Naqif Həmzəyev Gəncədə sosial evləri tikilməsini yenidən gündəmə gətirdi
"Ölkə
Prezidenti İlham Əliyevin göstəriş və sərəncamından sonra Azərbaycanda sosial mənzillərin
tikintisinə başlanıldı. Bir neçə ildir ki, sosial mənzillər Bakı şəhərində
tikilir. 2017-ci ildən etbarən Gəncə şəhərində də sosial mənzillərin tikilməsi
üçün yerlər ayrıldı”.
Bu barədə millət vəkili, YAP Gəncə Şəhər
Təşkilatının sədri Naqif Həmzəyev Milli
Məclisin komitələrinin birgə iclasında 2020-ci ilin dövlət
büdcəsi ilə bağlı müzakirələr zamanı bildirib.
Bu günə
qədər Gəncə şəhərində sosial mənzillərin tikintisinin həyata keçirilmədiyini təəssüflə
bildirən Naqif Həmzəyev Gəncə şəhərində sosial mənzillərin tikilməsinin Gəncə və
ətraf bölgələrdə yaşayan gənc ailələrin sosial evlərlə təminatı məsələsinə müsbət
təsir göstərəcəyini qeyd edib. Onun
fikrincə, belə olduğu təqdirdə gənc ailələr
Bakı şəhərinə üz tutmazlar.
Deputat Naqif
Həmzəyev sovetlər dövründə tikilən, bu günə qədər təmir edilməyən
Səhiyyə Nazirliyinin balansında olan Gəncə Körpələr evinə vəsaitin ayrılmasını da gündəmə
gətirib: "Burada valideyn himayəsindən kənarda qalan 3 yaşına qədər
uşaqlar saxlanılır. 3 yaşından sonra onlar digər müəssisələrə göndərilir. Bu
yaxınlarda Gəncə Körpələr evini yenidən ziyarət etdim. Doğrusu orada vəziyyət o
qədər ürəkaçan deyil, təminat da zəifdir. Azərbaycanın Birinci vitse-prezidenti Mehriban Əliyevanın
diqqəti, qayğısı
və dəstəyi ilə bu kateqoriyadan olan müəssisələr təmir edilir. Gəncə şəhər Körpələr
Evi diqqətdən kənarda qalıb. 2020-ci ildə bu müəssisə nəzarətə götürülərsə,
bina təmir edilərsə bizim də ürəyimiz rahat olar”.