İmanulla Bəşirov14 il müddətinə azadlıqdan məhrum edildi

Aprelin 23-də Ağır Cinayətlərə Dair İşlər üzrə Məhkəmədə hakim Rasim Sadıxovun sədrliyi ilə dostunu qətlə yetirməkdə təqsirləndirilən şəxsin məhkəməsi yekunlaşıb.  Məhkəmə qarşısında  Bakı şəhər sakini 1983-cü il təvəllüdlü İmanulla Bəşirov cavab verib. Təqsirləndirilən İ.Bəşirov Cinayət Məcəlləsinin 120.2.2-ci (xuliqanlıq niyyəti ilə adam öldürmə) və 228-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddəsi ilə ittiham olunub. İttihama görə, hadisə 2009-cu il noyabrın 21-də qeydə alınıb. Həmin gün İ.Bəşirov aralarında yaranan qumar borcuna görə həmyerlisi 1980-ci il təvəllüdlü Şahin Nurməmmədovu güllələyib. Daha sonra isə hadisə yerindən qaçıb.  Yaralı xəstəxanaya çatdırılsa da, onun həyatını xilas etmək mümkün olmayıb. Hadisədən 20 gün sonra Yasamal RPİ Cinayət Axtarış Şöbəsinin və 26-cı PB-nin əməkdaşlarının keçirdiyi əməliyyat axtarış tədbirləri nəticəsində İ.Bəşirov saxlanılıb.  Məhkəmənin hökmü ilə İ.Bəşirov 14 il müddətinə azadlıqdan məhrum edilib.

+  -  Çap