Tony Hayvard vəzifəsini tərk edəndən sonra 930 min dollar alacaq

BP-nin baş icraçı direktoru Tony Hayvard oktyabr ayında vəzifəsini tərk edəndən sonra 930 min dollar məbləğində illik təqaüd alacaq. Bu barədə BBC məlumat əldə edib. BP-dəki mənbə bildirib ki, ona şirkətin Rusiyadakı birgə müəssisəsində qeyri-icraçı vəzifə veriləcək. Onun şirkəti tərk etməsi barədə qərarın bu gün açıqlanacağı gözlənilir. Hayvard 28 ildir ki, BP-də çalışır. O, 2007-ci ildə baş icraçı olanda jurnalistlərə demişdi ki, bir nömrəli vəzifəsi təhlükəsizliyi və etibarlığı təmin etmək olacaq. Amma aprelin 20-də Luizianada neft quyusunun partlaması, nəticədə 11 fəhlənin ölməsi, ABŞ-ın tarixində ən pis neft dağılması hadisəsinin baş verməsi onun rəhbərliyini sual altına qoydu. 53 yaşlı Hayvard neftin təmizlənməsi əməliyyatında ləngimələrə görə körfəz sahilində yaşayan sakinlər və Amerika siyasətçilərinin ciddi tənqidinə məruz qalıb. Hayvardı əvəzləyəcəyi gözlənilən şəxs BP-nin idarəedici direktoru Bob Dudleydir. Dudley BP-yə 1999-cu ildə qoşulub və İdarə Heyətinə ötən il gəlib. O, BP-nin Rusiyadakı birgə müəssisəsi olan TNK BP-yə rəhbərlik edib, 2009-cu ildən isə BP-nin Direktorlar Şurasının üzvüdür. Cari ilin may ayında şirkət rəhbərliyi onu, həmçinin Meksika körfəzində baş verən qəzanın nəticələrinin aradan qaldırılması üçün yeni yaradılmış bölmənin başçısı vəzifəsinə təyin edib.  
 

+  -  Çap