Komitəyə namizədliyini irəli sürən Ermənistan kifayət qədər səs toplaya bilmədiyi üçün seçkilərdə məğlub olub

Azərbaycan YUNESKO-nun Qeyri-maddi mədəni irsin qorunması üzrə Hökumətlərarası Komitəsinə 2010-2014-cü illər üzrə namizədliyini irəli sürüb. Xarici İşlər Nazirliyinin mətbuat xidmətindən verilən məlumata görə, 22-24 iyun tarixlərində YUNESKO-nun Qeyri-maddi mədəni irsin qorunması üzrə Konvensiyasının iştirakçı dövlətlərinin Parisdə keçirilən Baş Assambleyasının 3-cü sessiyası zamanı Hökumətlərarası Komitəyə seçkilər keçirilib.
Seçkilər zamanı Azərbaycanın namizədliyinin dəstəklənməsinə nail olmaq məqsədilə YUNESKO üzrə Azərbaycan Respublikası Milli Komissiyası, Azərbaycanın YUNESKO yanında Daimi Nümayəndəliyi və Azərbaycanın xarici ölkələrdə fəaliyyət göstərən diplomatik nümayəndəlikləri tərəfindən müvafiq işlər aparılıb və görüşlər keçirilib. Xarici İşlər Nazirliyi və digər aidiyyəti dövlət qurumları tərəfindən aparılmış məqsədyönlü iş nəticəsində bu gün keçirilən seçkilərdə Azərbaycan YUNESKO-nun Qeyri-maddi mədəni irsin qorunması üzrə Hökumətlərarası Komitənin 2010-2014-cü illər üzrə üzvü seçilib. YUNESKO-nun Qeyri-maddi mədəni irsin qorunması üzrə Hökumətlərarası Komitə 24 nümayəndədən ibarətdir. Qeyd etmək istərdik ki, Azərbaycanla yanaşı, Komitəyə namizədliyini irəli sürən Ermənistan kifayət qədər səs toplaya bilmədiyi üçün seçkilərdə məğlub olub. Qeyd edək ki, Komitə təşkilatın nüfuzlu qurumlarından biri hesab edilir və qeyri-maddi mədəni irs nümunələrinin YUNESKO-nun Bəşəriyyətin Qeyri-maddi mədəni irs üzrə Reprezentativ Siyahısına daxil edilməsi məsələsi məhz həmin Komitədə müzakirə olunur, müvafiq qərarlar qəbul edilir. Azərbaycanın Komitəyə üzv qəbul olunması dünyanın qeyri-maddi mədəni irsinin qorunması ilə bağlı məsələlərin müzakirəsində ölkəmizin əhəmiyyətli rol oynamasına, eləcə də Azərbaycanın mədəni irs nümunələrinin YUNESKO-nun Qeyri-maddi mədəni irs üzrə Reprezentativ Siyahısına daxil edilməsi istiqamətində daha fəal iş aparılmasına şərait yaratmış olacaq.

+  -  Çap