Göz  yaşı  sənin yox,  gözümün olsun,

Ağlama ürəyim, ağlama daha!

Bir azca səbr elə, dözümün olsun,
Ağlama ürəyim, ağlama daha!

Bir vaxtlar heç səni yoran yoxuydu,

Köksünə bir naxış vuran yoxuydu.

Vaxt vardı əzmini qıran yoxuydu,

Ağlama ürəyim,  ağlama daha !

Neyləyək, olmadı arzuların çin,

Sönmədi atəşin, yandın günbəgün.

Sənə tay olmayan o daş ürəkçün,

Ağlama ürəyim, ağlama daha!

Aşkar ağlamağa ar eyləyirsən,

Xəlvətdə gözünü kor eyləyirsən.

Ağlayıb yerini dar eyləyirsən,

Ağlama ürəyim, ağlama daha!

Körpə arzuların boy atan vaxtı,

Bu əzab, bu həsrət sonuna çıxdı.

Hanı, heç  səninçün ağlayan yoxdu?

Ağlama ürəyim, ağlama daha!

Gələcək, işıqlı səhərimiz var,

Hələ də qüvvəmiz, təpərimiz var.

Səninlə bir ömür səfərimiz var,

Ağlama ürəyim, ağlama daha!

+  -  Çap