Fəaliyyətində ciddi nöqsanlar aşkarlanan Azərbaycan Beynəlxalq Universitetinin lisenziya müddəti dayandırıldı

Təhsil Nazirliyinin mətbuat xidməti Azərbaycan Beynəlxalq Universitetinin (ABU) fəaliyyətinin dayandırılması ilə bağlı məlumat yayıb. Məlumatda bildirilir ki, sentyabrın 1-də təhsil naziri Misir Mərdanov ABU-nun fəaliyyətinə verilmiş xüsusi razılığın (lisenziyanın) qüvvədə olma müddətinin uzadılmaması barədə əmr imzalayıb. Əmrdə qeyd olunur ki, Azərbaycan Beynəlxalq Universiteti 1997-ci il oktyabrın 17-də Ədliyyə Nazirliyində dövlət qeydiyyatına alınıb, 1998-ci ildə Təhsil Nazirliyinin 04.12.1997-ci il tarixli 48-11-4058/16 nömrəli qərarı ilə ilk dəfə lisenziya verilib. Universitet 1999-cu ildə 6 il müddətinə, 2005-ci ildə isə 5 il müddətinə yenidən lisenziya alıb.

Cari ilin iyul ayının 8-də Azərbaycan Beynəlxalq Universitetinin fəaliyyətinə verilmiş lisenziyanın müddəti  bitdiyi üçün bu məsələyə yenidən baxılması, eləcə də, bu ali məktəbdə tədris prosesinin təşkili vəziyyətinin araşdırılması məqsədi ilə Ekspert qrupu yaradılıb. Ali məktəbin maddi-texniki bazası ilə tanış olan Ekspert qrupu, universitet rəhbərliyinin və Təhsil Nazirliyinin müvafiq şöbələrinin təqdim etdiyi sənədləri təhlil etməklə araşdırma aparıb. Araşdırma zamanı məlum olub ki, 2005-ci illə müqayisədə Azərbaycan Beynəlxalq Universitetinin maddi-texniki bazasının yaxşılaşdırılması sahəsində müəyyən işlər görülsə də, tədris prosesinin təşkilində normativ sənədlərin tələblərinə riayət olunmayıb, hətta daha ciddi pozuntulara yol verilib. Ekspert qrupunun hazırladığı arayış Təhsil Nazirliyi Lisenziya Komissiyasının iclasında müzakirə olunub. İclasda universitetin ali kollegial idarəetmə orqanı olan Elmi Şurasının imkanlarından istifadə edilmədiyi, ali məktəbin strukturuna daxil olan fakültələrin bir çoxunun mövcud qaydaların tələblərinə zidd fəaliyyət göstərdiyi, əksər kafedralar, xüsusən texniki ixtisaslar üzrə mütəxəssis hazırlayan kafedralarda zəruri avadanlıqla təchiz edilmiş tədris laboratoriyalarının olmadığı üzə çıxıb. Bundan başqa, ABU-da kafedraların işinin düzgün təşkil edilmədiyi, müəllimlərin dərs bölgüsündə müvafiq qaydaların kütləvi şəkildə pozulduğu, universitetdə yüksək ixtisas dərəcəsinə malik olmayan və alimlik dərəcəsi (elmi adı) olmayan müəllimlərə mühazirə dərslərinin verildiyi, mütəxəssis hazırlığı həyata keçirilən ixtisasların tədris planlarının tərtibində qüvvədə olan normativ sənədlərin tələblərinə tam riayət olunmadığı, tədris planlarında bir sıra fənlərin tədrisinə ayrılan saatların normativlərdən az olduğu və ya ümumiyyətlə tədris olunmadığı müəyyənləşib. Araşdırmalar adıçəkilən məktəbdə nizam-intizam qaydalarına riayət edilmədiyini və tələbələrin dərslərə davamiyyətində ciddi nöqsanların olduğunu, qrupların tədris jurnallarının formal olaraq doldurulduğunu, bəzən dəyişdirildiyi və müəllimlərin imzalarının saxtalaşdırıldığını da aşkarlayıb. ABU-nun nöqsanları sırasında tələbələrin biliyinin formal qiymətləndirilməsi, fənlərin tədrisinin pərakəndə şəkildə (müəllimin istədiyi kimi) aparılması, universitetdə tələbə kontingentinin formalaşması, tələbələrin kursdan kursa keçirilməsi, qrup və birləşmələrin təşkilində ciddi pozuntulara yol verilməsi də əks olunub. Eyni zamanda, üzə çıxarılan ciddi pozuntulardan biri də köçürmələrlə bağlıdır. Məlum olub ki, universitetin daxilində bir ixtisasdan digərinə və ya digər ali məktəblərdən tələbələrin köçürülüb, tələbələr sırasına bərpası və xaric olunması zamanı mövcud qanunvericiliyin tələbləri ciddi şəkildə pozulub, hətta saxtakarlığa yol verilib, köçürülmə sənədləri saxtalaşdırılıb. Universitetdə diplom vermə zamanı sənədləşmə və sənədlərin icrası mexanizminin kobud şəkildə pozulması, universitetin Moskva filialının fəaliyyətinin mövcud normativ sənədlərə uyğun təşkil olunmaması da müəyyən edilib.
Lisenziya Komissiyasının yekdil qərarı ilə qeyd olunan nöqsanlar nəzərə alınaraq Təhsil Nazirliyi tərəfindən Azərbaycan Beynəlxalq Universitetinin fəaliyyətinə verilmiş 30.06.2005-ci il tarixli 003283 №-li xüsusi razılığın (lisenziya) müddətinin uzadılmaması barədə qərar qəbul olunub. Eləcə də, universitet rəhbərliyinə 01.09.2010-cu il tarixə qədər ali məktəbdə təhsil alan, təhsili başa çatan, hazırda müxtəlif səbəblərdən təhsilində fasilə yaranan şəxslər barədə məlumatı 10 gün müddətində hazırlayıb Təhsil Nazirliyinə təqdim etmək tapşırılıb. Təhsil Nazirliyinin müvafiq şöbə və struktur rəhbərlərinə isə mövcud qanunvericiliyin tələbləri gözlənilməklə bu ali məktəbə qəbul olunub hal-hazırda təhsil alan və ya təhsili müəyyən səbəblərdən yarımçıq qalmış tələbələrin gələcək təhsilləri ilə bağlı təkliflər hazırlamaq tapşırığı verilib.


Həqiqət İSABALAYEVA

+  -  Çap