Apteklərdə respiratorlar 10-15 qəpiyə satılır

Qoruyucu maskalara tələbatın artması ilə əlaqədar respiratorların süni qıtlığının yaradılması və qiymətin şişirdilməsi hallarının qarşısını almaq məqsədilə aparılan yoxlamalar davam edir. İqtisadi İnkişaf Nazirliyi yanında Antiinhisar Dövlət Xidməti tərəfindən keçirilən bu yoxlamalar Səhiyyə Nazirliyinin mütəxəssisləri ilə birgə aparılır. İqtisadi İnkişaf və Səhiyyə nazirliklərinin birgə məlumatına görə, yoxlamalar zamanı bir sıra apteklərdə qoruyucu maskaların qiymətinin şişirdilməsi hallarına rast gəlinib. Qanun pozuntusuna yol vermiş şəxslər barəsində qanunvericiliyə müvafiq tədbirlər görülüb. Hər iki qurumun mütəxəssisləri hesab edirlər ki, artıq görülən işlər öz nəticəsini verməkdədir. Belə ki, sonuncu monitorinqlər zamanı apteklərdə satışda kifayət qədər qoruyucu maskanın olduğu və bir ədəd respiratorun 10-15 qəpiyə satıldığı müəyyən edilib. Bununla belə, İqtisadi İnkişaf Nazirliyi yanında Antiinhisar Dövlət Xidməti qoruyucu maskalar alarkən qiymət şişirdilməsi halları ilə rastlaşdıqda vətəndaşlara Dövlət Xidmətinə məlumat verməyi tövsiyə edir. Bunun üçün 433-63-52 əlaqə telefonuna zəng etmək kifayətdir.


HƏQİQƏT

+  -  Çap