Gəlin bu zəfəri virusa qalib gəlməklə taclandıraq...
"Sağlamlığımızın qeydinə
qalmalıyıq ki, indiki vaxtda dövlətə əlavə yük olmayaq”
Hazırda xalq olaraq hər birimizin ürəyi Qarabağda döyünür. Hamımız
müharibəyə köklənib qələbə xəbərləri ilə fərəhlənirik. Ordumuzun Qarabağdakı
işğalçılara qarşı zəfərləri yanımızdakı düşməni - koronavirusu unutdurub.
Nəzərə almalıyıq ki, biz dünya ölkələrindən fərqli olaraq iki cəbhədə müharibə
aparırıq. COVİD-19 virusu da erməni virusu qədər təhlükəlidir və bizi arxamızdan
vurmağa çalışır. Virusu görməzdən gəlmək, məsuliyyətsizlik yoluxma sayını
artıra bilər. Xüsusilə, ikinci dalğanın gözlənildiyi bir vaxtda gigiyena
qaydalarına əməl etməmək sağlamlığımızı ciddi təhlükə altında qoyur. Rəşadətli
ordumuzu dəstəkləyərək ölkəmizin yanında olmaq üçün koronavirusu da gözardı
etməməli, bu düşmənə də cəbhədəki ordumuz kimi layiqli cavab verməliyik.
"Ön cəbhədə qalib
ordumuza Covid-19 cəbhəsində mübarizə
ilə dəstək olmalıyıq”
Koronavirusla mübarizədə könüllü şəkildə aylarla işləyən həkim Reyhan Tağıyeva deyir ki,
insanlar qələbəyə o qədər kökləniblər ki, karantin dövrünü, demək olar ki,
unudublar. Həkimin sözlərinə görə, xalq olaraq vətən üçün ölümə o qədər
foksulanmışıq ki, virusdan ölmək bizi qorxutmur: "Bəli, insanlar, həqiqətən
cəbhədəki düşmənlə vuruşarkən, o qələbə sevinci ilə yanımızdakı düşmən olan
koronavirusu unudurlar. İnsanlara, cəbhədə şəhidlik zirvəsinə ucalanlarla
müqayisədə gündəlik bir neçə nəfərin koronavirusdan ölməsi adi gəlir. Amma indi
vəziyyət çox ciddidir. Bəli, biz cəbhəyə fokuslanmışıq, amma öz sağlamlığımızın
da qeydinə qalmalıyıq ki, indiki vaxtda dövlətə əlavə yük olmayaq. Biz sağlam
qalmaqla əsgərlərimizə kömək edirik. Çünki hazırda həkimlərimiz könüllü şəkildə
cəbhəyə yollanır, yaxud buradakı xəstəxanalarda yaralı əsgərləri müalicə
edirlər. Ölkədə Vətən Müharibəsi gedir. Koronavirusa yoluxub xəstəxanadakı
çarpayıları zəbt etməklə yaralı əsgərlərimizə, dövlətimizə dəstək olmuruq.
Hazırkı durumda tibb personalını məşğul etməməliyik. Virusun yayılması xəstəxanalarda
çarpayıların tutulması, həkim və orta tibb personal ehtiyatını məşğul etmək
deməkdir. Bu mübarizədə hər kəs öz məsuliyyətini dərk etməli, özünü
qorumalıdır. Bununla, artıqlaması ilə əsgərlərimizə kömək etmiş oluruq.
Müharibə dövründə ölkəmizdə bir də pandemiyanın vüsət almasına şərait
yaratmamalıyıq. Ön cəbhədə qalib ordumuza Covid-19 cəbhəsində də mübarizə ilə
dəstək olmalıyıq”.
"Güc birlikdədir”
Həkim deyir ki, insanlar qoyulan tələblərə düzgün riayət edib, sosial
məsafəni gözləyib, tibbi maskalardan istifadə etsələr, həkimlərin də işi yüngül
olar, ən əsası, payız, qış aylarında respirator virus infeksiyalarının
yayılmasının qarşısı alınar: "Burada iş, tək həkimin, dövlətin, insanların
üzərinə düşmür. İş birlikdə, uzlaşmış şəkildə olmalıdır. İnsanları səbirli
olmağa, qaydalara əməl etməyə çağırıram. Güc birlikdədir. Birlikdə bu virusun
qarşısını almağa çalışmalıyıq. İlk növbədə düzgün qidalanma və yuxu rejimi
immunitetin artırılmasında rol oynayır. Bununla yanaşı, gigiyena qaydalarına
riayət edərək, fiziki məsafəni qoruyub, maskadan istifadə etməklə sığortalana
bilərik. Qalibiyyətimizi sağlam bədənlə qeyd edək”.
İkinci dalğa gözlənilirmi?
Bəzi ölkələrdə artıq koronavirusun ikinci dalğası başlayıb.
Pandemiyanın payız aylarında aktivləşəcəyi ilə əlaqədar proqnozlar bəzi
ölkələrdə öz təsdiqini tapır. ABŞ, Gürcüstan, Türkiyə, İtaliya, İspaniya,
Estoniya, Ermənistan, Kanada və Hindistanda hələ də güclü olan epidemiya ilə
mübarizə davam edir. Hətta bəziləri virusun yayılmasına nəzarət etsələr də, "ikinci
dalğa” ilə üzləşiblər. Bir sözlə, yay mövsümündə yoluxma sayının azaldığı
ölkələrdə yenidən aktivləşmə qeydə
alınıb. Azərbaycanda da avqusta nisbətən yoluxma sayında artım var. Rəqəmlərin
azalma və artma dinamikası tez-tez dəyişir.
"Epidemiologiya, yoluxma
sayı bir nəfərə qədər aşağı düşsə belə, öz aktuallığını itirmir”
Tibb elmləri doktoru Rəşad
Mahmudov deyir ki, ötən aylarla müqayisə aparsaq, Azərbaycanda pandemiya ilə
mübarizədə uğur qazandığımızı demək olar: "Yoluxma və sağalma arasında olan nisbət
dəyişiklikdə, dediklərimiz öz əksini tapır. Əlbəttə, bu halı səhiyyə işçiləri
və müəssisələri üçün rahat nəfəs almağa, gözlənilən növbəti dalğaya qarşı həm
fiziki, həm mənəvi, həm də psixoloji olaraq hazırlanmaq üçün imkan kimi də
qiymətləndirmək olar. Sözsüz ki, sərt karantin rejiminin insanlar üzərində
yaratdığı psixoloji, iqtisadi problemlər də karantin rejiminin yumşaldılması
ilə vətəndaşları müəyyən dərəcədə rahatlaşdırır. Amma nəzərinizə bir həqiqəti
çatdırım, bunun Azərbaycan və ya bölgə səhiyyəsi ilə hər hansı bir əlaqəsi
yoxdur. Epidemioloji vəziyyətin dünya tarixinə və tibb elminə diktə etdiyi
reallıqlardır. Bunlar nədir? Epidemiologiya, yoluxma sayı bir nəfərə qədər
aşağı düşsə belə, öz aktuallığını itirmir, saxlayır. Və heç kimin gözləmədiyi
məqamda nəzarətdən çıxaraq indiyə qədər qarşılaşdığımız durumdan qat-qat ağır
vəziyyət yarada bilir. Belə hallar dünya nümunələrində var”.
"Sağlam bədəndə sağlam ruh olar”
Sosioloq Lalə Mehralı deyir ki,
cəbhədəki vəziyyət bu qədər alovlanmışkən insanların ən son düşünəcəyi məqam
koronavirus oldu: "Bu, bir qədər təəssüf doğurur, çünki yoluxma sayı azalmayıb.
Xəstəlik hələ də təhlükəlidir. Ona görə də diqqətli olmaqda fayda var. Xüsusilə,
məktəblilərdə yoluxma hallarının gündəmə gəlməsi, əksəriyyət kimi, məni də
narahat edir. Düzdür, ölkə olaraq ağır günlər yaşayır, xalq olaraq ağır bir
imtahandan keçirik. Amma düşünməliyik ki, biz xalq olaraq həm də
sağlamlığımızın qeydinə qalmalıyıq ki, cəbhədə şücaət göstərə bilək. Xəstə,
pessimist xalq nəyəsə nail ola bilməz. Odur ki, sağlamlığımıza diqqət
etməliyik. Xüsusilə, ictimai yerlərdə son vaxtlar müşahidə etmişəm ki, nəzarət
nisbətən yumşalıb deyə, insanlar özləri də çalışırlar maskadan istifadə
etməsinlər, hətta bir-biri ilə öpüşənləri müşahidə edirəm. Maksimum diqqətli
olmaq lazımdır. Biz bilirdik ki, "ikinci dalğa” olacaq. Odur ki, mütləq qaydada
gigiyenaya diqqət etməli, uşaqları, yaşlıları qorumalıyıq. Xəstəliklə mübarizə
insanın qalibiyyət əzmini aşağı endirir. Odur ki, sağlam olmaq lazımdır. Sağlam
bədəndə sağlam ruh olar”.
Çox ağır payız və qışın
olmaması üçün...
Tibbi ekspertlər fikrincə, artıq sentyabr ayından bir çox ölkələrdə
koronavirusa yoluxanların sayında kəskin artım qeydə alınıb. Bunların böyük
qismi daha erkən vaxtlarda yumşalmalara gedən ölkələrdir. Bir müddət əvvəl
nümunə göstərilən həmin ölkələrdə indi vəziyyət heç də ürəkaçan deyil. Buna
misal olaraq "Gürcüstan modeli”ni göstərmək olar. Artıq qonşu Gürcüstanda
pandemiyanın ikinci dalğası elan olunub. Baş Nazir Qeorge Qaxariya bildirib ki,
ölkədə epidemioloji vəziyyət pisləşməyə başlayıb. Təkcə bizim regionda və ya
Yaxın Şərqdə deyil, Avropanın mərkəzindəki inkişaf etmiş ölkələrdə də virusla
mübarizədə ortaya normal nəticə qoymalarına baxmayaraq, sonradan gedilən
yumşalmalar yoluxma sayını birə-beş artırıb. Məlumat üçün bildirək ki, avqustun
sonunda Avstriyada gündə 350 nəfər virusa yoluxduğu halda, sentyabrda bu rəqəm
850-yə çatıb. Kanslerin xalqa müraciəti və xəbərdarlığı isə ürəkaçan deyil:
"Bizi çox ağır payız və qış gözləyir”.
Bizi də ağır payız və qışın gözləməməsi üçün bu virusla mübarizə
aparmalıyıq. İndiki halda daha məsuliyyətli olmalı, qaydalara tam ciddi riayət
etməliyik ki, gözəgörünməz düşməni də məğlub edib, dövlətimizə yük olmayaq.
İstər ön cəbhədə, istərsə də arxa cəbhədə sağlam bədəndə sağlam ruhla döyüşək,
qalib gələk. Qarabağ Azərbaycandır... Gəlin 30 illik həsrətini çəkdiyimiz bu
zəfəri virusa qalib gələrək taclandıraq...
Aygün ƏZİZ