Berlində Almaniyadakı Azərbaycanlıların Koordinasiya Mərkəzi İdarə Heyətinin növbəti iclası keçirilib. Diasporla İş üzrə Dövlət Komitsəinin mətbuat xidmətindən APA-ya verilən məlumata görə, iclasda Almaniyadakı Azərbaycan diasporunun fəaliyyətinin daha da inkişaf etdirilməsi yolları, 2009-cu il dekabrın 31-də Dünya azərbaycanlılarının həmrəylik gününün qeyd olunması, eləcə də 2010-cu il üçün nəzərdə tutulmuş tədbirlər planı üzrə təkliflər müzakirə edilib. Sonra iclas Berlin şəhərindəki Azərbaycan və Türk diasporu nümayəndələrinin iştirakı ilə davam edib. toplantıda Azərbaycanın Almaniyadakı səfiri Pərviz Şahbazov, Avropa Azərbaycanlıları Konqresinin prezidenti Başar Kömür və digər diaspor fəalları çıxış ediblər. Müzakirələr əsasən Türkiyə ilə Ermənistan arasında münasibətlərinin normallaşdırılması istiqamətində atılan addımların Dağlıq Qarabağ münaqişəsinin həllinə göstərə biləcəyi təsir və türk diasporu ilə əməkdaşlığın möhkəmləndirilməsi məsələlərinə həsr olunub. B.Kömür Türkiyə və Azərbaycan arasında tarixi qardaşlıq, dostluq əlaqələrinin belə ağır sınaqlar zamanı qorunub saxlanılmasının vacibliyini vurğulayıb. Qeyd edilib ki, hər hansı iki dövlətin arasında əlaqələrin yaradılması həmin dövlətlərin suveren haqqıdır. Lakin mövcud vəziyyətdə Türkiyə ilə Ermənistan arasında məhz Qarabağ münaqişəsinı, Azərbaycan torpaqlarının işğalına görə kəsilmiş münasibətlərinin yenidən bərqərar olması, sərhədlərin açılması ilə bağlı müzakirəlırin aparılması Azərbaycan dövlətinin maraqlarına ziddir. İclasda iştirak edən Avropa Azərbaycanlılar Konqressinin fəxri prezidenti Bahəddin Qaya, Azərbaycan diasporunun nümayəndələri Nüsrət Delbəstə, İbrahim Əhrari, İsmayıl Əmikişiyev, Əhməd Yazdani, Türk icmasından Cumali Kanqal, Şerife Bulca da bu mövzu ətrafında öz fikirlərini açıqlayıblar.

+  -  Çap