Müttəhimlər kürsüsündə hərbi hissənin 5 hərbçisi cavab verəcək

Müdafiə Nazirliyinin Daşkəsən rayonunda yerləşən “N” saylı hərbi hissədə baş verən qətllə bağlı cinayət işi Ağır Cinayətlərə Dair İşlər üzrə Hərbi Məhkəməyə göndərilib. Cinayət işi hakim Rəşid Hüseynovun sədrliyi ilə araşdırılacaq. Məhkəmə qarşısında təqsirləndirilən şəxs qismində qətl hadisəsi baş verən hərbi hissədə qulluq edən hərbçilər Vələd Qurbanov, Rüstəm Əhmədov, Əli İmanov, Fuad Mütəllimov və Vazeh Babayev cavab verəcək. Onlar Cinayət Məcəlləsinin 311.3.1-ci (rüşvət alma, qabaqcadan əlbir olan bir qrup şəxs və ya mütəşəkkil dəstə tərəfindən ), 311.3.2-ci (rüşvət alma təkrar törədildikdə), 341-ci (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə), 331-ci (hərbi qulluqçunu təhqir etmə, döymə və ya işgəncə vermə) maddələr ilə təqsirləndiriliblər.
Qeyd edək ki, qətl hadisəsi 2010-cu il yanvarın 28-də Daşkəsən rayonunda yerləşən “N” saylı hərbi hissəsində baş verib. Odlu silahdan açılan atəş nəticəsində həmin hərbi hissədə qulluq edən 1990-cı il təvəllüdlü Elxan Əzizov və 1991-ci il təvəllüdlü Sadiq Məmmədov hərbi hissənin divizion komandiri, polkovnik-leytenant Yusif Cümayev, qərargah rəisi, kapitan Vasif Sadıxov, baş leytenant Anar Quliyev, baş gizir Elgün Səmədov qətlə yetirib. Vazeh Babayev və Samir Abbasov isə yaralanıb. Həmin şəxslərə atəş açan E.Əzizov və S.Məmmədov sonradan özlərini öldürüblər. Hadisə ilə bağlı istintaq Hərbi Prokurorluğun Ağır Cinayətlərə dair İşlər üzrə İstintaq İdarəsində aparılıb. E.Əzizov və S.Məmmədov öldüyünə görə cinayət işinin onlarla bağlı hissəsinə xitam verilib.
Hələlik cinayət işi üzrə məhkəmənin hazırlıq iclasının vaxtı dəqiqləşdirilməyib. 

+  -  Çap