Qəbul imtahanında yeni qayda: çaşqınlıq, yoxsa yeni fürsət imkanı?
«Bir abituriyent iki qrup üzrə
qəbul imtahanı verə biləcək»- Dövlət İmtahan Mərkəzinin (DİM) Direktorlar
Şurasının sədri Məleykə Abbaszadənin 2019-cu ildən
tətbiq ediləcək yeni model barədə açıqlaması abituriyentlərin qarşısında yeni
imkanlar yaratmaqla bərabər, çoxsaylı suallar da yaradıb. Belə ki, cari tədris
ilində XI sinfi bitirənlərə iki dəfə qəbul imtahanlarında iştirak etmək imkanı
veriləcək. "Keçən il bu yenilik yalnız bir qrup çərçivəsində tətbiq edilib.
Yəni, abituriyent qəbul imtahanının birinci mərhələsində hansı qrup üzrə
iştirak etmişdisə, iyulda keçirilən ikinci imtahanda da eyni qrupun imtahanında
iştirak etməli idi. Gələn il isə hər abituriyentə iki fərqli qrup üzrə də
imtahan vermək şansı tanınacaq. Onlar istəsə, qəbul imtahanlarının hər ikisində
eyni və ya fərqli qrupda imtahan verərək, ali məktəblərə qəbul müsabiqəsində
iştirak edə biləcəklər” – deyə DİM sədri bildirib.
M. Abbaszadə bildirib ki,
2019-cu ildə tətbiqi nəzərdə tutulan buraxılış və ali təhsil müəssisələrinə
qəbul imtahanlarında 700 ballıq sistem saxlanılacaq. Buraxılış imtahanında
iştirak edənlər üçün maksimum bal 300-dür. M.Abbaszadə qeyd edib ki,
abituriyentlər qəbul imtahanında 3 fəndən maksimum 400 bal toplaya biləcək,
yekunda ən yuxarı bal 700 olacaq. DİM sədri həmçinin qeyd edib ki, yeni imtahan
modelinə əsasən, abituriyentlər buraxılış və qəbul imtahanlarında topladıqları
balların cəminə əsasən, ali təhsil müəssisələrinin müsabiqəsində iştirak edəcək:
Yeni imtahan modeli ətrafında yaranan suallar isə təkcə gününü repetitora həsr
edən və yalnız imtahan verəcəyi qrupun fənləri üzrə hazırlaşan şagirdləri
deyil, cibindəki son qəpiyini övladının təhsilinə yönəldən valideynləri, eləcə
də müəllimləri və ekspertləri düşündürür. Orta məktəbi bitirən və ixtisas
seçimini konkret müəyyənləşdirən abituriyent ikili seçim qarşısında
qalmayacaqmı? Yalnız seçdiyi ixtisas üzrə fənlərdən əlavə, seçə biləcəyi digər
qrup üzrə fənləri oxumağa onun maddi, fiziki və intellektual imkanları yol
verəcəkmi? Ya bəlkə imtahan vermək və ali məktəbə qəbul olmaq üçün ən optimal
model budur? DİM sədrinin "2 ildən sonra yeni növ buraxılış və qəbul
imtahanlarında abituriyentləri, şagirdləri nə gözləyəcəyi ilə bağlı bütün
suallara cavab vermək üçünmaarifləndirmə işi bütün regionlarda
aparılacaq”-deməsinə baxmayaraq, belə deyək, vaxtı qabaqlayıb, yeni imtahan
modelindən gözləntilərlə bağlı ekspertlərin fikirlərini öyrənməyə çalışdıq.
Mövzu ətrafında söhbətləşdiyimiz
ekspertlərin də yeni imtahan modelinə münasibətləri birmənalı olmadı. Belə ki,
təhsildə "irəliyə addım” deyənlərlə yanaşı, bunu abituriyentlərin qarşısında
dilemma kimi dəyərləndirənlər oldu.
Özünü yoxlamaq
istəyirsənsə, seçimin var
"Fikrimcə,
yeni model «Ödənişini et, özünü yoxla» seçimini verir. Amma planlama baxımından
qeyri-müəyyənliklər yaradır” deyən «Kaspi»
Təhsil Şirkətinin direktoru Elnur Əliyevin sözlərinə görə, yeni model
abituriyentlərə imtahan zamanı başqa ixtisas üzrə yalnız seçim imkanı verir. Yəni
ikinci qrupda lazımı bal toplayıb, həmin qrup üzrə ixtisas seçməyə onlarda
maraq ola bilər. Bu baxımdan, abituriyentlərin seçim imkanları genişlənir: "Bir
fərq budur ki, qruplar üzrə bəzi fənlər üst-üstə düşür. Buraxılış imtahanlarında
isə bütün fənlər eynidir. Birinci və dördüncü qruplarda, həmçinin ikinci və
dördüncü qruplarda iki fənn üst-üstə
düşür. Belə çıxır ki, abituriyentlər bir qrup üzrə hazırlaşıb ikinci qrup üzrə
də imtahan verməlidirlər. Demək, əlavə imtahan verib özünü yoxlamaq
istəyirsənsə, seçimin var”. E.Əliyev yeni modelin faiz olaraq ciddi dəyişiklik
və ya maraq yaradacağına o qədər də əmin deyil: "Bu, şagirdlər üçün əlavə yük,
özünü riskə atmaqdır. 3 fənnə kifayət qədər vaxt ayıra bilməmək, üstəlik, digər
fənlər üzrə hazırlaşmaq çox az sayda şagirdin bacaracağı iş ola bilər. Əvvəldən
iki qrup üzrə hazırlaşmaq istəyən şagirdlərin ola biləcəyinə inanmıram. Şagird
bəlkə məktəbdə özünü yoxlamaq üçün həmin fənlərə fikir verə bilər. Bu modeldə
ixtisasa məhəbbətlə planlama paralel baş verir”. E.Əliyev hesab edir ki, əgər
abituriyentin hər hansı ixtisasa marağı varsa, o, qarşısına yalnız həmin qrup
imtahanları üzrə hazırlaşmağı məqsəd qoyur. Onu nə qədər həvəsləndirsələr də,
başqa sahəyə köklənmir. Amma bəzi abituriyentlər də var ki, «təki universitetə
daxil olum» deyir ki, onlar üçün hansı qrup üzrə imtahan verməyin fərqi yoxdur.
Yeni model o qrup uşaqların planlaşmasını qəlizləşdirəcək. Həmçinin insanları
bir az çaşbaş sala bilməklə yanaşı, valideynləri "bir əldə iki qarpız tutmaq”
istəyi ilə üz-üzə qoyacaq.
İrəliyə addım
Professor Şahlar Əsgərov isə yeni
modeli "totalitar quruluşdan demokratik keçidə adlamağın pillələri” kimi müqayisələndirir:
"Biz bu keçidi 2-3 pillə ilə də, bir pillə ilə də keçə bilərik. Hər dəfə bir
pillə qabağa gedirik. Bu imtahanların hamısı totalitar mənada imtahandır. Bu
gün dünya tamam başqa şeylər haqda düşünür. Hamı yaxşı bilir ki, bu gün
öyrətdiyimiz biliklər 30 il sonra heç kimə lazım olmayacaq. Belə olan halda, bu
qaydalarla imtahan götürməyin nə mənası var?” Bununla belə yeni modeli "irəliyə addım” adlandıran təhsil eksperti həmçinin
qaydanın abituriyentlərin azadlığını artıracağını güman edir: "Ancaq hədsiz
azadlığın özü də qeyri-azadlığa gətirib çıxarır. Bu cür qərarlar üçün
pedaqoqlar, mütəxəssislər, valideynlər, filosofların və b. fikirləri
öyrənilməlidir”.
Sistem tam oturuşana qədər
dəyişikliklər qaçılmazdır
Qaydaların tez-tez
dəyişməsinin əleyhinə olduğunu deyən təhsil
üzrə ekspert Nadr İsrafilov heç bir
dəyişikliyin birmənalı qarşılanmadığını deyir: «Təcrübə göstərir ki,
bizim tətbiq etdiyimiz qaydalar arzuolunan effekti vermir. Ona görə qaydaların
dəyişdirilməsi və optimallaşdırılması istiqamətində iş getməlidir. Bu
qiymətləndirilmə sistemi ta oturuşana qədər, təkmilləşmə prosesi qaçılmazdır.
Çünki təhsil inkişaf edir, dünya təcrübəsi var. Hal-hazırda təhsil sahəsində
kursumuz təhsilin hamı üçün əlçatan olmasına yönəlib. Bu istiqamətdə bir sıra
işlər görülüb. Məsələn, universitetlərdə hazırlıq kursları yaradılıb. Ötən
ildən başlayaraq, müvafiq balı toplamaq üçün tələbələrə ikinci şans verilib.
Növbəti ildən digər bir şans da veriləcək ki, əlavə qrup üzrə imtahan
versinlər. Bunlar hamısı məzunun ali məktəbə daxil olması üçün daha geniş
imkanlar açır. Hesab etmirəm ki, bunların hamısının keyfiyyət sarıdan
əhəmiyyəti olacaq. Bunu proseslərin gedişatı göstərəcək”. Ekspertin fikrincə, yeni
model gələcəkdə buraxılış və qəbul imtahanlarını birləşdirməkdə, abituriyentin
ali məktəbə qəbulunu təmin etməyin mümkünlüyünə imkan verəcək. Bunlar hamısı eksperiment
xarakterli tədbirlərdir. Təbii ki, bunlar birmənalı qarşılana bilməz”. Ekspert
hesab edir ki, qəbul imtahanlarının 400, buraxılış imtahanlarının maksimum 300 balı
yarıbayarı, proporsional götürülür. Belə ki, həm orta məktəbin bilikləri nəzərə
alınacaq, həm də qəbul imtahan nəticələri əsas götürülüb ümumi bir nəticə
çıxarılacaq: "Bu sistem tam oturuşana qədər dəyişikliklər qaçılmazdır.
Fikrimcə, dəyişilmə prosesi hələ uzun müddət davam edəcək. Hələ tam kütləvi
təmayülləşməyə, 12 illik təhsilə keçmə məsələlərimiz var və bunlar yeni
xarakter alacaq. Hesab edirəm ki, biz yalnız bu qayda ilə kifayətlənən deyilik.
Hərçənd, bu qaydaları tam təkmil hesab etmək olmaz, amma köhnə qaydalarla
müqayisədə şübhəsiz ki, bunlar irəliyə addımdır».
Təbii ki, yeni imtahan modeli abituriyentlərə qeyri müəyyənliyin
gətirdiyi çaşqınlıqla bərabər, yeni fürsət imkanı da verəcək. Ekspertlərin
dediyi kimi, bunu dolayısı ilə arzuladığı qrupdan savayı, bəxtin və ya şansın
gətirəcəyi qrup üzrə imtahan da adlandırmaq olar. Əlbəttə, yeni qayda tətbiq
olunana qədər digər eksperimentlər də çox olacaq...
Təranə Məhərrəmova