Səməd Seyidov: “Azərbaycan yeni həmməruzəçi ilə işləməyə hazırdır”. Ermənistan tərəfi isə bu ölkə üzrə yeni həmmərizəçinin təyinatını narazılıqla qarşılayıb

Avropa Şurası Parlament Assambleyasının yay sessiyası çərçivəsində qurumun Monitorinq Komitəsinin iclası keçirilib. APA-nın Avropa Şurasında akkreditə olunmuş əməkdaşının verdiyi məlumata görə, iclasda Azərbaycan və Ermənistan üzrə yeni həmməruzəçilər təyin edilib. Azərbaycan üzrə Andres Herkelin əvəzinə həmməruzəçi vəzifəsini bundan sonra ispan parlamentar Pedro Aqramunt Fon de Mora icra edəcək. Ermənistan üzrə isə Fransalı Jorj Kolombyenin yerinə isveçli Qoran Linbland həmməruzəçi təyin edilib.
Ermənistan üzrə təyin olunacaq yeni həmməruzəçi erməni tərəfinin narazılığı ilə qarşılanıb. Bu məsələni APA-ya şərh edən Azərbaycanın AŞPA-da nümayəndə heyətinin rəhbəri Səməd Seyidov bildirib ki, Ermənistan tərəfi Qoran Linbladın təyinatına çox ciddi narazılıq etsə də, Monitorinq Komitəsi vahid mövqedən çıxış edərək onu Ermənistan üzrə həmməruzəçi təyin edib.
Azərbaycan üzrə yeni həmməruzəçinin təyin edilməsinə münasibət bildirən Səməd Seyidov Azərbaycan tərəfinin bu təyinatı razılıqla qarşıladığını söyləyib: “Hesab edirəm ki, Cənab Pedro Aqramunt Fon de Mora AŞ PA və eləcə də Avropa Şurasında ən nüfuzlu siyasətçilərdən biridir, çox fəal bir deputatdır və Azərbaycan bu insanla işləməyə hazırdır və işləyəcək”.

+  -  Çap