Təbəssümlə pedal fırladan xanımlar - Fotolar
Hər ayın
sonuncu bazar günü yalnız xanımların iştirak edə biləcəyi velo-tur təşkil
edilir. Bu dəfə də "Velo təlim Səhərlə” feysbuk səhifəsi adəti üzrə elan verib,
görüş yerini, saatını yazıb, velosiped sürə bilən, bu həvəsdə olan və ən əsası,
turda iştirak etmək istəyən xanımları dəvət etdi. Dəvətdən biz də bir pay öz üzərimizə
götürüb, qeyd edilən ünvana yollandıq, deyilən vaxt orda olduq.
"Hündürdaban ayaqqabı ilə velosiped
sürmək olar?”
Bir neçə
xanım bizdən əvvəl gəlmişdi. Vaxt yetişdikcə bütün xanımlar toplaşmağa başladı.
Düzü, velosiped sürmək deyəndə fikirləşdim ki, ancaq idman formasında gələcəklər,
amma bizi yanıldan xanımların sayı da az olmadı... Yubka və donlarla da
velosiped sürməyə iddia edənlər varıydı. Beləliklə, 20-dən çox xanım yığışdı. Hər
kəsin gözü turun başlaması üçün tədbiri təşkil edən, velotəlimçi Səhər Mehmanı
axtarırdı. Bir qədər geciksə də, nəhayət o da gəldi. Qırmızı don, hündürdaban
ayaqqabıda… Turda ilk dəfə iştirak edən xanımlar hətta "hündürdaban ayaqqabı ilə
velosiped sürmək olar?” kimi sualları bir-birinə verməyə başladılar.
"Təbəssümlə pedallayacağıq”
S.Mehman
öncə çıxış etdi, gələn xanımları salamlayıb, tur haqqında məlumat verdi.
Bildirdi ki, bu turun təşkil edilməsində məqsəd hər kəsi bir araya toplamaq və
xoş həftə sonu keçirməkdir: "Eyni zamanda, 22 sentyabr Ümumdünya Avtomobilsizlər
Günü kimi qeyd olunur. Biz də öz növbəmizdə bu gün - 24 sentyabrda avtomobilə
yox deyib, təbəssümlə pedallayacağıq. Məqsədimiz sağlamlıqla zərifliyin vəhdətini
aşılamaq və şəhərdə maşın tüstüsü əvəzinə xanımlarımızın gözəl ətrinin
yayılmasına nail olmaqdır. Əsas məqsəd
xanımları sağlam həyat tərzinə cəlb etməkdir”.
Niyə məhz xanımlar?
Bəs niyə turda ancaq
xanımlar iştirak edir? Bu sualı verənlər də çoxdur. Təlimçi xanım bu suala da
aydınlıq gətirdi: "Hər ayın sonuncu bazar günü bulvar ərazisində bizim velo-tur
baş tutur. Turda ancaq xanımlar iştirak edə bilər. Bəzən niyə məhz xanımlar,
niyə bəylər iştirak etmir deyə suallar verilir. Buna da toxunmaq istəyirəm.
Bizdə müəyyən mentalitet qaydaları var. Bəylər onsuz da istədiyi vaxt sürə
bilirlər. Amma xanımlar çətinlik çəkir. Müəyyən çərçivə içində yaşayan xanımlar
var. Ona görə də xanımların tam rahat olması üçün belə bir addım atdıq. Müəyyən
mərhələdən sonra növbəti turlarda bəylər də iştirak edə bilər. Amma hazırda
xanımların bəylərlə birgə sürə bilməsi üçün təcrübəsi çox azdır. Maarifləndirmə
işi apardıqdan sonra birlikdə tur olacaq. Başlanğıc üçün belə olması lazım
idi”.
S.Mehman onu da qeyd etdi
ki, tura qatılmaq üçün yaş məhdudiyyəti yoxdur.
Turun başlamasını hər kəs
səbirsizliklə gözləyirdi. Ləngimənin səbəbi isə velosipedsiz xanımlar üçün
velosiped gətirilməsi idi... Çox keçmədən velosipedlər gətirildiyi üçün tura
başlamaqda elə bir problem qalmadı. Hər kəs velosipedinə minir və yol alırlar.
Xanımlar velo-tur çərçivəsində Kukla Teatrının
yanından başlayıb, Su İdman Mərkəzi tərəfə getməli və geri qayıtmalıdırlar. Necə
həvəs və gülər üzlə başlamışdılarsa, elə böyük enerji ilə də geri döndülər.
"İşdən sonra velosiped sürməyə gəlirəm”
Turda iştirak edən
xanımlar bir-birlərilə qaynayıb-qarışmışdılar. İlk dəfə iştirak etsələr belə,
artıq tanış olmağa başlayıb, söhbətləşirdilər. Biz də onlardan bir neçəsi ilə
söhbətləşib təəssüratlarını öyrəndik. Mehriban İsmayılova hər dəfə bu turda
iştirak edən xanımlardandır. Deyir ki, hər dəfə qatılmağına səbəb gözəl təəssürat
almasıdır: "Tur olmayanda da, axşam işdən sonra velosiped sürməyə gəlirəm.
Axşamlar və səhərlər bir-iki saat sürürəm. Velosiped həm də sağlamlıq üçün çox
vacibdir. Aprel ayından başlamışam. Turun üstünlüyü odur ki, burada yeni
insanlar tanıyırsan. Evdə oturmaqdan heç nə çıxmır”.
Mehriban xanım deyir ki, Bakıda
velosiped üçün ayrıca yolun olmaması bu nəqliyyat növündən istifadəni çətinləşdirir:
"Maşın yolunda ümumiyyətlə, sürə bilmirik, həm də təhlükəli olduğuna görə risk
etmirəm. Düzdür, maşın yolunda velosiped sürənlər var. Amma ayrıca velosiped
yolumuz olsa yaxşı olardı, rahat istifadə edə bilək”.
"İşə
velosipedlə gedirəm”
Nuray İsmayılova nəinki tura qatılır, eyni zamanda
işə də velosipedlə gedib-gəlir: "Velosipedi sürməyi iki-üç il bundan əvvəl öyrənmişəm.
Əvvəllər müntəzəm şəkildə maraqlanmırdım. Keçən aydan başlayaraq davamlı
velosiped sürürəm. İş yerim evimə yaxın olduğu üçün velosipedlə gedirəm. Maşın
yoluna çıxmağa ehtiyac olmur. Düzü, buna cəsarət də etmirəm. Evlərin, binaların
arası ilə işə gedib-gəlirəm. Arada bazar günləri təşkil olunan velo-turlara da
qoşuluram. Bulvarda tək də sürə bilirəm. Amma başqa velosipedçilərlə birlikdə
sürmək mənə görə daha maraqlı olur. Həm də tur sayəsində yeni insanlar tanımış
oluram. Ümumiyyətlə, turlarda vaxt daha
maraqlı keçir. Hər dəfə olmasa da, vaxt tapan kimi tura qoşulmağa çalışıram”.
Velosiped sürməyi əslində çox xanım istəyir. Amma
bir qisim öyrənərkən yıxılmaqdan, zədə almaqdan qorxur. Zəminə Nəsibova da bu
yolu çətinliklə keçib, indi velosiped sürməkdən zövq alır: "Adətən, bağda sürürəm.
İki ildir ki, velosiped sürürəm. Bir-iki dəfə yıxıldığıma görə əvvəllər
qorxurdum. Sonradan öyrəndim. Öyrəndiyim vaxt dizlərim qanadı... Tura ilk dəfədir
ki, qoşuluram. Təəssüratım çox yaxşıdır. İlk dəfə olduğu üçün həyəcan da oldu,
amma maraqlıdır”.
Həm əyləncəli,
həm sağlam həyat tərzini dəstəkləyən...
Turda diqqət çəkən simalardan biri də Ayla Abbasova
idi. Çünki o, tək yox, balaca qızları ilə gəlmişdi. Qızlar da fərqli aləmə
düşmüşdülər kimi analarına tez-tez suallar verirdilər. Biz də yaxınlaşıb Ayla
xanımla söhbətləşdik. O bildirdi ki, 20 ilə yaxındır velosiped sürür, indi
qızlarına da öyrədir: "Qızlarımın birinin 8, digərinin 9 yaşı var. Özüm
velosiped sürməyi sevirəm və qızlarıma da öyrətməyə çalışıram. Düzdür, kiçik
qızım hələ tam sürməyi bacarmır. Amma böyük qızım 4 yaşından sürməyi öyrənib”.
Ayla xanım tura birinci dəfədir qoşulur. Deyir ki,
xoşuna gəlib: "Tur haqqında eşitdim və diqqətimi çəkdi. Çox xoşuma gəldiyini
deyə bilərəm. Həm əyləncəli, həm sağlam həyat tərzini dəstəkləyən, həm də bazar
gününü səmərəli şəkildə keçirmək üçün əla məşğuliyyətdir”.
Təbii ki xanımlar bir yerdədirsə, bu görüş tək
velo-turla bitə bilməzdi. Hətta öncədən də Səhər xanım bildirmişdi ki, turdan
sonra kimin vaxtı və həvəsi olsa çay süfrəsi ətrafında onlara yoldaş ola bilər.
Və çay süfrəsi ətrafında da xanımlar bir araya gəldilər. Çay içə-içə tur çərçivəsində
daha nələr etmək olar tipli söhbətlər oldu, hərə öz təklifini verdi.
Aygün Asimqızı
Şəbnəm Mehdizadə