Bakı 24°C
Nizami Gəncəvi Beynəlxalq Mərkəzi Çində tərəfdaş oldu
Nizami Gəncəvi Beynəlxalq Mərkəzi (NGBM) Çinin Guandzhou şəhərində
keçirilən "Imperial Spring - 2019" toplantısında tərəfdaş kimi çıxış
edib. Toplantıda NGBM-nin Həmsədri, Latviyanın sabiq Prezidenti, xanım Vaira
Vike-Freiberqanın rəhbərliyi ilə Mərkəzin üzvü olan ondan çox sabiq ölkə və
hökumət başçıları iştirak edib.
BMT-nin Davamlı İnkişaf proqramı və Beynəlxalq qaydalara əsaslanan
dünya nizamına həsr olunmuş konfransın açılışında Çin Xalq Respublikasının
Vitse-prezidenti Vanq Qishan da iştirak edib.
Çin Xalq Respublikasının Prezidenti cənab Xi Jinping toplantıda
iştirak edən sabiq ölkə və hökumət başçılarını qəbul edərək, toplantı
çərçivəsində qaldırılan məsələləri müzakirə ediblər. Görüş zamanı xanım Vaira
Vike-Freiberqa Nizami Gəncəvi Beynəlxalq Mərkəzinin bu əməkdaşlığa qoşulmasının
əhəmiyyəti, Mərkəz tərəfindən illik təşkil olunan Qlobal Bakı Forumunun artan beynəlxalq
nüfuzunu xüsusi olaraq vurğulayıb.
Mərkəzin üzvü Bosniyaa və Herseqovinanın sabiq prezidenti Mladen
İvanic isə "Bir Kəmər, bir yol", "17+1" layihələrinin
Qafqazdan başlayaraq Şərqi-Avropa ölkələrinin inkişafında göstərdiyi önəmli
dəstəkdən danışıb, Azərbaycan Respublikası Prezidentinin dəstəyi ilə keçirilən
Qlobal Bakı Forumları çərçivəsində mütəmadi olaraq Çinlə müzakirə və fikir
mübadilələrinin aparılmasının mühüm rolunu vurğulayıb.
