• cümə, 29 Mart, 04:46
  • Baku Bakı 7°C

Xalq artisti Əhməd Bakıxanovun xatirə gecəsi təşkil olunacaq

25.03.23 18:00 582
Xalq artisti Əhməd Bakıxanovun xatirə gecəsi təşkil olunacaq

Martın 30-da Beynəlxalq Muğam Mərkəzində görkəmli tarzən, musiqi xadimi, Xalq artisti Əhməd Bakıxanovun xatirəsinə həsr olunmuş tədbir təşkil ediləcək.

Xatirə gecəsində unudulmaz sənətkarın həyat və yaradıcılığından danışılacaq, xidmətləri vurğulanacaq.

Qeyd edək ki, təhsilini İranda almış Əhməd Bakıxanov burada ustad tarzənlərdən tar ifaçılığının və muğamatın sirlərinə dərindən yiyələndikdən sonra 1920-ci ildən Bakıda musiqi məclislərində və konsertlərdə iştirak edib. 1930-cu illərdən Üzeyir Hacıbəylinin dəvəti ilə ovaxtkı Azərbaycan Dövlət Konservatoriyasında muğamdan dərs deyib. Ə.Bakıxanov ömrünün çox hissəsini musiqi sənəti üzrə kadrların hazırlanmasına həsr edib. Onun yaratdığı ansambl bir çox görkəmli xanəndələri - Cabbar Qaryağdıoğlunu, Seyid Şuşinskini, Hüseynqulu Sarabskini, Zülfü Adıgözəlovu və digər görkəmli xanəndələri müşayiət edərək geniş konsert proqramları ilə insanların zövqünü oxşayıb. Azərbaycan xalq musiqisinin, xüsusilə muğamların təbliğində Əhməd Bakıxanovun böyük xidməti var. O, muğam sənətinin dərin bilicisi kimi tanınmaqla yanaşı, az ifa olunan “Nəva-nişapur”, “Əbu-əta” muğamlarının mahir ifaçısı kimi də məşhurdur. Eyni zamanda, onun yaratdığı bir çox melodiyalar xalq ifaçılığında geniş yayılıb. Ə.Bakıxanov “Azərbaycan xalq rəngləri” (1964), “Azərbaycan ritmik muğamları” (1968), “Muğam, mahnı, rəng” (1975) kimi not nəşrlərinin müəllifidir. Bu məcmuələr xalq musiqisinin tədrisi və tədqiqi üçün qiymətli vəsaitdir. Onun musiqi məktəbləri üçün tərtib etdiyi muğam proqramı tar tədrisində bu gün də istifadə olunmaqdadır.

banner

Oxşar Xəbərlər