Bleyer oxucularla görüşməyəcək

Böyük Britaniyanın sabiq baş naziri Toni Bleyer oxucuları ilə növbəti görüşünü təxirə sala bilər. Keçmiş baş nazir hərbi əməliyyatlar əleyhinə çıxış edən nümayişçilərlə bir daha üzləşməmək üçün Londonda planlaşdırılan görüşdən imtina etməyi düşünür. Qeyd edək ki, ötən həftə İrlandiyanın Dublin şəhərində oxucuları ilə görüşə gələn Toni Bleyer aksiya iştirakçıları tərəfindən ayaqqabı və yumurta atəşinə məruz qalıb. Etiraz aksiyası zamanı ingiltərəli nazir xəsarət almasa da, polis dörd nəfər nümayişçini saxlayıb. “Düzdür, yaranmış vəziyyət məni olduqca narahat edir. Oxucularla görüşmək üçün artıq xərc və ya narahatlığın yaranmasını istəmirəm. Məhz bu səbəbdən hazırda bu məsələ üzərində düşünürəm” - deyə Toni Bleyer bildirib.
Qeyd edək ki, Toni Bleyerin yeni kitabı Böyük Britaniya, ABŞ və Kanadada eyni zamanda satışa çıxarılıb. Kitabın satışı rekord həddə çataraq, ən yaxşı satılan kitablar siyahısına daxil olub. Müəllifi olduğu kitabda Bleyerin başqaları ilə yaşadığı çətin münasibətlər, həmçinin artıq sabiq baş nazir olan Qordon Braun, eləcə də şahzadə Diananın ölümü, İraqda aparılan müharibə və. s haqda xatirələri yer alıb.

+  -  Çap