Sonuncu xəbərdarlıq - FOTOLAR
Əgər ermənilər bir daha Azərbaycan-Ermənistan sərhədində təxribat
törətməyə cəhd
göstərsələr,
yerindəcə məhv ediləcəklər
Azərbaycan Silahlı Qüvvələri Vətən Müharibəsində
Ermənistan ordusunu darmadağın edərək işğal altındakı torpaqlarımızı azad edib.
Bununla da 30 ilə yaxındır həlli mümkün olmayan bir münaqişə tarixin arxivinə
atılıb, Azərbaycanın ərazi bütövlüyü təmin olunub. Döyüş meydanında məğlub olan
Ermənistan təslimçi müqaviləyə imza atıb, üzərinə müəyyən öhdəliklər götürüb.
Bu öhdəliklərdən irəli gələrək erməni silahlı birləşmələri Ağdam, Kəlbəcər və
Laçın rayonlarını bir güllə atılmadan tərk ediblər. Növbəti mərhələlərdə
Qarabağdakı separatçı qüvvələrin, silahlı daşnakların ərazini tərk etməsi,
kommunikasiyaların qurulması, o cümlədən Naxçıvan-Zəngəzur dəhlizinin açılması
kimi şərtlər yerinə yetirilməlidir. Bu tələb Azərbaycan, Rusiya və Ermənistan
liderlərinin 2020-ci il noyabrın 10-da imzaladığı Üçtərəfli Bəyanatda yer alıb.
Lakin beli qırılan Ermənistan, hələlik bu şərtləri yerinə yetirməyib. Başlarına
zərblə enən "Dəmir yumruq”dan nəticə çıxarmayan bəzi erməni siyasətçiləri Üçtərəfli
Bəyanatın şərtlərini tam yerinə yetirmək əvəzinə pafosa, populizmə üstünlük
verir, Azərbaycan ərazilərini yenidən işğal etmək barədə cəfəng bəyanatlar səsləndirirlər.
Ermənistanın eks-prezidentləri, revanşist qüvvələrin timsalında belə sərsəmləmələr
daha çox diqqət çəkir. Məhz onların təhriki və təsiri ilə hətta Azərbaycana
qarşı təxribatlara da əl atılır. Sonuncu dəfə bir neçə gün bundan öncə Azərbaycan-Ermənistan
dövlət sərhədində "içkili” ermənilərin azərbaycanlı sərhədçilər istiqamətində
havaya atəş açmaları qeyd olunanlara daha bir misaldır. Buna qarşılıq olaraq Azərbaycan
sərhdçiləri tam döyüş hazırlığı vəziyyətinə gətirilib. Komandanlıq tərəfindən əmr
verilib ki, əgər ermənilər növbəti belə bir təxribata əl atarsa, onlara cavab ən
sərt şəkildə verilsin.
Düşmən yerindəcə məhv
ediləcək
Prezident İlham Əliyev aprelin 26-da Cəbrayıl və Zəngilan
rayonlarına səfəri zamanı Dövlət Sərhəd Xidmətinin hərbi hissəsinin açılışında
çıxış edərkən bu məsələyə xüsusi diqqət çəkib. Müzəffər Ali Baş Komandan
bildirib ki, bu gün Silahlı Qüvvələrimiz qarşıda duran bütün vəzifələri icra
edir, eyni zamanda, sərhədçilərimiz hazırda işğaldan azad edilən ərazilərdə Azərbaycan-Ermənistan
sərhədini qoruyur. Prezident bu sərhədin bərpa edildiyini, sərhəd boyunca bütün
lazımi infrastruktur işləri aparıldığını, texnikaların səfərbər edildiyini
vurğulayıb. Deyib ki, düşmən sərhədi pozmağa cəhd edərsə, yerindəcə məhv ediləcək:
"Azərbaycan-Ermənistan sərhədinin uzunluğu 500 kilometrə yaxındır. Bu sərhəd 30
ilə yaxın müddət ərzində işğalçı qüvvələrin əlində idi. Biz Vətən Müharibəsində
Qələbə qazanaraq bu sərhədi də tam bərpa etdik, Zəngilan və Qubadlı
rayonlarını, Laçın rayonunun bir hissəsini döyüşərək azad etdik. Laçın
rayonunun böyük hissəsini və Kəlbəcər rayonunu düşmən, artıq məcbur olub
kapitulyasiya aktını imzalayaraq bizə qaytarıb. Hazırda o ərazilərdə lazımi işlər
aparılır. Ancaq əfsuslar olsun ki, Ermənistanda baş qaldıran revanşist qüvvələr
yenə də ölkəmizə qarşı ittihamlarla çıxış edərək, Azərbaycana qarşı ərazi
iddiası irəli sürürlər. Onlara, bax, buradan xəbərdarlıq etmək istəyirəm ki, bu
çirkin əməllərdən əl çəksinlər, yoxsa onların axırı pis olacaq. Biz Vətən
müharibəsi dövründə kimin kim olduğunu göstərdik. "Dəmir yumruq” düşmənin
başını əzdi. Bu yaxınlarda Azərbaycan-Ermənistan sərhədinin Zəngilan istiqamətində
bizim sərhədçilərimizə qarşı edilən hərbi təxribat sonuncu belə cəhd olmalıdır.
Biz təmkinlik göstərərək bu təxribata cavab vermədik. Amma bu, sonuncu xəbərdarlıqdır.
Əgər bir daha buna oxşar cəhd göstərilərsə, düşmən yerindəcə məhv ediləcək”.
Ermənilər
təxribatlara son qoymalıdırlar
Milli Məclisin Müdafiə,
təhlükəsizlik və korrupsiya ilə mübarizə komitəsinin sədr müavini Hikmət
Babaoğlu mövzu ilə bağlı fikirlərini "Kaspi” qəzetinə bölüşərək deyib ki, erməni faşizmi dünyanın ən eybəcər
və ən vandal faşizmi olduğu kimi, ermənisayaq revanşizm də olduqca təhlükəli və
gözlənilməz ola bilər. Millət vəkilinin sözlərinə görə, Azərbaycan revanşistlərin
başını "Dəmir yumruq”la əzməyə həmişə hazır olmalıdır və hazırdır: "Təsadüfi
deyil ki, Prezident İlham Əliyev daima öz çıxışlarında Azərbaycanın və dünyanın
ictimai diqqətini bu məsələyə çəkir və revanşistlərə qəti xəbərdarlıq edir.
Hamıya aydındır ki, Ermənistanda belə qüvvələr var və onlar tək deyillər. Çünki
revanşizmi xaricdən dəstəkləyən, erməni olan və olmayan digər güc mərkəzləri
var. Əgər belə olmasaydı, qəhrəman Azərbaycan Ordusu tərəfindən darmadağın edilən,
faktiki olaraq diz çökdürülənermənilər revanşizmə cəhd edəcək cəsarəti
özlərində tapa bilməzdilər. Elə Zəngilan rayonunun Seyidlər kəndi istiqamətində
bizim sərhəd qoşunlarımıza atəş açılması da bunun təzahürüdür. Azərbaycan Prezidenti
ermənilərin bu alçaq hərəkətinə məhz Zəngilandan, orada xidməti istifadəyə
açılan sərhəd zastavasından cavab verdi. Əslində bu cavabdan daha çox, son və qəti
xəbərdarlıq idi. Bu xəbərdarlıq ermənilərlə bərabər, onların havadarlarına da
edilən xəbərdarlıqdır. Prezident İlham Əliyev şəxsi heyət qarşısında çıxış edən
Ali Baş Komandan kimi dedi ki, bir daha buna oxşar cəhd göstərilərsə, düşmən
yerindəcə məhv ediləcək. Düşmənin yerindəcə necə məhv edildiyini isə ermənilər
çox yaxşı bilirlər. Çünki 44 günlük müharibədə bunu əyani şəkildə görüblər və
tarixləri boyu unutmayacaq bir dərs alıblar. Əgər yeni bir tarixi dərs daha
almaq istəmirlərsə, bənzər təxribatlara son qoymalıdırlar”.
Düşməni
cəzalandırmağın yolunu bilirik
Milli Məclisin
deputatı Naqif Həmzəyev də təəssüflə
qeyd edib ki, hələ də Ermənistanda faşist ideologiyasına xidmət edən və gerçəklikləri
dərk etməyən siyasətçilər qalıb. Millət vəkilinin qənaətincə, onları bu məsələlərdə
qızışdıran və daimi sülhə nail olmaq üçün maneələr törədən revanşist qüvvələr də
mövcuddur: "Bütün bunlara baxmayaraq, Azərbaycan Qafqazda yeni gerçəkliyi
formalaşdıra bildi və ərazi bütövlüyünü bərpa etdi. Hal-hazırda Azərbaycan Ermənistanla
sərhəd boyu öz sərhəd qoşunlarını yerləşdirir və sərhəd qoşunlarına məxsus hərbi
hissələr yenidən qurulur. Azərbaycan Ordusunun gücü bütün dünyaya bəllidir. Cənab
Prezident bütün çıxışlarında Ermənistandakı revanşist qüvvələrə reallığı dərk
etməyə və Azərbaycana qarşı ərazi iddialarından əl çəkməyə çağırıb. Sərhədçilər
qarşısındakı çıxışında da Prezident buna işarə vurdu. O, düşmənə bir daha
xatırlatdı ki, revanşist fikirlərdən əl çəkməyəcəyiniz təqdirdə, biz sizi cəzalandırmağın
yolunu bilirik”.
Azərbaycan
regionda diqtə edən tərəfdir
Deputat N.Həmzəyev bildirib ki, Azərbaycan regionda
daim sülhün bərqərar olmasını istəyir və iqtisadi inkişafın tərəfdarıdır: "Azərbaycan
öz üzərinə götürdüyü missiyanı layiqincə yerinə yetirir. Azərbaycan regionda
kommunikasiya xətlərinin bərpa olunacağını və Ermənistanın da bu məsələdə öz
töhfəsini verməyə məcbur olduğunu bildirib. Biz tezliklə Zəngilandan Naxçıvana
gedən Zəngəzur dəhlizi boyu Şərqi Zəngəzurla Qərbi Zəngəzuru birləşdirən dəmir
yolu və avtomobil yollarının açılışını gözləyirik. Hərçənd ki, düşmən işğal
altında olan ərazilərin kommunikasiya xətlərini və xüsusilə dəmir yolu xətlərini
məhv edib. Ancaq Azərbaycanın iqtisadi gücü imkan verir ki, tezliklə bu dəmir
yolu xətlərini bərpa edək və Bakıdan birbaşa Naxçıvana, oradan da Türkiyəyə dəmir
yolu və avtomobil yolu ilə səyahətlərimizi edə bilək. İstənilən halda, Azərbaycan
regionun ən güclü dövlətidir. Azərbaycan regionda diqtə edən tərəfdir. Azərbaycan
Ermənistanı məcbur edəcək ki, öz üzərinə düşən öhdəliyi yerinə yetirsin. Əks təqdirdə
"Dəmir yumruq” öz işini görməyə hazırdır”.
Ermənistan
xilas olmaq istəyirsə...
Demokratik
Maarifçilik Partiyasının sədri, Milli Məclisin deputatı Elşən Musayev də hesab edir ki, Azərbaycan Prezidentinin Cəbrayıl
və Zəngilandan Ermənistana ünvanladığı fikirlər oradakı revanşist qüvvələrə son
və ciddi xəbərdarlıqdır: "Cəbrayılda Dövlət Sərhəd Xidmətinin hərbi hissəsinin
açılması Azərbaycanın işğaldan azad olunmuş ərazilərdə sərhədlərinə tam nəzarət
etməsinin göstəricisidir. Dövlətimizin başçısı hərbi hissənin açılışında çox önəmli
mesajlar verdi və Ermənistandakı revanşist qüvvələrə ciddi xəbərdarlıq etdi.
Bütün bunlar onu deməyə əsas verir ki, Azərbaycan etibarlı əllərdədir.
Prezident İlham Əliyev məhz öz əzmi və cəsarəti ilə bizə bu günləri bəxş edib.
Daha dəqiq desək, Azərbaycanın Zəfəri Prezidentimizin yürütdüyü məqsədyönlü,
müdrik siyasət nəticəsində mümkün olub. Dövlətimizin başçısı hər zaman deyirdi
ki, biz doğma Qarabağa qayıdacağıq. Prezident hər zaman olduğu kimi, bu dəfə də
verdiyi sözün üstündə durdu. Müzəffər Ali Baş Komandan bizi Zəngilan, Cəbrayıl,
Şuşalı və bütövlükdə, Qarabağlı günlərə qaytardı. Ərazi bütövlüyümüzü bərpa
etdi və bu gün böyük xilaskarın özü artıq mesajlarını Qarabağdan ünvanlayır, dəyərli
fikirlərini əzəli torpaqlarımızda söyləyir, gələcəklə bağlı planlarını, tövsiyələrini
doğma Qarabağımızdan elan edir. Əgər Ermənistan xilas olmaq istəyirsə,
revanşist xülyaya qapılmalı deyil. Ermənistan öz nicatı üçün Azərbaycanın bölgədə
sülh və əməkdaşlığın bərpası ilə bağlı təşəbbüslərinə qoşulmalıdır”.
Rufik
İSMAYILOV