Qafqazın ilk idman jurnalistikası magistr proqramı - Reportaj
"Jurnalistlər
xüsusi insanlardır”
Hər yerdən idman nəfəsi duyulur. Həyatlarının müəyyən
hissəsi, yaxud da bütün həyatı idmanla bağlı olan insanlar burada təhsil
alırlar. Atletlər, məşqçilər, futbolçular, fiziki tərbiyə müəllimləri, idman
menecerləri, reabilitasiya mütəxəssisləri...
Xeyr... Bu dəfə idmançılardan yox, jurnalistlərdən
danışacağıq. Artıq bu məkan peşəkar idmançılarla yanaşı, jurnalistlərin də təhsil
məkanına çevrilib. Söhbət idman jurnalistlərindən gedir... Azərbaycan Dövlət Bədən Tərbiyəsi və İdman Akademiyasının idman
jurnalistikası magistr proqramı ilk tələbələrini qəbul edib. Biz də dərs
prosesini izləmək və jurnalistikanın magistr səviyyəsində ilk ixtisaslaşma
proqramı ilə tanış olmaq üçün Azərbaycan Bədən Tərbiyə və İdman Akademiyasına
yollandıq.
İdman
jurnalistlərinin mərkəzi...
İdman jurnalistlərinin təhsil mərkəzi akademiyanın
həyətində 2 ay ərzində xüsusi dizaynla tikilib və universitetin inzibati
binasından kənarda yerləşir. Multimedia Mərkəzi adlanan binada tələbələrin dərs
keçməsi üçün otaqlar, mətbəx, radio-tv otaqları var. Bina sarı, narıncı, göy rənglərlə
dizayn edilib.
Azərbaycan Dövlət Bədən Tərbiyəsi və İdman
Akademiyası bu ixtisasın tədrisi üçün Böyük Britaniyanın Şefield Hallam
Universiteti ilə əməkdaşlıq sazişi imzalayıb və onların təcrübəsini Azərbaycan
təhsil sistemində tətbiq edir. Tədris zamanı bütün dərslər ingilis dilində
keçirilir.
Məlumat üçün bildirək ki, "İdman jurnalistikası”
Qafqazın ilk idman magistr proqramıdır. Proqrama idman media sahəsində tanınmış
beynəlxalq ekspert, Böyük Britaniyadan olan Dan Mason rəhbərlik edir. Tələbələrə
idman jurnalistikasının əsas özəllikləri, media və PR, "online” yazı
bacarıqlarının artırılması, audio və video jurnalistika istiqamətləri tədris
olunur.
Siz şagird
deyilsiniz, mən də müəllim...
Dərsin başlamazdan öncə, proqram rəhbəri Dan Masonla
söhbətləşirik. Dan 30 il professional jurnalistika ilə məşğul olub və dünyanın
25 ölkəsində təlimlər keçib. Rənglər və studiyanın dizaynına Dan qərar verib.
O, artıq 7 ildən çoxdur ki, Azərbaycana gəlib-gedir, müxtəlif layihələrdə
jurnalistlərə yeni media təlimləri keçir.
Dərsin başlamasına sayılı dəqiqələr qaldığı üçün tələbələr
mərkəzə daxil olurlar. Diqqətimizi çəkən əsas məqam isə, tələbələrin Danla səmimi
münasibəti idi. Mütləq bir dəqiqəlik də olsa, müəllimlə görüşür, hal-əhval
tutur və sonra otağa daxil olurlar. Müəllim deyir onlarla səmimi münasibət
qurmalıyam ki, mənə hörmət etsinlər və öyrənməyə can atsınlar: "Birinci dərsdən
onlara demişəm ki, siz şagird deyilsiniz, mən də müəllim. Bura da sinif otağı
deyil. Mən sizin təhsil almağınıza kömək üçün gəlmişəm. Çünki mediada hər şey
sürətlə dəyişir və biz hamımız, o cümlədən özüm də daxil olmaqla başlanğıc səviyyədəyik.
Mediada hər zaman dəyişikliklər olduğu üçün hər birimiz hələ də öyrənirik. Bir-birimizə
hörmət də qarşılıqlı olmalıdır. Mən onlara hörmət etməliyəm ki, onların da hörmətini
qazanım. Çünki biz komandayıq”.
"Siz daha dəyərlisiniz”
Dan deyir ki, Azərbaycanda jurnalistlər çox
istedadlı və öyrənməyə acdırlar: "Azərbaycanda məşhur beynəlxalq idman
jurnalistləri yetişə bilər. Bu ölkədə idman sahəsində dinamizm, inkişaf hiss olunur. Azərbaycanda idman sahəsində
çalışan jurnalistlər öyrənməyə ehtiyac duyurlar və acdırlar. Geniş dünyagörüşləri,
praktik bacarıqları var. Bu bacarıqların üzərində də çox işləyirlər”.
Dan deyir ki, jurnalistlər seçilən və xüsusi
insanlardırlar: "Ətrafımda jurnalistlər olduğu üçün özünü şanslı hesab edirəm.
Azərbaycanda jurnalistlər özlərini qiymətləndirdiklərindən daha artıq dəyərlidirlər.
Eyni işi müxtəlif ölkələrdə görürəm. Bu ölkədə də jurnalistlərin istedadlarının
fərqinə varıram və hər zaman vurğulayıram ki, siz düşündüyünüzdən daha dəyərlisiniz”.
Saat 5-də dərs başlayır. Söhbətimiz maraqlı olsa
da, Dan alman dəqiqliyi ilə hərəkət edir və dərsini tədris etmək üçün həmkarı
adlandırdığı tələbələrinin yanına yollanır.
"Dünyanın istənilən
ölkəsində işləmək imkanı”
Proqramın
layihə meneceri Ellada Mustafayeva deyir ki, Azərbaycanda idman jurnalistikasına
maraq çoxdur: "Bu tədris ilindən etibarən Azərbaycan Dövlət Bədən Tərbiyəsi və
İdman Akademiyasında ilk dəfə olaraq ölkədə yeni yaradılan "İdman
jurnalistikası”, "İdman menecmenti” və "İdman tibbi və reabilitasiya”
ixtisaslarının tədrisinə start verildi. Hər üç ixtisasın təhsil proqramına
daxil edilməsinin əsas məqsədi beynəlxalq idman əmək bazarında rəqabətədavamlı
kadrların hazırlanması və ölkədə günü-gündən inkişaf edən idman sahəsində tələb
olunan peşələr üzrə mütəxəssislərin yetişdirilməsidir. Proqramdan sonra məlum
oldu ki, idman jurnalistikasına maraq çox böyükdür. Proqrama xarici mütəxəssislər
cəlb olunub və məsələyə böyük çərçivədən baxmağa çalışırıq. Tələbələr təhsillərini
başa vurduqdan sonra ölkəmizdən əlavə, dünyanın istənilən ölkəsində
karyeralarını davam etdirə biləcəklər. Dil baryerini aşmaq dünyadakı sərhədləri
aşmağa kömək edir. Buna görə də tədris prosesi ingilis dilində aparılır”.
Proqrama qəbul Dövlət İmtahan Komissiyasının
qoyduğu tələblərə uyğun aparılır. İlkin mərhələ test, ikinci mərhələ isə
müsahibə və qabiliyyət mərhələsidir. E.Mustafayeva deyir ki, idman
jurnalistikasına yalnız oğlanlar yox, qızlar da maraq göstərir: "Məsələn, bu il
proqrama qəbul olan tələbələrimizin 3-ü xanım, 3-ü isə bəydir. Bu isə o deməkdir
ki, proqramda gender bərabərliyi təmin olunub” (gülür-A.Ə).
"Öyrənməyə
acdırlar”
Müəllimdən icazə alıb sakitcə dərsi izləyirəm.
Burada mühit bizim standart auditoriyalarımızdan tam fərqlidir. Müəllim və
şagirdlər hərəkətlidir. Monitorda dərsi izah edən müəllim aktiv hərəkətlərlə
mövzunu tələbələrə çatdırır. Bəzən stolun üstündə əyləşir, bəzən də döşəmənin
üzərində... Tələbələrin də müəllimlə səmimi münasibəti dərslərindəki sərbəstlikdə
özünü göstərir. Müəllimlə rahat ünsiyyətə girir, tez-tez suallar verir, öyrənməyə
can atırlar.
"Bir insan
bütün sahələrdə mükəmməl ola bilməz”
Dərsin başlamasından 90 dəqiqə sonra kofe fasiləsi
elan olunur və tələbələr müəllimlə birlikdə mətbəxə yollanırlar. Kofe hazır
olanadək tələbələrlə söhbətləşirik.
Ramal
İbrahimovjurnalistikada ixtisaslaşmanın tərəfdarıdır. Deyir ki, nəzəri cəhətdən müəyyən
biliklərə sahib olsalar da, proqramda idman jurnalistikasının sirlərinə dərindən
yiyələnirlər: "Mən jurnalistikanı seçdiyim gündən idman jurnalisti olmaq istəyirdim.
Belə proqramın açıldığını bildikdə, çox sevindim və müraciət etdim. Burada daha
çox təcrübə əldə etmək mümkündür. Nəzəri cəhətdən biliklərimiz var, amma bu
kifayət etmir. Bu təhsil yeni olmaqla yanaşı, həm də potensialımızı üzə
çıxarmağa kömək edir”.
MirCavad
Mustafazadəjurnalistika ixtisası üzrə bakalavr təhsili alıb. Onun sözlərinə görə magistr səviyyəsində
idman jurnalistikası ixtisasını seçməsinə səbəb proqramın yeni və innovativ
olmasıdır: "Yeniliklər və ilklər hər zaman maraqlı olur. Mən də təhsilimi yeni
və spesifik sahə üzrə davam etdirmək qərarına gəldim. Düşünürəm ki, gələcəkdə
bu sahədə ixtisaslaşmağımda bu proqram xüsusi rol oynayacaq”.
Zərifə
Bayramova isə
şahmatçıdır. Azərbaycan idmanının beynəlxalq aləmdə tanıtmaq üçün idman
jurnalisti olmaq istəyir: "İdmana marağım uşaqlıqdan var idi. İdman jurnalisti
olmaqda məqsədim isə, idmanı digər ölkələrdə tanıtmaqdır. Özümü bu sahədə təkmilləşdirmək
üçün proqrama müraciət etdim”.
Ayşə Məmmədova isə ixtisaslaşmaq üçün proqrama müraciət edib:
"Jurnalistikada ixtisaslaşmanın olmasını çox istəyirəm. Çünki bir insan bütün
sahələrdə mükəmməl ola bilməz. İxtisaslaşma mütləq olmalıdır. Mən də ümumi
jurnalistikada deyil, jurnalistikanın bir sahəsində peşəkar olmağı qarşıma məqsəd
qoydum”.
Qeyd edək ki, tələbələr fevralda İngiltərəyə gedəcəklər.
Onların proqramın
partnyor universiteti olan Şeffild Hallam-a səfərləri
planlaşdırılır.
Aygün ƏZİZ