Mahmud Abbasın sülh planı belədir

İsrailin baş naziri Benyamin Netanyahu ölkəsinin həqiqi sülh üçün müzakirələrə hazır olduğunu deyib. Baş nazir Fələstin tərəfini danışıqlardan qaçmaqda suçlayıb. Netanyahu bu fikirləri İsrail parlamentinin Xarici işlər və müdafiə komitəsində etdiyi çıxışda bildirib. Baş nazir, həmçinin deyib ki, həqiqi danışıqlara başlamaq lazımdır, bunun üçün Amerika tərəfi ilə müzakirələr aparılır. B.Netanyahu Fələstin hakimiyyətinin bu məsələdə bütün çağırışlara, həqiqi danışıqlara başlamaq dəvətinə təpki göstərdiyini bildirib: «Fələstinlilərin davranışlarına şübhəsi olanlar varsa, indi bu həqiqət kristal qədər şəffafdır». İsrailin baş naziri sonda əlavə edib ki, danışıqlar çətin olacaq, ancaq bütün hallarda müzakirələrə başlamaq lazımdır: «Müdafiə tələbləri və maraqlarımızla bağlı mövzular ancaq həqiqi danışıqlar zamanı müzakirə edilə bilər». Yeri gəlmişkən, Fələstin lideri Mahmud Abbas İsraili kəskin tənqid edib. Uqandanın paytaxtı Kampalada Afrika Birliyi Zirvə toplantısında çıxış edən Abbas bəyan edib ki, «İsrail fələstinlilərin həyatını cəhənnəmə döndərib».  Onun sözlərinə görə, İsrailin sərt addımları iki qonşu dövlətin sülhə nail olmaq imkanlarını heçə endirib. Abbas qeyd edib ki, Təl-Əvivin yeritdiyi siyasət üzündən İordan çayının qərb sahillərində müharibənin yenidən alovlanması mümkündür.  Abbas İsraili Fələstin torpaqlarının işğalını davam etdirməkdə ittiham edib. Onun sözlərinə görə, iki dövlət arasında barış və dinc qonşuluq şəraitində yaşamaq üçün imkan yarandığı anda İsrail yenidən hərbi ekspansiyasını genişləndirərək daha çox Fələstin torpaqlarını ələ keçirməyə çalışır və məskunlaşma siyasətini davam etdirir.  Abbas Amerikanın vasitəçiliyi ilə keçirilən danışıqlar prosesinin məhz İsrailin günahı üzündən dalana dirəndiyini  qeyd edib. Mahmud Abbas bildirib ki, qonşuları ilə dinc şəraitdə yaşaması üçün İsrail işğal etdiyi bütün ərəb torpaqlarından geri  çəkilməli,  İsrail və Fələstin arasındakı 1967-ci il sərhəd xətti bərpa olunmalıdır. «Sülh bizim üçün yeganə seçimdir və bundan əsla geri dönə bilmərik» - deyə Abbas bildirib.

+  -  Çap