Salonun mühafizəçisini qətlə yetirənlərdən ikisi saxlanılıb

Bakıda masaj salonlarından birində qətl törədilib. Hadisənin törədildiyi masaj salonu isə Dərnəgül qəsəbəsində yerləşib. Üç naməlum şəxs salonda mühafizəçi işləyən “Riad” Mühafizə Xidmətinin əməkdaşları 1980-cı il təvəllüdlü Elşad Qasımovu və Fuad Ələkbərova bıçaqla xəsarət yetirib. E.Qasımov aldığı xəsarətdən hadisə yerindəcə keçinib. Ağır xəsarət alan F.Ələkbərov isə xəstəxanaya yerləşdirilib.
Baş vermiş hadisə ilə bağlı Binəqədi rayon Polis İdarəsi və rayon Prokurorluğunun əməkdaşlarından ibarət əməliyyat-istintaq qrupu yaradılıb. Aparılan əməliyyat-axtarış tədbirləri nəticəsində hadisəni törədən şəxslərin kimliyi müəyyənləşdirilib və onlardan ikisi saxlanılıb. Saxlanılanlar 1978-ci il təvəllüdlü Sadiq Əsgərov və 1983-cü il təvəllüdlü Orxan Hümbətəliyevdir. Hazırda faktla bağlı zəruri istintaq tədbirləri davam etdirilir.

+  -  Çap