən qaçır! Əslində Tanrıdan da, fəlsəfədən də qaçan insan özüdür! Daha
doğrusu, insan idrakının yetərsizliyi!
Bunun səbəbi isə, idrakın kütləviliyidir. Filosoflar anlamaq istəmirlər ki,
müəllim onlar deyil, təbiətin özüdür. Bu təbiətin böyük bir hissəsi isə,
insanın öz vücududur. Yəni, söhbət bəsit mənada təbiətdən, yəni dolayısı ilə
Tanrının yaratdığı mükəmməllikdən yox, onun təbii axarından və qüsursuz
müəllimliyindən gedir. Tanrının dərsləri fərdidir, kollektiv deyil. Çünki
"tələbə" sözünün kökündəki tələblərin özü fərdidir. Zira yaradılışın
gərəyi budur.
İstəklərin kökü olmaz. Onlar anidən və hər zaman güncəllənən zərurətdən
yaranır. "Anidən" demək andan deməkdir. Anın tələbi keçmişə və
gələcəyə qaynaq edilə bilməz. Zamanı istənilən yerdən duyunləyib boxçalara
yığmaq olmaz. Axı nə üçün insanın vücudu fiziki təbiiliklə yol gedir, ancaq
onun idrakı bu gedişatın içərisində yer almır?! Axı ölən və yaranan hüceyrələrlə
birlikdə idrak da eyni prosesi keçir. Halbuki zamana tabe olmamaq sadəcə mümkün
deyil. Qocalan və ölən təkcə bədən deyil.
Nəfəsin əvvəlini görmək və dərk etmək nə qədər
qeyri-mümkündürsə, ona yetişmək, ona toxunmaq bir o qədər mümkündür. Çünki
idrak elə şeydir ki, bir gün mütləq özündən çıxacaq və iddialarda bulunacaq.
Ancaq toxunmaq yaşantıdır və onun zatında paylaşmaq istəksizliyi vardır. Məlumdur
ki, idrak heç bir yol getmir. Yoxsa, təkrar bu qədər yolu qayıdıb, hər kəsi
özüylə oralara aparmaq istəyi haradan doğa bilər? Özünü inkar özünü təsdiqdən
daha şərəfli bir şey olduğu üçün, biz də bəyan edirik ki, mümkün olan şey dərk
edilən deyil, toxunulan, yaşanılan, hiss edilən şeydir. Bu mənzərə eşqin və gözəlliyin
oyununa çox bənzəyir. Belə ki, gözəlliyin subyekti haqqında hər kəs danışır, hər
kəs onu vəsf edir, təkcə bir nəfərdən -- ona toxunub, onu əldə edəndən başqa!
Danışanlar dərk edənlər, susanlar isə, hiss edənlərdir. Qəribə və paradoksal
bir məntiq çıxır ortaya -- dərk etmə hiss orqanlarına daxil deyil. İdrak hissləri
emal edir. Yəni dərk edilən şey həqiqət deyil. Məsələn, yad bir dildə əzbərlənən
dualar dilsiz bir şəkildə axan iki damla göz yaşının yanında sadəcə bir
yalandan ibarətdir!
İradə onun sahibinə iki şəkildə lazımdır -- ya əqli,
ya da hissi. Tanrı hissdir, din ağıl. Deməli, din Tanrının emal edilmiş şəklidir.
Hisslə ağıl biri digərinin ölümüylə ortaya çıxdığı üçün, Tanrını öldürmədən din
yaratmaq mümkün deyil.
Duanın gücü çarəsizliyin dərəcəsiylə ölçülür. Tanrıdan ümid kəsildikcə,
Ona olan ümidlər daha da artır. O uzaqlaşdıqca yaxınlaşır, yox olduqca daha çox
var olur. Hər şey, hər şeyin zərrəsi, hər nəsnənin özü və parçacıqlarının
hamısı tək-tək, müstəqil zamanı və azad məkanı olan əlaqəyə malikdir Tanrıyla!
"Tanrısız" bir Tanrıya hər şeydən çox ehtiyac vardır! Bizim kimsəsizliyimiz
və çarəsizliyimiz Onu daha da böyüdür. Zatən Tanrını yaradan da elə kimsəsizliyimiz
və çarəsizliyimiz olmuşdur. Onun varlığı ayrı şeydir, Onu dərk etmək ayrı
şeydir, Onu hiss etmək tamamilə ayrı şey. İdrak da, hiss də bizə məxsusdur. Yəni
Onun varlığıyla heç bir əlaqəsi yoxdur. Bizim hissimizin və əqlimizin yaratdığı
Tanrı göylərdəki yox, bizim içimizdəki Tanrıdır. Onun hissi və əqli yolla təsdiqi
yoxluğun varlığa dönüşməsidir. Bu dönüşüm isə, mütləq şəkildə fərdidir. Tək
Tanrı fikrini spekulyasiya etməklə, hər kəs tək bir din yaratmaq istəyib. Əvəzində
isə, bir Tanrının minlərlə dini yaranıb. Niyə? Çünki, şuur və hiss fərdiliyi
buraxıb, ictimailəşmək istəyib. Fərdilik sonsuz bir kainatdır. İctimailəşmək isə
nöqtə boyda bir Dünyadır. Bu nöqtənin özünü saysız nöqtələrə böldülər. Məntiq
isə, böyük bir şeyin, yalnız bölünərək kiçilə bildiyinə işarə edir. Yəni, böyük
Tanrını çox kiçkk hissələrə böldülər. İndi isə, bu hissələri bir araya gətirib,
böyük Tanrını "bərpa etmək" istəyirlər. Lakin bu mümkün deyil. Çünki
bölünmənin fiziki göstəricisi ziddiyyətin mövcudluğudur. Yəni bölünmə ziddiyyətdən
qidalanır. Ziddiyyət isə, hər parçanı bir bütövə çevirir. Hər kəs özünü tam və
bütöv zənn edir. Halbuki, tanrının sayı insanın sayını çoxdan ötüb keçib!
İnsanın iki nəfəsi vardır. Bunlardan biri təbii,
digəri iradi nəfəsdir. Bu fikri "heyvani və Rəbbani nəfəs" şəklində də
ifadə etmək olar. Buradakı "heyvani"lik ərəbcədəki "həyy" yəni
həyat kəlməsindəndir. Buna görə onun ilk adına "təbii nəfəs" dedik. Rəbbani
nəfəs isə, iradidir və nə qədər absurd görünsə də hərfi mənada insanın yox,
Allahın nəfəsidir. Məsələn, heyvanlar heç bir zaman ah çəkmir. Hər zaman nəfəs
alır. Lakin insanlar bilsəydi ki, onların çəkdiyi hər ah əslində bir duadır,
heç nəfəs almaz, ancaq ah çəkərdilər! Bunlar qəti şəkildə obrazlı, şairanə ifadələr
deyil. Dərindən ah çəkən insana el arasında "ahın dağlara" yox,
"ahın Tanrıya!" desəydilər, daha düzgün və məntiqli olardı. Çünki hər
ahın ünvanı gerçəkdən də Tanrıdan başqası deyil. "Dərindən nəfəs
almaq" ifadəsi isə təkcə ağ ciyərlə, diafraqmayla-filan bağlı deyil. Dərindən
nəfəs almaq həm də dərinlərə getmək, o nəfəsi dərinlərdən alıb gətirməkdir. Çəkilən
ahların hamısı ağrılı olur. Əgər bir gün bu ağrı bitərsə, deməli ahlar da bitmiş,
dolayısı ilə Tanrı da bitmişdir. Çünki Dünya həqiqətən qəmxanədir. Burada kimsə
muradına yetməz. Əksinə, biz nə muradlar itirdik bu Dünyada!
Yunus, burda gələn gülməz,
Kişi muradına erməz,
Bu fanidə kimsə qalmaz,
Dərdim vardır inlərim...
Bir-birini sürtən iki ağacın iniltisi əslində həyatın
səsidir.
Mən bu dağın ağacıyam,
Nə tatlıyam, nə acıyam,..
Mən Mövlaya duaçıyam,
Dərdim vardır inlərim...
Postfəlakətin iç üzündə Mövlanın nəfəsi
vardır ki, çəkilən hər ah insanın Tanrıya qovuşdurur. Bu tiryək deyil, ağrıkəsici
və müalicəvi dərman da deyil. Bu sadəcə duadır. Duanın başqa adı, başqa nisbəti
yoxdur. Dua ağlın və çarənin bitdiyi yerdə başlayır. Tanrını çox sevənlər buna
görə özlərinə dərd arzulamışlar. Çünki Onun qoxusunu ancaq və ancaq dərddən
almaq olar. Onun üzü dərd, hicabı sevincdir. Gerçəyi vəhdət, yalanı ümiddir.
Varlığı an, yoxluğu keçmiş və gələcəkdir. Onun sifətləri və adları çoxaldıqca üzündəki
hicab daha da qalınlaşır. Onu hər dərk etmək istəyi bizi Ondan ayıran növbəti
addımdır. Axan hər damla göz yaşı isə Ona doğru axan çayın suyuna su qataraq,
bu axını daha da sürətləndirir. Bizi Ona, Onu bizə gətirir.
Vəhdətin bir ucu qovuşmaqdırsa, digər ucu
ayrılıqdır. Ayrılıq iradi deyil. Biz istəsək də, istəməsək də bu Dünyadan, onun
sevincindən, onun umidlərindən ayrılırıq. Lakin vəhdət iradidir. Çünki hər
ayrılıq vəhdətə götürməz. Ayrılıq sadəcə, hər kəsin dəyərləndirə bilmədiyi bir
fürsətdir. Bu fürsəti qaçıranların, yəni vəhdətin mövcudluğundan bixəbər olan
çoxluğun taleyi isə çox-çox acıdır. Bir də israr edirik - Dünyadan qopmaq
Tanrıya qovuşmaq deyil -- söhbət ölümdən yox, həyatdan, həyatda ikən Dünyadan
qopmaqdan gedir. Elə Tanrıya da yalnız həyatda ikən qovuşmaq mümkündür. Ölümdən
sonrakı həyat isə, əfsanə də olsa, həqiqət də olsa, onun haqqında bilinən tək
bir şey var -- orada iradə mövcud deyil. Ölülər ağlamaz... Əgər o tərəfdə bir qətrə
göz yaşı olsaydı, cəhənnəmlərin alovu sönərdi! Lakin əfsus,.. ağlamaq şansı
yalnız bu Dünyadadır. Bu fürsət həyatda ikən əlimizdədir. Bu qısa həzzdən, bu
insafsızca kiçik ləzzətdən özümüzü məhrum buraxmayaq!
Bir yaralı ahın gücü, bir qətrə göz yaşının
hökmü çox ağırdır! Çarəsizliyin bərəkəti tükənməzdir! Kimsəsizliyin ömrü çox
uzundur! Ürək döyüntülərinin səmtini dəyişə bilmək nə böyük səadətdir!
Çırpıntıları zikrə çevirmək nə böyük ariflikdir! Yaşamaq, hər atəşə yanıb, hər
dəmə bişməkmiş! Göz yaşı axtıqca qəm tarlası bar verər və bu mənasız həyat məna
qazanar!
Tanrı nə qədər böyük olsa da, o qədər yaxındır.
Ona götürən dərdlərin çeşidi olmaz. Bütün dərdlər Ona doğru aparır insan
oğlunu! Alimin dərdiylə caninin dərdi birdir, çünki hər ikisinin bəhrəsi tərtəmiz,
dumduru göz yaşıdır.
Heç bir ah, heç bir göz yaşı sevinc dolu nəticə
vəd etmir. Çünki ah da, göz yaşı da özü bir nəticədir. Həm də sevinc dolu nəticə!
Ariflər deyərdilər, duadan cavab gözləmə, çünki, etdiyin dua sənə gələn ən müsbət
cavabdır.
Mənasız və xaotik görünə bilər. Ancaq ən başda
da yazdıq ki, Tanrı fərdlərin müəllimidir, icmaların deyil. Öz qəlbinin
acısından dərs alan hər kəs bu məktəbi keçir. Bir qəlbin acısını başqa qəlbə
daddırmaq olmaz. Fərəhin, sevincin isə dadı, dolayısı ilə müəllimliyi olmaz. Yəqin
elə buna görə hələ də dərvişlər görüşəndə bir-birlərinin qulağına bu sözləri
pıçıldayırlar: "Allah dərdini artırsın!"
Fəxrəddin Salim