Hadisəyə futbol oyunlarına yatırılan pula görə yaranan borc səbəb olub

Ağır Cinayətlərə Dair İşlər üzrə Məhkəmədə anasını və həyat yoldaşını qətlə yetirən şəxsin məhkəməsi başlayıb. Məhkəmə qarşısında Bakı şəhəri sakini, 1971-ci il təvəllüdlü Elman Abdulla oğlu Osmanov cavab verir. E.Osmanov Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə ittiham olunub. İttihama görə, hadisə bu il aprelin 8-də Nərimanov rayonu, Çermet qəsəbəsi, Valeh Əmirbəyov küçəsi ev 6-da törədilib. Həmin ünvanda yaşayan E.Osmanov ailə münaqişəsi zəminində anası, 1947-ci il təvəllüdlü Osmanova Akifə Seydulla qızını və həyat yoldaşı, 1977-cü il təvəllüdlü Osmanova Aytəkin Eybala qızını bıçaqlayaraq qətlə yetirib. Daha sonra E.Osmanov bıçaqla özünü öldürmək istəyib. Boğaz nahiyəsindən özünü ağır yaralayan E.Osmanov 5 saylı şəhər xəstəxanasına yerləşdirilib.
Qeyd edək ki, E.Osmanov futbol oyunlarına pul yatırmaqla məşğul olub. Bu oyunlara görə 10 min manat borcu yaranıb. Hadisə baş verən gün də evdə valideynləri və arvadı ilə qumar borcu üstündə dava düşüb. Hadisəyə səbəb də elə bu olub.

+  -  Çap