İƏİT-nin Maliyyə Tədbirləri üzrə İşçi Qrupunun Azərbaycana münasibətdə tətbiq etdiyi monitorinq rejimi aradan qaldırılıb

Parisdə İqtisadi Əməkdaşlıq və İnkişaf Təşkilatının (İƏİT) Maliyyə Tədbirləri üzrə İşçi Qrupunun (FATF) növbəti plenar iclası keçirilmişdir. İclasda Azərbaycan Respublikasının Qiymətli Kağızlar üzrə Dövlət Komitəsinin sədri Rüfət Aslanlının rəhbərliyi ilə nümayəndə heyəti iştirak etmişdir. Bununla bağlı oktyabrın 27-də Qiymətli Kağızlar üzrə Dövlət Komitəsində mətbuat konfransı keçirən komitə sədri Rüfət Aslanlı məlumat vermişdir ki, plenar iclasın gündəliyinə FATF-ın xüsusi missiyasının Azərbaycan üzrə hazırladığı hesabatın müzakirəsi məsələsi də daxil edilmişdi. Müzakirələr zamanı Azərbaycan hökumətinin pulların yuyulması və terrorçuluğun maliyyələşdirilməsinə qarşı mübarizə sahəsində (PYTMM) qısa müddət ərzində əldə etdiyi əhəmiyyətli tərəqqi və hökumətin nümayiş etdirdiyi siyasi iradə nəzərə alınaraq, ölkəmizə münasibətdə tətbiq edilən monitorinq rejiminin dayandırılmasına dair qərar qəbul edilmişdir.  
Bildirilmişdir ki, FATF “Böyük Yeddilərin” Paris zirvə toplantısının qərarına əsasən yaradılmışdır. Təşkilat PYTMM sahəsində fəaliyyətin beynəlxalq standartlarını müəyyən edir, habelə onların ölkələr tərəfindən tətbiqini qiymətləndirir və müvafiq tədbirlər görür. Hazırda qurumun 36 üzvü vardır. Bundan əlavə, FATF şəbəkəsi daxilində eyni mandata malik 8 regional qurum, o cümlədən Azərbaycan Respublikasının da daxil olduğu Avropa Şurasının Pulların Yuyulmasına və Terrorçuluğun Maliyyələşdirilməsinə Qarşı Tədbirlərin Qiymətləndirilməsi üzrə Ekspert Komitəsi (MONEYVAL) fəaliyyət göstərir.
FATF ötən il 140-a yaxın ölkədə PYTMM sahəsində vəziyyəti qiymətləndirilmiş və qlobal maliyyə sistemi üçün təhlükə törədən ölkələrin siyahısını tərtib etmişdir. Təşkilat ayrıca olaraq müvafiq sahədə müəyyən boşluqlara malik, lakin onların aradan qaldırılması üçün siyasi iradəyə və xüsusi fəaliyyət planına malik ölkələri də müəyyən etmişdir. Bu ilin fevralında FATF Azərbaycanın PYTMM sahəsində müvafiq fəaliyyət planının monitorinqinə dair qərar qəbul etmişdir.
Ötən dövrdə Azərbaycan nümayəndə heyəti FATF-a PYTMM sahəsində fəaliyyətin təkmilləşdirilməsi və beynəlxalq standartlara uyğunlaşdırılması istiqamətində ölkədə həyata keçirilmiş tədbirlər, o cümlədən qanunvericilik bazasının beynəlxalq norma və standartlara uyğunlaşdırılması, PYTMM sahəsində infrastrukturun formalaşdırılması (Azərbaycan Mərkəzi Bankının yanında Maliyyə Monitorinq Xidmətinin təsis edilməsi, müvafiq resurslarla təmin edilməsi və fəaliyyətə başlaması) və müvafiq sahədə beynəlxalq əməkdaşlığın genişləndirilməsi barədə geniş hesabat təqdim etmişdir. Hesabatın müzakirəsi əsasında cari ilin sentyabrında ölkəmizə səfər etmiş xüsusi missiyanın rəyi nəzərə alınmış və  FATF oktyabrın 22-də Azərbaycana münasibətdə tətbiq edilən monitorinq rejiminin dayandırılmasına dair qərar qəbul etmişdir.
Xatırladaq ki, Azərbaycan Qətərlə birlikdə yeni prosedur qaydalar üzrə monitorinq rejiminin dayandırıldığı ilk ölkədir.

+  -  Çap