İnzibati xəta haqqında iş üzrə icraat başlanıb

Standartlaşdırma, Metrologiya və Patent üzrə Dövlət Komitəsinin 1 saylı Ərazi Dövlət Nəzarəti İdarəsinin əməkdaşları fiziki şəxs Vüqar Mürsəliyevə məxsus Bakı şəhəri, Z.Bünyadov prospekti, 38 ünvanında yerləşən mağazada təhlükəsizliyi və keyfiyyəti təsdiq edən sənədləri olmayan külli miqdarda avtomobil ehtiyat hissələri aşkar ediblər. Standartlaşdırma, Metrologiya və Patent üzrə Dövlət Komitəsinin mətbuat xidmətindən «Kaspi»yə verilən məlumata görə, araşdırma zamanı müəyyən olunub ki, mağazada Avropa mənşəli adı ilə satılan malların mənşəyini təsdiq edən sənədləri yoxdur və keyfiyyət göstəriciləri normativ sənədlərin tələbinə uyğun deyil. Bununla bağlı müəssisə rəhbərinə ehtiyat hissələrinin satışının qadağan olunması barədə tələbnamə, nöqsanların aradan qaldırılması barədə iradnamə təqdim edilib. Lakin fiziki şəxs Vüqar Mürsəliyev dövlət müfəttişlərinin məcburi göstərişlərini yerinə yetirmədən malların satışını davam etdirib. Buna görə də Azəbaycan Respublikasının İnzibati Xətalar Məcəlləsinin 317.2 maddəsinə əsasən “məhsulların realizə edilməsinin qadağan edilməsi haqqında yazılı tələbnamələrin yerinə yetirilməməsinə görə” fiziki şəxs V.F.Mürsəliyev barəsində inzibati xəta haqqında Protokol tərtib olunub, 4000 (dörd min) manat məbləğində cərimə tətbiq edilib. İnzibati xəta haqqında iş üzrə icraat başlanıb. Bu barədə məlumatlar Dövlət Gömrük Komitəsinə göndərilib.

+  -  Çap