Azərbaycanın beynəlxalq aləmdə artan nüfuzunun göstəricisi
Azərbaycanla Şimali Atlantika Alyansı (NATO) arasında ilk
təmasların tarixi ölkəmizin bir sıra Mərkəzi və Şərqi Avropa dövlətləri ilə
birlikdə NATO-nun yeni yaradılmış məşvərətçi forumuna – Şimali Atlantika
Əməkdaşlıq Şurasına qoşulduğu 1992-ci ilin mart ayına təsadüf edir. Amma Azərbaycanla
NATO arasında məzmunlu tərəfdaşlığın əsası ümummilli lider Heydər Əliyevin 4
may 1994-cü il tarixində Sülh Naminə Tərəfdaşlıq (SNT) Çərçivə Sənədini
imzalaması ilə qoyulub.Ölkəmizin NATO
ilə tərəfdaşlığı onun Avro-Atlantik strukturlarına inteqrasiya məqsədinə xidmət
edir. Azərbaycan–NATO tərəfdaşlığında əsas istiqamətlər siyasi dialoq, sülhü
dəstəkləmə əməliyyatları, meydana gələn təhlükəsizlik təhdidləri və əsas
vurğusu müdafiə məsələlərinə yönələn geniş spektrli məsələlər üzrə praktiki
əməkdaşlıqdan ibarətdir. Qeyri-sabitliyin, münaqişәlәrin vә tәhdidlәrin aradan
qaldırılmasında Azərbaycanın qarşılıqlı maraqlar əsasında NATO ilə əməkdaşlıq
məsələsi Azərbaycanın Milli Təhlükəsizlik Konsepsiyası və Hərbi Doktrinasında
öz əksini tapıb.
Bu qısa
tarixi arayışa əsaslanaraq qeyd edə bilərik ki, Azərbaycan-NATO
əlaqələri uzun illərdir mövcuddur. Ölkəmiz terrorçuluqla mübarizə və problemli
bölgələrdə sabitliyin bərpası məqsədilə 2002-ci ildən 2014-cü ilədək
Əfqanıstanda Beynəlxalq Təhlükəsizliyə Yardım Qüvvələri (ISAF) missiyasında,
eləcə də NATO-nun Kosovodakı sülhməramlı missiyasında fəal iştirak edib. Hazırda
Azərbaycan NATO-nun Əfqanıstanda Qətiyyətli Dəstək Missiyasına töhfə verir və 94
azərbaycanlı hərbi qulluqçu Əfqanıstanda sülh və təhlükəsizliyi təmin etmək
üçün xidmət edir. Bu gün Azərbaycan NATO-ya üzv olmayan bir neçə ölkədən
biridir ki, Əfqanıstan hökumətinə ciddi hərbi və iqtisadi yardım göstərir.
2016-cı
il iyulun 9-da NATO-nun Varşava sammiti çərçivəsində Prezident İlham Əliyev
Alyansın etibarlı tərəfdaşı və Əfqanıstanın dostu kimi Azərbaycanın Qətiyyətli
Dəstək Missiyasına əsgərləri vasitəsilə verdiyi nəzərəçarpan töhfəsini davam
etdirəcəyini və müxtəlif növ tranzit daşımalarını təmin edəcəyini, bu missiya
başa çatdıqdan sonra geniş Davamlı Tərəfdaşlıq Proqramı çərçivəsində töhfə verməyi
nəzərdə tutduğunu bəyan edib. Cari il sentyabrın 7-də NATO Hərbi Komitəsinin
sədri general Petr Pavel Azərbaycanın Alyansın etibarlı tərəfdaşı olduğunu
xüsusi qeyd edərək, ölkəmizin terrorizmlə mübarizədə iştirakını, sülhməramlı
əməliyyatlar üçün yükdaşımalara önəmli töhfə verdiyini, sülhməramlılarımızın
Əfqanıstanda keçirilən əməliyyatlarda göstərdikləri peşəkarlığı yüksək
qiymətləndirib. Sentyabrın 26-da isə Azərbaycanda səfərdə olan NATO baş
katibinin Qafqaz və Mərkəzi Asiya üzrə xüsusi nümayəndəsi Ceyms Appaturay
ölkəmizin bu təşkilatla etibarlı tərəfdaşlıq etdiyini və Əfqanıstandakı
sülhməramlı missiyaya verdiyi böyük töhfəsini vurğulayaraq, təmsil etdiyi
təşkilat adından Azərbaycana minnətdarlığını bildirib.
Sadalanan
faktlar Azərbaycan-NATO əlaqələrinin yüksək səviyyədə olduğunu göstərir. Eyni
zamanda, rəsmi Bakının NATO sammitlərində ali səviyyədə təmsil olunması
Azərbaycanın iqtisadi, hərbi və siyasi baxımdan mühüm beynəlxalq oyunçuya
çevrildiyini, Avrasiyada, o cümlədən Şərqi Avropada geosiyasi əhəmiyyətini nümayiş
etdirir. Bütün bunlara görə də NATO Azərbaycan kimi tərəfdaşını itirmək
istəmir, rəsmi Bakı ilə əməkdaşlığını bundan sonra da davam etdirməkdə israrlı
görünür. Qeyd olunanlara daha bir əyani misal olaraq, Belçika Krallığında
işgüzar səfərdə olan Azərbaycan Prezidenti İlham Əliyevin noyabrın 23-də
NATO-nun baş katibi Yens Stoltenberqin dəvəti ilə Alyansın mənzil-qərargahına
gəlişini, onlar arasında keçirilən görüşü göstərmək olar.
Görüşdə Azərbaycan
ilə NATO arasında uğurlu əməkdaşlığın həyata keçirildiyi bildirilib. Görüşün
ardınca mətbuata bəyanatla çıxış edən Y.Stoltenberq Əfqanıstandakı Qətiyyətli
Dəstək Missiyasına qoşunlar, tranzit imkanları və Əfqanıstan milli
təhlükəsizlik qüvvələrinə maliyyə dəstəyi formasında verdiyi davamlı dəstəyə
görə Azərbaycana, dövlət başçısı İlham Əliyevə minnətdarlığını çatdırıb. Həmçinin
Əfqanıstandakı Qətiyyətli Dəstək Missiyasına qoşunların artırılması ilə bağlı
qərarına görə, ölkə başçımıza təşəkkür edib. Daha sonra NATO-nun
Şimali Atlantika Şurasının iclasında iştirak edən Prezident İlham Əliyev öz
çıxışında ölkəmizlə NATO arasında müxtəlif sahələrdə uğurlu əməkdaşlığın həyata
keçirildiyini diqqətə çatdırıb. Ölkəmizin NATO-nun müxtəlif missiya və
əməliyyatlarında fəal iştirak etdiyini vurğulayan Prezident İlham Əliyev
NATO-nun, öz növbəsində, Azərbaycanda ərazilərin minalardan təmizlənməsi işində
fəal iştirak etdiyini bildirib. Qeyd olunub ki, Azərbaycan Əfqanıstandakı
sülhməramlı fəaliyyətini genişləndirir və bu ölkə ilə ikitərəfli səviyyədə
iqtisadi və digər sahələrdə əməkdaşlığı həyata keçirir.
Milli Məclisin Müdafiə, təhlükəsizlik və korrupsiya
ilə mübarizə komitəsinin üzvü, Milli Dirçəliş Hərəkatı Partiyasının (MDHP)
sədri Fərəc Quliyev Azərbaycan-NATO əlaqələrini şərh edərkən, bu
qurumla ölkəmiz arasında səmimi münasibətlər olduğunu
dilə gətirib. O bildirib ki, bu münasibət tərəfdaşlıq və əməkdaşlıqda özünü
göstərir: "Azərbaycanın NATO tərkibində Əfqanıstanda fəaliyyət göstərməsi,
Qərb dəyərlərinə üstünlük verməsi NATO-da Azərbaycan haqqında oturuşmuş bir
imic formalaşdırıb. Və hesab edirlər ki, Azərbaycanla münasibətlər çox yüksək
səviyyədə qalmalıdır. Bəzi Qərb ölkələri Azərbaycan-NATO, Azərbaycan-ABŞ,
Azərbaycan–Avropa İttifaqı münasibətlərini pozmaq istəyirlər. Amma göründüyü
kimi, hər iki tərəf sayıqdır, səmimi münasibətlər qorunur, Azərbaycana böyük
etimad göstərilir. Prezident İlham Əliyevin NATO-nun Şimali Atlantika Şurasının
iclasında iştirakı həm bu etimadın, həm də dövlət başçısının nüfuzunun bir daha
göstəricisidir”.
Millət vəkili, Yeni Azərbaycan
Partiyası (YAP) Qaradağ rayon təşkilatının sədri Aydın Hüseynovda Prezident İlham Əliyevin Brüsseldə NATO-nun Şimali Atlantika Şurasının
iclasında iştirak etməsini Azərbaycanın beynəlxalq aləmdə artan nüfuzunun göstəricisi
kimi dəyərləndirib. O, bir neçə il öncə Azərbaycanın BMT Təhlükəsizlik
Şurasının iki illiyə qeyri-daimi üzvü seçilməsini də təsadüfi saymayıb: "Bunun
özü Azərbaycanın çox böyük siyasi nüfuzu, diplomatik qələbəsi idi. Bununla
yanaşı, NATO baş katibinin Prezident İlham Əliyevi Brüsselə dəvət etməsi o
deməkdir ki, Azərbaycan dünyada böyük nüfuza malikdir, regionda söz sahibidir,
regiondakı proseslərə təsir etmək imkanları var, digər tərəfdən Azərbaycan sülh
siyasəti yeridir. Bundan başqa, Azərbaycan Prezidenti İlham Əliyevin şəxsi
keyfiyyətlərinin də mühüm rolu var. Cənab Prezidentin şəxsi keyfiyyətlərini,
siyasi iradəsini, Azərbaycanın beynəlxalq aləmdə nüfuzunu və digər amilləri
üst-üstə gəldikdə, bu gün dövlətimiz dünya, eləcə də NATO üçün etibarlı tərəfdaş
dövlət sayılır”.
Rufik İSMAYILOV