Üç nəfər yol qəzasının qurbanı olub

Respublikanın avtomobil yollarında ölümlə nəticələnən bir neçə yol-nəqliyyat hadisəsi qeydə alınıb. DİN-in mətbuat xidmətindən «Kaspi»yə verilən məlumata görə, Binəqədi rayonu ərazisində, Sulutəpə qəsəbə sakini Elşən Şirzadovun idarə etdiyi “VAZ-2109” markalı və Qobustan rayon sakini Zamiq Kərimovun idarə etdiyi “KamAZ” markalı avtomaşınlar toqquşub. Nəticədə E.Şirzadov hadisə yerində dünyasını dəyişib.
Goranboy rayonu ərazisində Kəlbəcər rayon sakini Şahrux Yunisov “Azərİnşaat” MMC-nə məxsus “Toyota RAV” markalı avtomaşını idarə edərkən Dəliməmmədli şəhər sakini Hidayət Sadıqovu vurub. Nəticədə H.Sadıqov hadisə yerində dünyasını dəyişib. Kəpəz RPŞ əməkdaşlarının həyata keçirdikləri əməliyyat-axtarış tədbirləri nəticəsində Nuriyyə Həsənəliyevanın xəsarət alması ilə nəticələnən yol-nəqliyyat hadisəsinin törədən şəxs müəyyənləşdirilib.  Hadisəni törədən “VAZ-2107” markalı avtomaşının sürücüsü, Yevlax şəhər sakini Zaur Cabbarov saxlanılıb. 
Bərdə rayonunun Xəsili kəndi ərazisində, kənd sakini Namiq Hüseynovun idarə etdiyi “T-28” markalı traktorun qoşqusundan həmkəndlisi İnşallah Şıxıyev yıxılıb. Təkərin altına düşməsi nəticəsində İ.Şıxıyev hadisə yerində dünyasını dəyişib. Hər dörd faktla bağlı araşdırma aparılır. 

+  -  Çap