Məhkəmə qarşısında keçmiş bölük komandiri, baş leytenant Anar Eminov cavab verib

Ağır Cinayətlərə Dair İşlər üzrə Hərbi Məhkəmədə hakim Mehdixan Abdullayevin sədrliyi ilə Müdafiə Nazirliyinin Təlim-Tədris Mərkəzində (TTM) baş verən zəhərlənmə faktı ilə bağlı məhkəmə başlayıb. Məhkəmə qarşısında keçmiş bölük komandiri, baş leytenant Anar Eminov cavab verib. A.Eminov Cinayət Məcəlləsinin 178.2.2-ci (dələduzluq təkrar törədildikdə), 178.2.3-cü (dələduzluq şəxs tərəfindən öz qulluq mövqeyindən istifadə etməklə törədildikdə), 178.2.4-cü (dələduzluq xeyli miqdarda ziyan vurmaqla törədildikdə), 311.3.2-ci (rüşvət alma təkrar törədildikdə) maddələri ilə ittiham olunub. Prosesdə dövlət ittihamçısı ittiham aktını elan edib. İttihama görə, 2009-cu ilin iyununda Müdafiə Nazirliyinin Təlim-Tədris Mərkəzində (TTM) kütləvi zəhərlənmə hadisəsi baş verib. Baş vermiş hadisə ilə bağlı hərbi prokurorluqda araşdırma aparılıb. Nəticədə adıçəkilən hərbi hissənin bir qrup yüksək rütbəli zabiti istintaqa cəlb olunub. General-mayor Lənkəran Əliyev TTM rəisi vəzifəsindən çıxarıldıqdan sonra isə hərbi hissənin əksər xidmət sahələrində yoxlamalar başlanıb. Yoxlama nəticəsində TTM-də külli miqdarda yeyinti faktı aşkarlanıb, Cinayət Məcəlləsinin mənimsəmə, vəzifə səlahiyyətlərindən sui-istifadə və vəzifə saxtakarlığı maddələri ilə cinayət işi başlanıb. Bundan sonra TTM-in Avtomobil Xidməti rəisi, polkovnik-leytenant Arif Məmmədov, daxili əmrlə Mənzil İstismar Xidmətinin rəisini əvəzləyən, polkovnik-leytenant Elşən Abbasov, yanacaq anbarının rəisi, baş gizir Fikrət Abbasov, Əşya Xidməti rəisi, mayor Nazim Həsənov və Maliyyə Xidmətinin rəisi, polkovnik-leytenant İntiqam Mövlanverdiyev istintaqa cəlb olunub.
Məhkəmədə ifadə verən keçmiş bölük komandiri A.Eminov elan olunmuş ittiham üzrə özünü qismən təqsirli bilib. Məhkəmə prosesi şahid ifadələri ilə davam etdiriləcək.

+  -  Çap