Bu gün Azərbaycan Kinematoqrafçılar İttifaqında "Çanaqqaladan başlayan yol" filminin təqdimetmə mərasimi keçiriləcək. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə çəkilən film "AQAP" prodüser mərkəzinin istehsalıdır. Filmin quruluşçu reyissoru Rövşən İsmayılov, ssenari müəllifi Arzu Qazıyeva, prodüseri Bəxtiyar Həsənovdur.
Arzu Qazıyevanın məlumatına görə, film 1920-1922-ci illərdə Türkiyənin villi istiqlal savaşına Azərbaycan türklərinin yardımından bəhs edir. Türkiyənin Azərbaycandakı səfirliyi tərəfindən dəstək alan "Çanaqqaladan başlayan yol" filmində XX əsr Azərbaycan, eləcə də Türkiyə tarixində bəzi qaranlıq məqamlarla yanaşı, açılmamış çoxlu şərəfli səhifə var. Ssenari müəllifinin sözlərinə görə, bu filmi digər ekran işlərindən fərqləndirən cəhət araşdırma xarakteri ilə seçilir: "Türkiyəyə qarşı Balkan savaşları başlayan ərəfədə Bakıda zəngin insanlar xeyriyyə cəmiyyəti yaratmışdılar. Bu cəmiyyət tərəfindən müntəzəm olaraq Anadoluya yardımlar göndərilirdi. Bundan əlavə, Bakı sahibkarları Anadoluda kimsəsiz uşaqlar üçün uşaq evləri tikdirib, onların fəaliyyətinə vəsait ayırırdılar. Filmin təqdimatı günü bu və ya digər məqamlar tamaşaçıya ətraflı çatdırılacaq".

+  -  Çap