Kirayə mənzil bazarında qiymətlər sabitləşir
Bakıda sentyabr ayında
kirayə mənzillərin qiyməti bahalaşıb. "MBA Group" konsaltinq
şirkətinin baş direktoru, daşınmaz əmlak sahəsində ekspert Nüsrət İbrahimov
Trend-ə deyib ki, kirayə mənzil bazarında qiymətlərdə ay ərzində artım 4,63
faiz təşkil edib.
N.İbrahimov bildirib ki,
qiymətlərin artmasına kirayə mənzil bazarında aktivliyin yüksəlməsi səbəb olub.
O qeyd edib ki, ali təhsil müəssisələrində dərslərin başlanması ilə əlaqədar
olaraq, Bakıya çoxlu sayda tələbələr gəlir və kirayə mənzil axtarırlar: "Bu
baxımdan, bazarda aktivlik artır və təbii ki, bu da qiymətlərin yüksəlməsinə
səbəb olur”.
Ekspert bildirib ki,
növbəti aylarda qiymətlərin stabilləşəcəyi ehtimal edilir.
Qiymət
artımının səbəbini və bunun nə zamanadək davam edəcəyini, ümumiyyətlə bu sahədə
baş verən qiymət artımını tənzimləməyin mümkün olub-olmadığını öyrənməyə
çalışdıq.
İqtisadçı
Rəşad Həsənov qiymət artımına bir sıra
faktorların təsir etdiyini deyir: "Kirayə bazarında artım əslində bir neçə
faktordan qaynaqlanır. İlk olaraq təhsil ilinin başlaması ilə əlaqədar olaraq
son iki ayda tələbələrin Bakıya, xüsusilə də Abşeron yarımadasına axını
sürətləndi. Və bu da öz növbəsində bazarı aktivləşdirdi. Digər nüanslardan biri
isə, son on ildə Azərbaycanda formalaşmış məsələlərdən biridir ki, qış aylarının hava və infrastruktur şəraitindən asılı
olaraq regionlarda yaşayan insanların paytaxta müvəqqəti axını müşahidə olunur.
Bu özü də bazarda əlavə tələb formalaşdırır. Başqa bir məsələ isə, xüsusilə
2015-2016-cı illərdə Bakı şəhərindən işlərini itirdikləri üçün rayonlara geri
qayıdanların bir qismi yenidən işləmək üçün Bakıya gəlirlər. Çünki
iqtisadiyyatın müəyyən qədər aktiv olduğu yer paytaxtdır. Bu insanların gəlməsi
də, bazarda qiyməti artıran üçüncü faktor kimi çıxış edir”.
Azərbaycan Qiymətləndiricilər Cəmiyyətinin İdarə Heyətinin sədri Ramil Osmanlı hazırda qiymətlərdə
sabitləşmə olduğunu deyir: "Kirayə bazarında qiymət artımı oldu və artıq
dayanıb, sabitləşmə gedir. Yay aylarından başlayan artım sentyabr ayının
sonlarına doğru sabitləşmə ilə müşahidə olundu. İndi isə qiymətlərdə artım və
ya azalma müşahidə edilmir. Qiymət stabildir. Artımın səbəbi isə tələbələrin
axını ilə əlaqədar idi. Və tələbin artımı qiymət artımına da səbəb oldu.
Amma hazırda kirayə bazarında dinamik
bir dəyişiklik müşahidə olunmur. Adətən kirayə bazarında qiymət dəyişikliyi bir
yay aylarında tələbələrin gedib gəlməsi ilə bağlı, bir də geniş miqyaslı
söküntü işləri görülərkən olur. Digər zamanlarda kirayə mənzillərinin
qiymətində elə də ciddi dəyişiklik olmur. Və hələ ki, dəyişiklik gözlənilmir”.
Günel
Azadə