Əyyub Quliyev: "Bu konsertlərdə də hiss etdim ki, tara maraq böyükdür"

Beynəlxalq müsabiqələr laureatı, diriyor Əyyub Quliyev bu günlərdə Ukraynadan səfərdən qayıdıb. Diriyorun sözlərinə görə, sözügedən ölkədə Azərbaycanın Müstəqillik günü ilə bağlı silsilə konsertlər verib. Konsert Ukraynanın Donetsk və Kiyev şəhərlərində keçirilib.
Əyyub Quliyevin sözlərinə görə, Donetsk Dövlət Opera Teatrında baş tutan ilk konsertin təşkilatçısı Dünya Azərbaycanlıları Konqresinin Ukrayna nümayəndəliyi olub. Azərbaycanın Ukraynadakı səfirliyi isə konsertə təşkilati dəstək verib: "Konsertdə mənimlə bərabər tarzən, professor Ramiz Quliyev, muğam ifaçısı Elməddin İbrahimov və kaman ifaçısı Mərkəz Əliyev də iştirak edirdi. Konsertdə məqsəd həm klassik, həm də milli musiqini təbliğ etmək olub". Konsertdə Azərbaycanın dahi sənətkarlarından Üzeyir Hacıbəyovun, Qara Qarayevin, Fikrət Əmirovun simfonik orkestr üçün yazılmış ən parlaq əsərləri səslənib.
Əyyub Quliyevin əlavəsinə görə, Kiyev konserti isə Dövlət Akademik Opera Teatrında keçirilib. Bu konsertdə iki diriyor iştirak edib. Əyyub Quliyevin sözlərinə görə, bu konsertin əsas təşkilatçısı Azərbaycanın Ukraynadakı səfirliyi olub: "Təşkilati dəstək isə Heydər Əliyev Fondu, Azərbaycan və Ukraynanın Mədəniyyət və Turizm nazirlikləri tərəfindən verilib. Konsertdən öncə Heydər Əliyev Fondunun prezidenti Mehriban Əliyevanın, Mədəniyyət və Turizm Nazirliyinin təbrik məktubu oxunub. Bu konsertlərdə də hiss etdim ki, tara maraq böyükdür. Xaricilər üçün tar yenidən kəşf edildi".


S.İBRAHİMOVA

+  -  Çap