Azərbaycanın xalq artisti Alim Qasımovla məşhur fransalı DJ və bəstəkar David Vendettanın birgə oxuduqları “İ am your goddes” mahnısına çəkilən klipin təqdimatı keçirilib. Layihəni həyata keçirən “Mamedia” şirkətinin prezidenti və layihənin prodüseri Mübariz Abdullayev bildirib ki, “İ am your goddes” mahnısı 2010-cu ilin mart ayında D. Vendettanın “Vendetta” adlı albomunda 4-cü sırada yer alıb: “Azərbaycanda ilk beynəlxalq musiqi layihəsini bu gün təqdim edirik. Bu layihə ilk dəfə olaraq azərbaycanlı ifaçı ilə dünya şöhrətli DJ və bəstəkarın birgə işidir. Qısa vaxtda bu mahnı dünyanın ən məşhur radiostansiyalarında top onluqlarda ön sıralarda səsləndi və artıq bu yayın super hitinə çevrilməkdədir”. M. Abdullayev deyib ki, klipin bir hissəsi Bakıda - İçərişəhər və Qız qalasında, digər hissəsi isə Mərakeşdə çəkilib: “Klip iyunun 6-dan etibarən dünyanın aparıcı musiqi kanallarında gündəlik rotasiyaya girəcək. Vendettanın klipləri hər zaman MC, MTV, “Viva”, “Europa 2” və digər məşhur dünya kanallarında yayınlanıb. Bu layihənin bütün xərcini David Vendettanın özü çəkib. Layihəyə ümumilikdə 150 min avro xərclənib”.
Xalq artisti Alim Qasımov da bu əməkdaşlıqdan razı qaldığını qeyd edib və bu işin onun üçün çox ürəkaçan olduğunu söyləyib: “Sözsüz ki, bu cür layihələrdə iştirak hər zaman yaxşıdır. Məni dəvət etdilər və razılaşdım, nəticə isə göz önündədir”.
A. Qasımov bu layihəyə görə ona müəyyən məbləğdə qonorar təklif etsələr də, bundan imtina etdiyini açıqlayıb. O, yaxın vaxtlarda yeni layihələrlə pərəstişkarlarını sevindirəcəyini də bildirib.

+  -  Çap