ÜAK-ın qeydiyyatının ləğvi siyasi qərardır
Ümumrusiya Azərbaycanlıları Konqresinin (ÜAK) qeydiyyatının ləğv
edilməsi məsələsi ciddi narazılığa səbəb olub. Çünki ÜAK bir diaspor təşkilatı
olaraq 2 milyondan çox azərbaycanlını öz ətrafında birləşdirib, daim
Azərbaycala Rusiya arasında siyasi, ictimai və mədəni əlaqələrin formalaşmasında
yaxından iştirak edib. Təşkilatın bağlanması ilə bağlı ötən həftə Rusiya XİN
mətbuat katibi Mariya Zaxarovanın çaşdırıcı fikirləri isə yenə də Azərbaycan
ictimaiyyəti tərəfindən birmənalı qarşılanmadı. Onun ardınca isə Rusiya xarici
işlər nazirinin müavini Vasiliy Nebenzya ÜAK-ın qeydiyyatının ləğv edilməsinə
münasibət bildirib. V.Nebenzya təşkilatın qeydiyyatının ləğvinin siyasətlə
bağlı olmadığını və Moskva-Bakı münasibətlərinə təsir göstərməməli olduğunu
bildirib: "Bu, iki dövlət arasında münasibətlərin pisləşməsinə gətirib
çıxarmamalıdır. Məsələ hüquqi müstəvidədir, buna belə də baxmaq lazımdır. Bu
qərar siyasi iradə ilə bağlı deyil. Qərar Rusiya hüquq-mühafizə orqanlarının ÜAK-ın
qeydiyyatında hüquqi prosedurların pozulmasını aşkarlaması ilə bağlıdır. Mən
tam əminəm ki, bu məsələ Azərbaycanla münasibətlərimizə təsir göstərməməlidir”.
Maraqlıdır, həqiqətənmi Rusiya xarici işlər nazirinin müavinin qeyd
etdiyi kimi, ÜAK-ın qeydiyyatının ləğvində siyasi məsələ deyil?
Mövzu ilə bağlı "Kaspi” qəzetinə açıqlamasında Milli Məclisin deputatı Elşən Musayevin sözlərinə görə, bizim
ehtimalımız odur ki, ÜAK-ın qeydiyyatının ləğvi siyasi məsələdir: "Təbii ki,
biz bunu fakt şəklində ortaya qoya bilmərik. Çünki qarşıdan Azərbaycan üçün
həssas siyasi hadisələr gəlir və Rusiyanın timsalında biz artıq 2013-cü il
seçkiləri öncəsi belə oxşar prosesləri izləmişik. Pozitiv düşünmək xətrinə də
olsa, əslində ilkin variant olaraq razılaşmaq olar ki, bu, siyasi məsələ deyil.
Sadəcə, özlərinin dediyi kimi, sənədlərin müəyyən çatışmazlığından doğan bir
məsələdir. Ümumiyyətlə, Rusiya bütün hallarda bizə qonşu dövlətdir və bunu heç
cür dəyişə bilmərik. Şəxsi düşüncəm ondan ibarətdir ki, bu məsələdə daha çox diplomatik
yola üstünlük verməliyik. Təbii, Rusiya xarici işlər nazirinin müavini belə
danışmalıdır və deməyəcək ki, bu siyasi məsələdir”.
E.Musayev söylədi ki, ÜAK-ın qeydiyyatının ləğvi məsələsinə hələ ən
yüksək səviyyədə elə Rusiya xarici işlər nazirinin müavini tərəfindən münasibət
bildirilib: "Ümid edək ki, bu məsələ elə onun dediyi kimidir. Hərçənd bizim
ehtimallar başqa istiqamətə yönəlib. Çünki hələ bir ay müddət var və ola bilsin
ki, Rusiya hökumətindəki müəyyən insanlar artıq bu barədə düşünüblər. Eləcə də
Azərbaycanla münasibətlərin qırılmamasının tərəfdarı olan qüvvələr də var ki,
onlar da bu qərarın əleyhinə olublar. Bəlkə onların da təsir gücü ola bilər.
Hər halda, biz bir aylıq apelyasiya müddətini gözləyək. Elə bu gözləmə
mövqeyində olduğuna görə Azərbaycan qəbul edilən ədalətsiz qərar hələ ən yüksək
səviyyədə münasibət bildirməyib”.
Politoloq Natiq Miri qeyd etdi
ki, Rusiya xarici işlər nazirinin müavininin ÜAK-la bağlı açıqlaması yanğının
üzərinə su səpmək anlamına gəlir: "Çünki bundan əvvəl həmin qurumun mətbuat
katibi Mariya Zaxarovanın açıqlaması oldu və o, bir növ Rusiyanın daxili
işlərinə kimsənin qarışmaması ilə bağlı təpki nümayiş etdirdi. Ümumiyyətlə,
Zaxarovanın son zamanlar verdiyi açıqlamalar iki ölkə arasında bir gərginlik
yaratmışdı və düşünürəm ki, Vasiliy Nebenzyanın açıqlaması məhz Zaxarovanın
etdiyi səhvlərin aradan qaldırılmasına yönəlib. Konqresin bağlanması qərarının
siyasi yox, hüquqi səbəblərlə bağlı olmasında isə rusiyalı diplomat səmimi
deyil. Əgər bu hüquqi məsələ olsaydı, nizamnamədəki boşluqlarla bağlı problem
Rusiyanın Ali Məhkəməsinin plenumuna qədər gedib çıxmazdı”.
N.Miri əlavə etdi ki, ÜAK Rusiyada yaşayan iki milyondan çox
azərbaycanlını ətrafında birləşdirən mühüm təşkilatdır: "Əgər belə bir
təşkilatın bağlanması yalnız hüquqi məsələdirsə, necə olur ki, Ermənistanın
əhalisinin sayı qədər üzvü olan bir təşkilatı çox asanlıqla ləğv edir, amma 5-10
nəfərdən ibarət Rusiya Erməniləri İttifaqını ləğv etmək bir yana, onun sədri
Ara Abramyanın ad gününə Kremlin yüksək çinli məmurları yığışır? Bu faktların
özü göstərir ki, məsələdə siyasi maraqlar da mövcuddur. Ona görə də düşünürəm
ki, Rusiya xarici işləri nazirinin müavini bu məsələdə səmimi deyil. Əgər ÜAK-la
bağlı qərarın arxasında siyasət və siyasi maraqlar dayanmırsa, növbəti məhkəmə
prosesində qərarı ləğv etsinlər. Ədliyyə Nazirliyi konqresi yenidən qeydiyyata
almaqla yaranmış gərgin vəziyyətə müsbət münasibət sərgiləsin. Çünki bu hüquqi
bir məsələdirsə, çatışmazlıqların aradan qaldırılması çox asandır”.
Bəxtiyar MƏMMƏDLİ