Azərbaycanın Serbiyadakı səfirliyinin təşəbbüsü və Serbiya hökuməti və Mədəniyyət Nazirliyinin dəstəyi ilə Belqrad şəhərində Azərbaycan Mədəniyyət Mərkəzinin yaradılması barədə qərar qəbul edilib. Bu barədə APA-ya Azərbaycanın Serbiyadakı səfirliyindən məlumat verilib.
Məlumata görə, Belqraddakı Azərbaycan Mədəniyyət Mərkəzinin fəaliyyəti zəngin və qədim tarixə malik olan Azərbaycan və serb xalqları arasında körpü rolu oynamaq, xalqların mədəni irsi, tarixi, mədəniyyəti, musiqisi, xalq yaradıcılığı, milli rəqsləri və s. ilə yaxından tanış etmək və mədəni əlaqələrin inkişafına töhfə verməkdən ibarət olacaq. Bildirilib ki, mərkəzin yaradılması, həmçinin Azərbaycan və serb xalqları arasında mədəni əlaqələrin yeni səviyyəyə yüksəlməsinə, iki ölkə ziyalılarının, mədəniyyət xadimlərinin, incəsənət ustalarının bir-biriləri ilə sıx təmas qurmalarına, qarşılıqlı səfərlərin həyata keçirilməsinə, Azərbaycan və Serbiya mütəfəkkirlərinin, müəlliflərinin dünya mədəniyyət xəzinəsinə baxış etdikləri incilər və əsərlərinin iki dilə tərcümə edilməsinə və s. yaxından yardım edəcək.

+  -  Çap