Bu müxalifətə görə utanırıq - Video
Prezidentin İctimai-siyasi
məsələlər üzrə köməkçisi, professor Əli Həsənov oktyabrın 6-da Azərbaycan
Televiziyasında (AzTV) yayımlanan "Həftə” verilişinin qonağı olub. O, Azərbaycan
Prezidenti İlham Əliyevin Rusiyanın Soçi şəhərinə səfəri, səfər çərçivəsində
keçirdiyi görüşlər, "Valday” Beynəlxalq Diskussiya Klubunun XVI illik iclasının
plenar sessiyasında səsləndirdiyi bəyanat, xarici siyasətimizdə
milli-dövlətçilik maraqlarının müdafiəsi və sair istiqamətdə sualları
cavablandırıb.
Xarici
siyasəti qurmaq üçün dövlətin lideri olmalıdır
Ə.Həsənov deyib ki, dövlət
başçısı İlham Əliyev yürütdüyü siyasəti açıq və aydın dərk edən liderdir. Onun
sözlərinə görə, Azərbaycan dövlətinin yürütdüyü siyasətin təməlində ölkəmizin
iqtisadi, siyasi, sosial, təhlükəsizlik maraqları dayanır: "Dövlətin maraqları
təsnifatlandırılanda, qruplaşdırılanda əsasən dövlətin təhlükəsizlik maraqları,
dövlətin özünü daxildən və xaricdən qaynaqlanan təhlükələrdən qoruması nəzərdə
tutulur. Dövlət özünün bütövlüyünü, tamlığını və sərhədləri çərçivəsində
suverenliyini qorumalıdır. Dövlət özünün iqtisadi maraqlarını qorumalıdır,
əhalisinin firavan həyatının təmin olunması üçün xarici aləmlə, o cümlədən
daxildə yürütdüyü siyasətdə sosial maraqları təmin etməlidir. Prezident İlham
Əliyev deyəndə ki, bizim xarici siyasət milli maraqlarımıza söykənir, məhz
Azərbaycan dövlətinin və xalqının bütün maraqlarını ifadə edir. Misal üçün,
işğalçı Ermənistanla müqayisə aparsaq görərik ki, bu ölkənin dövlət olaraq maraqlar
sistemi yoxdur. Bu sistemin olması üçün maraqları təmin etməyi bacarmalısan.
Ermənistan xarici aləmdən tamamilə asılı dövlətdir. Bu dövlət ya diaspordan dilənçilik
yolu ilə yığılmış vəsaitdən, ya da ayrı-ayrı dövlətlərin öz maraqları naminə
Ermənistana yönəltdiyi pullardan asılıdır. Ermənistanın hazırda bütün dəmiryol,
enerji, sənaye sistemləri erməni xalqına və dövlətinə məxsus deyil. Həmin
sistemlər xarici dövlətlər və iş adamları tərəfindən özəlləşdirilibdir. Sadəcə,
həmin müəssisələr Ermənistan ərazisindədir. Ermənistanın vahid xarici siyasəti
də yoxdur. Çünki, bu xarici siyasəti qurmaq üçün dövlətin əzmi, iradəsi,
imkanları, xüsusən də lideri olmalıdır”.
Azərbaycan
dövləti və xalqı üçün qürur mənbəyi
Prezident İlham Əliyevin
Soçidə keçirilən "Valday” Beynəlxalq Diskussiya Klubunun sessiyasında
səsləndirdiyi fikirlərə toxunan professor Ə.Həsənov bildirib ki, dövlət başçısı
iki müstəvidə Azərbaycanın milli-dövlətçilik maraqlarını ifadə edib: "Dünyanın
40-dan artıq ölkəsini, analitik mərkəzlərini, alimlərini, ziyalılarını təmsil
edən "Valday” klubu böyük nüfuza malikdir. Ölkə rəhbəri burada çıxış edərkən Azərbaycanın
milli maraqlarını, xüsusən Ermənistan-Azərbaycan, Dağlıq Qarabağ münaqişəsi ilə
bağlı dövlətimizin mövqeyini olduqca konkret, aydın, prinsipial şəkildə ifadə
elədi. Prezident İlham Əliyev "Valday” klubunun sessiyasında iştirak edən
dövlət və hökumət başçıları qarşısında "Qarabağ Azərbaycandır və nida işarəsi”
söyləməklə, bu məsələdə özünün prinsipial mövqeyini bir daha ortaya qoydu.
İkinci müstəvi Rusiya-Azərbaycan münasibətləridir. İki ölkə başçısının görüşü
zamanı onların əhval-ruhiyyəsinə, oradakı mühitə baxsaq, ortadakı
bərabərhüquqluluq dərhal hiss olunurdu. Bundan bir neçə gün əvvəl Avrasiya
İqtisadi İttifaqının İrəvanda keçirilən sammiti zamanı Ermənistan baş naziri
ilə Rusiya prezidentinin formal görüşünü xatırlayıb iki müstəqil ölkənin
liderlərinin - prezidentlər İlham Əliyev və Vladimir Putinin son yüksək
atmosferdə keçən görüşünü müqayisə edə bilərik. Prezident İlham Əliyev dünyada
çox azsaylı liderlərdəndir ki, nə etdiyinin fərqindədir, etdiyi aydındır, xalqı
tərəfindən kütləvi şəkildə dəstəklənir”.
Müxalifət xalqın yanında deyil, dövlətçiliyin qarşısında oldu
Professor qeyd edib ki, Prezidentin
iradəsi Azərbaycan xalqının iradəsinə, xalqın dəstəyinə söykənir. Ə.Həsənovun sözlərinə
görə, dövlət başçısı İlham Əliyev dəfələrlə bəyan edib ki, onun siyasətinin təməlində
Azərbaycan xalqının dəstəyi, iradəsi və maraqları dayanır. Prezidentin
köməkçisi deyib ki, məhz buna görə də ölkə rəhbəri İlham Əliyev Rusiyaya səfəri
çərçivəsində keçirdiyi görüşlərdə, səsləndirdiyi fikirlərdə çox inamlı və
qətiyyətli olub. Ə.Həsənov Azərbaycan müxalifətinin milli dövlətçilik
maraqlarından çıxış edə bilməməsinə də toxunub: "Biz Prezident İlham Əliyevlə,
onun yürütdüyü siyasətlə, aydın, qətiyyətli, prinsipial mövqe ilə nə qədər
qürur duyuruqsa, bir o qədər də Azərbaycan müxalifətinin qeyri-vətənpərvərliyi
ilə hər zaman xəcalət çəkirik. 1994-cü ildə ulu öndər Heydər Əliyev Azərbaycanın
neft strategiyasını müəyyən edib dünya siyasətinin müstəvisinə çıxaranda,
ölkəmizin gələcək inkişafı və dövlət müstəqilliyinin təminatı üçün ciddi bir
resursu yox idi. Ümummilli lider "Əsrin müqaviləsi”ni resurs kimi Azərbaycan dövlətinin
gələcək inkişafının təməlinə qoydu. Həm də müstəqilliyin əlavə qarantı kimi
meydana qoydu. Sonrakı tarix göstərdi ki, "Əsrin müqaviləsi”ndən başlayan
Azərbaycanın yeni neft strategiyası ölkəmizin bugünkü müstəqil siyasətinin
təməlində dayanırdı. Prezident İlham Əliyev ona görə qətiyyətli siyasət yürüdür,
prinsipial mövqe nümayiş etdirir ki, o, bir tərəfdən xalqın dəstəyinə sahibdir,
digər tərəfdən Azərbaycan özünü tam təmin edən dövlətə çevrilibdir. 1994-cü il
hadisələrinə fikir versək görərik ki, Azərbaycan müxalifəti hansı addımlara yol
verib. O zaman müxalifət meydanlara çıxıb dövlətini və dövlətçiliyini müdafiə
edən xalqın yanında deyil, dövlətçiliyin qarşısında oldu. 1994-cü ilin
oktyabrında, 1995-ci ilin martında silahlı dəstələr Azərbaycan dövlətini Heydər
Əliyevin ortaya qoyduğu milli birlikdən çəkindirmək, "Əsrin müqaviləsi”ni
pozmaq istəyirdi. Azərbaycan dövlətini dünyada öz müstəqil sözünü söyləmək
imkanından məhrum eləmək istəyirdi. Azərbaycanı yenə də ayrı-ayrı xarici
aktorların təsiri altında saxlamaq istəyirdilər. Hazırda Ermənistan necədirsə,
Azərbaycanı da təxminən o cür dövlət etmək istəyirdilər”.
Dövlətinin,
xalqının, millətinin əleyhinə çıxış edənlər
Prezidentin köməkçisi
Azərbaycan xalqının vətənpərvər, iradəli, əzmli olduğunu diqqətə çatdıraraq
təəssüflə qeyd edib ki, müxalifətimiz utanc vericidir. Onun fikrincə, ATƏT-in
bu yaxınlarda Varşavada keçirilən tədbirlərində yalnız Azərbaycan müxalifəti
orada öz dövlətinin, xalqının, millətinin əleyhinə çıxış edib: "O tədbirlərdə
yalnız Azərbaycan müxalifəti və Azərbaycandan qaçıb xarici ölkələrin ayrı-ayrı
bucaqlarında özlərinə isti yer tapan və anti-Azərbaycan fəaliyyətə qoşulmuş
insanlar ölkəmiz əleyhinə çıxışlar edib, sanksiyaların tətbiq edilməsini tələb
ediblər. Onlar Azərbaycan xalqına qarşı bu və ya digər tədbirlərin görülməsini
tələb edirlər. Biz bir tərəfdən əzmkar, iradəli, vətənpərvər xalq olmağımızla
qürur duyuruq. Digər tərəfdən də Azərbaycanın antixalq, qeyri-vətənpərvər
müxalifətinin olmasından təəssüflənir, xəcalət hissi keçiririk”.
Müxalifət
Azərbaycan xalqı tərəfindən boykot edilib
Ə.Həsənov deyib ki, xalqın
iradəsini, dövlətin maraqlarını ifadə etməyən istənilən fəaliyyət iflasa
məhkumdur: "Bu insanlar 26 ildir Azərbaycan xalqının nəinki etimadını qazana
bilmirlər, əksinə, öz ətraflarının da etimadını itirirlər. Onların ətraflarında
olanlar qaçıb dağılışıblar. Aparıcı müxalif siyasi partiyalara baxın, görün
orada kimlər qalıb. Zamanında Azərbaycanın milli azadlıq, xalq hərəkatlarında
iştirak edən liderlərin heç biri onların ətrafında deyil. Bunlar Azərbaycan
xalqının potensialından, mövcud imkanlarından istifadə etmir, xalqın
maraqlarına xidmət edən siyasət yürütmürlər. Məhz bu səbəbdən də 26 ildir onlar
müxalifətdədirlər. əminəm ki, Azərbaycan xalqı onlara layiq olduğu yeri bundan
sonra da göstərəcəkdir. Nə qədər ki, Azərbaycan xalqı ilə müxalifətin
maraqları, həyata keçirdiyi siyasət üst-üstə düşməyib, onlar belə rəzil, yazıq
vəziyyətdə qalacaqlar və keçirdikləri istənilən tədbir xalq tərəfindən boykot
olunacaqdır. Faktiki olaraq Azərbaycan müxalifəti Azərbaycan xalqı tərəfindən boykot
edilib. Onlar bunun fərqində olsalar da, olmasalar da bu, belədir. Hər bir
ictimai-siyasi fəaliyyətin qiymət meyarı onun əhəmiyyətliliyi ilə ölçülür. Əks
halda, onlar bu səviyyədə müxalifətçilik ilə rəzil vəziyyətdə yaşamaqda davam
edəcəklər”.
Belə
liderə qalib gəlmək müxalifətə nəsib olmayıb
Prezidentin köməkçisi sonda
vurğulayıb ki, dövlət başçısı İlham Əliyev Azərbaycan xalqının qürur
mənbələrindən biridir: "Müxalifət etiraf etsə də, etməsə də, bu, belədir. Keçirilən
sorğuların nəticələri göstərir ki, Prezident İlham Əliyevin hazırkı dəstəyi ona
müstəqil, prinsipial, qətiyyətli, xalqın maraqlarını ifadə edən siyasət
yürütməyə imkan verir. Azərbaycan Prezidentinin daxili və xarici siyasətinin
təməlində insan, vətəndaş amili, xalqın maddi-mənəvi, milli maraqları dayanır.
Belə liderə qalib gəlmək müxalifətə nəsib olmayıb, bundan sonra da olmayacaq”.
Rufik
İSMAYILOV