Əli Əhmədov:  “Mətbuat Şurası “qara piar” kampaniyasının əleyhinə “dişsiz” bəyanatlar vermək əvəzinə, bunun qarşısını almaq üçün təsirli addımlar atmaq barədə düşünməlidir”

«Siyahı elan olunanda bilinəcək ki, orada kimlərin adları var. Bunu ən zəruri vaxtda edəcəyik. Təbii ki, siyahı təqdim olunana qədər bu siyahının üzərində iş aparacağıq. Digər partiyalarda da belədir. Bütün bunlar tamamilə normal haldır». Bu fikri APA-ya müsahibəsində Yeni Azərbaycan Partiyasının (YAP) sədr müavini, partiyanın icra katibi Əli Əhmədov deyib.
Əli Əhmədov son vaxtlar mətbuatda aparılan “qara piar” kampaniyasına da münasibət bildirib.
«Mən ümumiyyətlə, nəinki seçki kampaniyasının gedişində, bütün vaxtlarda ayrı-ayrı insanların ləyaqətinə toxunan yazıların çap olunmasının əleyhinəyəm. Xüsusilə də seçki kampaniyası dövründə belə üsullardan istifadə edilməsini buna əl atanların zəifliyi sayıram. Biz özümüzü zəif hesab etmirik. Bu mənada Yeni Azərbaycan Partiyası olaraq bizim hansısa “qara piar” elementlərindən istifadə etməyə ehtiyacımız yoxdur. Ancaq təəssüf hissi ilə bildirim ki, YAP-a, YAP tərəfindən əvvəllər namizədliyi irəli sürülmüş, yəqin ki, bu il keçiriləcək seçkidə də namizədliyi irəli sürüləcək namizədlərə qarşı “qara piar” kampaniyasından istifadə ediblər. Bunu da bizim opponentlərimiz edib. Bununla da onlar dolayısı yolla özlərinin zəifliyini etiraf etmiş olublar. Digər tərəfdən, hesab edirəm ki, Mətbuat Şurası “qara piar” kampaniyasının əleyhinə “dişsiz” bəyanatlar vermək əvəzinə, bunun qarşısını almaq üçün təsirli addımlar atmaq barədə düşünməlidir. Şura bu mexanizmləri işləyib hazırlaya bilər. Ancaq istənilən halda “qara piar”a qarşıyam.

+  -  Çap