Mətbuat Şurasının təşkilatçılığı ilə “KİV-lərin ilk mənbədən məlumat alma imkanları” mövzusunda dəyirmi masa keçirilib. MŞ-nin sədri Əflatun Amaşov bildirib ki, tədbir Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə yardımı ilə şura tərəfindən həyata keçirilən “Media problemlərinin müzakirəsi jurnalist peşəkarlığının və məsuliyyətinin artırılmasına dəstək kimi” layihəsi çərçivəsində keçirilir. O, layihənin icrası nəticəsində mediadakı xoşagəlməz tendensiyaların, mənfi meyllərin, çatışmazlıqların köklərini üzə çıxarmaq, Azərbaycan mediasının mövcud durumu barədə bitkin və geniş rəy formalaşdırmaq, bu yolla cəmiyyətin ölkə mediasında baş verən proseslərə diqqətini cəmləşdirmək, həmin proseslərə münasibətdə düzgün mövqeyinin yaranmasına nail olmağın nəzərdə tutulduğunu qeyd edib. Tədbirdə məruzə ilə çıxış edən İctimai Yayım Şurasının sədri Cahangir Məmmədli layihədə qoyulan problemin əhəmiyyətindən danışıb. Onun sözlərinə görə, ilk mənbədən informasiya alma imkanları dövlət və ictimai institutların nə dərəcədə cəmiyyətə açıq olmasını, qarşılıqlı əlaqələrin səviyyəsini müəyyənləşdirən başlıca faktordur: “İnformasiyalı cəmiyyət anlamının formalaşması birbaşa medianın durumu, informasiya əldə etmə imkanları və informasiya mənbələrinin onun üzünə nə dərəcədə açıqlığı ilə sıx surətdə bağlıdır”. C. Məmmədli çıxışında Azərbaycanda məlumat almaq sahəsindəki mövcud qanunvericilik bazasından danışıb. Onun sözlərində görə, bununla bağlı Azərbaycanda çoxsaylı hüquqi normalar mövcuddur. Tədbirdə ölkədə ilk mənbədən məlumat alınması sahəsindəki problemlərə dair fikir mübadilələri aparılıb.

+  -  Çap