Rabitə və İnformasiya Texnologiyaları Nazirliyinin "Aztelekom.Net" internet provayderi "Aztelekom" İstehsalat Birliyi şəbəkəsinin abunəçiləri üçün MDB məkanında ilk dəfə olaraq internetə "parol"suz giriş imkanı verən xidmətin tətbiqini davam etdirir. RITN-in mətbuat xidmətinin rəhbəri Müşfiq Əmirovun "APA-Economics"ə verdiyi məlumata görə, bu xidmətin regionlarda uğurlu tətbiqi paytaxt sakinləri arasında da maraq doğurduğundan, "Aztelekom" və Bakı Telefon Rabitəsi İstehsalat birliklərinin birgə layihəsi olaraq bu xidmətin BTRİB şəbəkəsinin abunəçiləri də kompyuterlərində "şəbəkə bağlantıları" pəncərəsinin "qoşulma nömrəsi" qrafasına "178" yazıb "qoşul" komandasını verməklə internetə qoşula bilərlər. Xidmət "Aztelekom.net" İnternet xidmətləri mərkəzinin istifadəçiləri üçün internetdən bir saatlıq istifadə üçün 0,3 manat həcmində olmaqla, dəqiqələrə görə hesablanan xidmət haqqı abunəçinin ünvanına göndərilən ümumi ödəniş qəbzində nəzərə alınır və bu zaman qəbzdə istiqamət üzrə kod əvəzinə "178" - internet servis kodu qeyd olunur.
Tətbiq olunan xidmətin əsas üstünlüyü ilk növbədə istifadəçilər üçün rahat, sadə, etibarlı və ən başlıcası, vaxt itkisinin qarşısını almağa imkan verən internet xidmətinin təşkilidir. Belə ki, "178 - "parol"suz İnternet" xidmətinin istifadəçiləri internetə qoşulmaq üçün müqavilə bağlamaq və ya internet kartlarını əldə etmək məcburiyyətindən azaddırlar ki, bu da öz növbəsində həm vaxta qənaət, həm də telefon xətti olan istənilən yerdən internetə çıxış imkanının olması baxımından əlverişlidir.

+  -  Çap