“Barsa” yaxşıların hamısını yığır

Deyəsən, "Barselona" bosları istəyinə nail olmaq üzrədir. Onların David Vilyanı sıralarına qatandan sonra transfer bazarındakı əsas hədəfinə çevrilən Fransesk Fabreqasın İspaniyaya qayıtmaq ehtimalı bir qədər də artıb. Konkret olaraq londonluların Fabreqasın mümkün satışıyla bağlı danışıqları bərpa etməyə razılaşdığını bir daha xatırladaq. Son xəbərlərdə tərəflər arasındakı fikir mübadiləsinin gedişiylə bağlı dəqiq informasiyanın olmadığı vurğulanır. Amma futbolçu vaxtilə yetişdiyi klubla şəxsi müqaviləsinin şərtlərini razılaşdırıb. Hər halda İspaniya mənbələri belə iddia edir. Onlara inansaq, Sesk kimi də tanıdığımız yarımmüdafiəçi "Barsa"yla beşillik müqavilə bağlayacaq və ilə 7 milyon avro məbləğində maaş alacaq.
"Barselona" boslarının digər transfer planlarıyla bağlı xəbərləri də diqqətinizə çatdırırıq. "El Mundo Deportivo" qəzeti Markos Sennanın tezliklə bu kluba keçə biləcəyini xəbər verir. "Vilyarreal"ın yarımmüdafiəçisinin transferi təxminən 3 milyon avro məbləğində dəyərləndirilir.
Kataloniyalılar yeni mövsümdə xidmətinə ehtiyac duymadığı futbolçuları da müəyyən edib. Bəzi mənbələr Aleksandr Qleb, Enrike Bassa və Martin Kaseresin baş məşqçi Xosep Qvardiolaya lazım olmadığını vurğulayır. Belarus millisinin yarımmüdafiəçisi olan Qleb ötən mövsümü icarə qaydasıyla "Ştutqart"da keçirib. O, yeni mövsümə "Barsa"da başlayacağına inamını itirməsə də, Aleksandrın bu yay İngiltərə klublarından birinə üz tutacağı qeyd edilir. Braziliyalı Enrike ötən mövsüm analoji statusda "Rasinq"in şərəfini qoruyub. Onun daimi əsasda bu komandada qalmaq ehtimalı yüksəkdir. Uruqvayla Kaseresə gəlincə, bu futbolçu ötən mövsüm icarə qaydasıyla "Yuventus"a xidmət edib. Amma bir ara ağır zədə üzündən yaşıl meydana çıxa bilməyən Martinin gələcəyi hələ ki dumanlı görünür.

+  -  Çap