Azərbaycanın istedadlı musiqiçiləri Nigar İbrahimova, Mustafa Mehmandarov və Üzeyir Mahmudbəyli Türkiyədə iki konsert proqramı ilə çıxış edəcək TÜRKSOY Gənclər Evi Orkestrinin tərkibinə daxil ediliblər.

Bakı şəhər Mədəniyyət və Turizm İdarəsindən verilən məlumata görə, orkestrin ilk konserti avqustun 2-də Türkiyə Dövlət Rəsm Muzeyində baş tutacaq. İkinci konsert proqramı isə avqustun 4-də Aya İren kilsəsində Birinci İstanbul Beynəlxalq gənclik orkestrləri festivalı çərçivəsində olacaq. İlk konsert proqramına türk dünyasının görkəmli bəstəkarları - Q. Qarayev, S. Mədətova, T. Kajqaliyeva ilə yanaşı, İ.S. Baxın, A. Şnitkenin, D. Şostakoviçin əsərləri də daxil edilib. Qeyd edək ki, TÜRKSOY Gənclər Evi Orkestri təşkilatın baş katibi Düsen Kaseinovun xüsusi dəstəyi ilə yaradılıb və orkestrdə türk dünyası ölkələrindən 21 musiqiçisi var. Bu mədəniyyət layihəsinin həyata keçirilməsində əsas məqsəd türkdilli ölkələrin musiqi potensialının dünya klassik musiqisi ilə sintezi, türk dünyası musiqisinin ən gözəl nümunələrinin təbliğidir. Orkestrin şefi Qazaxıstandan olan uyğur mənşəli maestro Ənvər Əkbərovdur.

+  -  Çap