Turizmin inkişafında yeni mərhələ
Son zamanlar qeyri-neft sektoruna diqqət artıb. Xüsusilə də, turizmin
inkişafına həm dövlət, həm də özəl sektorun marağı böyükdür. Və bu istiqamətdə ardıcıl
olaraq addımlar atılır. Bu günlərdə "Azərbaycan Hava Yolları” (AZAL) QSC
Azərbaycan Turizm Assosiasiyasının (AzTA) İdarə Heyətinin üzvü olub.
Trend-in məlumatına görə, Azərbaycanda ilk dəfə olaraq özəl və dövlət
sektoru turizm sektorunun inkişafı üçün tərəfdaşlıq qurub. Belə ki,
Azərbaycanın mülki hava daşıyıcısı dünən AzTA İdarə Heyətinin üzvü olub. Sazişi
"Azərbaycan Hava Yolları” QSC-nin vitse-prezidenti, AZAL sərnisindaşıma
şirkətinin icraçı direktoru Eldar Hacıyev və AzTA-nın sədri Nahid Bağırov
imzalayıblar. Assosiasiyanın tərkibinə aviaşirkətin daxil olması ilk dəfədir -
indiyə kimi Azərbaycan Turizm Assosiasiyasının üzvləri sırasına turizm
şirkətləri və hotellər daxil olub. AZAL assosiasiyaya üzv olmaqla yanaşı,
AzTA-nın İdarə Heyətinin tərkibinə də daxil olub və burada aviasiya
nəqliyyatının fəaliyyətini əlaqələndirəcək.
AZAL-ın Azərbaycan Turizm Assosiasiyasında fəaliyyəti ölkədə turizm
sənayesinin əsas iştirakçılarının - turizm şirkətləri, hotellər və aviasiya
sahəsinin fəaliyyətinin üçtərəfli əlaqələndirilməsinin formalaşdırılması
deməkdir. Turizm şirkətləri, hotellər və aviasiya sahəsinin iştirakı olmadan
lazımi keyfiyyəti təmin etmək mümkün deyil.
Aviaşirkətin Azərbaycan Turizm Assosiasiyasının İdarə Heyətinin
tərkibinə daxil olması və assosiasiyanın üzvü olması dövlət başçısı tərəfindən
turizm sektorunun inkişafının təmin edilməsi və beynəlxalq standartlara
uyğunlaşdırılması üçün turizm sektorunun iştirakçıları qarşısında qoyulan
məqsədlərdən birinə nail olmaq deməkdir.
Bundan sonra turizm sənayesinin üç əsas aparıcı qüvvəsi
əlaqələndirilmiş fəaliyyət göstərəcək. Bu fəaliyyət Azərbaycana turist axınını
təmin etməklə yanaşı, turizmin bütün istiqamətlərinin inkişafına imkan verəcək
ki, bu da əhalinin məşğulluğunun təmin olunması üçün əlavə təkan olacaq.
İki qurum arasında qurulan tərəfdaşlığın növbəti mərhələdə hansı
effektləri verəcəyini və turizmə necə təsir edəcəyini öyrənməyə çalışdıq.
AZAL AzTA üçün ikinci nəfəsdir
Azərbaycan Turizm
Assosiasiyasının sədri Nahid Bağırov deyir ki, turizmin inkişafını AZAL-sız təsəvvür
etmək qeyri-mümkündür: "Turizmdə üç seqment var. Biri otellər, digəri turizm
şirkətləri, o biri isə, sözsüz ki, aviasiyadır. Bu gün otel yerləşməni, turizm
şirkəti cəlb olunmanı təmin edir. Amma əsas rol turisti gətirən nəqliyyat
vasitəsindədir. Biz daim araşdırma aparırıq ki, hansı ölkənin turistlərində
Azərbaycana maraq var. Və çalışırıq ki,
həmin ölkələrdən rahat uçuşlar təşkil edək. Yəni heç kim indi tranzit uçuşlarla
səyahət etmək istəmir. Turistlər daha rahat və əlçatan olan ölkələrə getməyə
üstünlük verirlər. Və bu rahatlığı aviasiya şirkəti olmadan təmin etmək
çətindir. Otellər, turizm şirkətləri və hava nəqliyyatı ölkədə turizmin vahid koordinasiyasını
yaratdı. Bundan sonra idarə heyəti ilə mütəmadi görüşlərimiz olacaq. Həm
otellər, həm də turizm və aviasiya şirkətləri ilə fikir mübadiləsi aparılacaq.
Sözsüz ki, yeni istiqamətlər olacaq, otellərin və turizm şirkətlərinin
məsləhətinə qulaq asılacaq. Hazırkı vəziyyətdə turizmin inkişafını AZAL-sız
təsəvvür etmək mümkün deyil. Əgər gələcəkdən danışırıqsa, biz hamımız
qüvvələrimizi birləşdirib ortaya bir iş qoymalıyıq. Yoxsa ki, ayrı-ayrı
işləməklə yaxşı bir nəticə əldə etmək çətin olar və turizm kiçik addımlarla
irəliləyər”.
Assosiasiyanın sədri deyir ki, çalışacağıq müştərilərə yeni
istiqamətlər və sərfəli qiymətlər təklif edək: "Bizim əməkdaşlığımız yalnız
gəlmə turizmə yox, eyni zamanda ölkədən gedənlərə də yararlı olacaq. İki
qurumun birgə əməkdaşlığından çox şey asılıdır. Ümidvaram ki, bu tərəfdaşlığın
müsbət nəticələri qısa bir müddətdə özünü göstərəcək. Çalışacağıq ki, AZAL-la
bərabər yeni istiqamətlər və sərfəli qiymətlər təklif edək. Bu, dövlət və özəl
strukturun unikal, səmərəli format olan birgə əməkdaşlığıdır. AZAL kimi bir
qurumun Azərbaycan Turizm Assosiasiyasının İdarə
Heyətinə üzv olması bizim üçün çox müsbət haldır. Hətta deyərdim ki, AzTA üçün
ikinci nəfəsdir”.
Turpaketlər ucuzlaşa
bilər
Azərbaycan Turizm və Menecment
Universitetinin Turizm və qonaqpərvərlik fakültəsinin dekanı Rəhman Səfərov"Kaspi”yə açıqlamasında
bildirdi ki, bu əməkdaşlıq turpaketlərin ucuzlaşmasına təsir edə bilər: "Azərbaycan Turizm Assosiasiyasının tərkibində otellər və turizm
şirkətləri vardı. Üçüncü bir tərəf kimi aviaşirkətin qatılması turizm sektoruna
öz töhfəsini verəcək. Xüsusilə də, daha ucuz qiymətə turpaketlərin təklif
olunmasına müsbət təsir göstərəcək. Və belə ucuz turpaketlərin olması turizmin
hərtərəfli inkişafına səbəb olacaq. Bu, həmçinin Azərbaycana turist axınına və
turizmin müxtəlif sahələrinin inkişafına bir stimul verəcək. Hər iki qurumun bu
işdə maraqlı olması və bu istiqamətdə müəyyən işlərin görülməsi ölkənin dünya
miqyasında tanınmasına əhəmiyyətli təsir göstərəcək”.
Turizm bazarında dönüş nöqtəsi
Turizm üzrə ekspert Ruslan Quliyev qeyd edir ki, bu, turizm bazarında dönüş nöqtəsi ola bilər: "Bu məsələ turizmin
inkişafında həlledici rol oynayacaq amillərdən biridir. Qurulan tərəfdaşlığı mərhələli
şəkildə turizmin inkişafına yönəlmiş fəaliyyətlərin davamı kimi qiymətləndirmək
olar. Azərbaycanın turizm imkanlarının təbliğatı zamanı gələn turistlərin daha
rahat şəkildə uçuşlar etməsini təmin etmək baxımından müsbət addımdır. Dünyada
belə təcrübələr zaman-zaman mövcud olub. AZAL-ın AzTA-nın İdarə Heyətinə üzv
olması ondan xəbər verir ki, koordinasiyalı şəkildə ölkəyə gələcək turistlərin
sayı artacaq. Bu, həmçinin turpaketlərin təqdim olunması zamanı qiymətlərə
əsaslı təsir göstərəcək. Yəni turpaketlərin xarici bazarlarda təklifi zamanı
onların rəqabət qabiliyyətini artıracaq. Bu çox müsbət addımdır və turizm
bazarında dönüş nöqtəsi ola bilər”.
Günel Azadə