Futbolçumuz "Spartak"a qarşı 90 dəqiqə oynadı

Azərbaycan yığmasının futbolçusu Mahir Şükürov martın 13-də Rusiya Premyer Liqasında debüt edib. Apasport.az saytının məlumatına görə, 28 yaşlı müdafiəçi qışda transfer olunduğu Mahaçqalanın "Anyi" klubunun heyətində Nalçik "Spartak"ı ilə görüşə start heyətində çıxıb. Həmyerlimiz qolsuz bərabərliklə nəticələnən oyunu əvəzlənmədən keçirib.
M.Şükürovun Rusiya çempionatında debütü yaxşı qiymətləndirilib. O, qolsuz bərabərliklə nəticələnən ev oyununda çıxışına görə 5,5 bal alıb. Qiyməti verən Rusiyanın nüfuzlu "Sport-Ekspress" qəzeti Mahiri komandasının heyətində ən yaxşılardan biri sayıb. Belə ki, Şükürov "Anyi"nin heyətində 5,5 bal alan 6 futbolçudan biri olub. Maraq üçün qeyd edək ki, Mahaçqala klubunda ən yüksək qiymət alan futbolçuya 6 bal verilib.
Hər halda, Mahirin debüt etdiyini nəzərə alsaq, ilk oyun üçün çıxışı yaxşı sayılmalıdır. Təsadüfi deyil ki, "Anyi"nin baş məşqçisi Omari Tetradze M.Şükürov da daxil olmaqla bütün yetirmələrinə "Spartak"la görüşdə göstərdikləri əzmkarlıq və xarakterə görə minnətdarlıq edib.

+  -  Çap